Titus
Paulus pe surat for Titus
Kata Pengantar
Ni kitab Titus ini Paulus yang da tulis. Kitab ini de pe model surat, kong Paulus kirim ni surat pa Titus. Titus ini tinggal di pulau Kreta, dia ada di situ lantaran Paulus da suru pa dia for ator tu orang-orang percaya yang ada di situ. Titus itu bukang orang Yahudi (Gal. 2:3), mar dia itu so percaya pa Yesus deng so jadi Paulus pe tamang karja (2Kor. 8:23).
Ni surat biasa ja bilang surat penggembalaan sama deng 1 deng 2 Timotius. Di surat ini, ada tiga hal penting yang Paulus da se tau. Pertama, Paulus se inga pa Titus tentang bagimana tu kalakuan dari orang yang bole jadi pemimpin jemaat (Tit. 1:6-9). Kadua, Paulus lei se nasehat pa Titus bagimana mo mangajar pa tiap golongan orang yang jadi anggota jemaat di Kreta, bae itu for laki-laki deng parampuang yang so tua, mo orang muda, deng for orang-orang yang da jadi budak (Tit. 2:1-10), supaya dorang pe iman tamba kuat deng dorang tau tu ajaran yang butul. Katiga, Paulus se ajar pa Titus tentang bagimana mustinya orang percaya pe kalakuan (Tit. 3:1-11). Kong yang paling penting kalu orang Kristen musti bae-bae, suka baku-baku bae, nyanda ja binci orang, nyanda suka baku ambe ato beking orang bakalae.