2 Timotius
Paulus pe surat yang kadua for Timotius
Kata pengantar
Ni kitab 2 Timotius ini, Paulus yang da tulis. Kitab ini de pe model surat, kong ini surat yang kadua yang Paulus da kirim for Timotius. Dia tulis ni surat waktu da dapa se maso ka bui di Roma lantaran da se tau pa orang-orang tentang Yesus Kristus (2Tim. 1:8, 16-18, 2:9). Dia tau kalu dia mo dapa bunung, so itu dia tulis ni surat for Timotius yang so lama jadi dia pe tamang karja. Timotius itu pemimpin orang percaya di kota Efesus (2Tim. 4:6). Di surat ini Paulus kase nasehat deng smangat pa Timotius yang masi muda ini supaya nanti kalu Timotius mangada pendritaan, dia tetap batahang mangada itu. Paulus se inga pa dia kalu pendritaan itu so jadi bagian dari orang percaya pe hidop (2Tim. 1:8, 2:3, 3:12, 4:5). Dia kase smangat pa Timotius supaya siap lawang tu orang-orang yang ja se ajar tu ajaran palsu deng ajaran yang nyanda butul (2Tim. 2:3-7, 14-26, 3:14–4:5). Dia se inga pa Timotius supaya dia rajin beking tu karja yang Tuhan Allah da kase (2Tim. 1:6-7). Dia suru pa Timotius supaya capat pi baku dapa deng dia (2Tim. 4:9, 21) lantaran dia so rindu pa Timotius (2Tim. 1:3-5). Paulus se inga pa Timotius supaya iko tu dia pe cara hidop, iko tu de pe percaya pa Yesus Kristus, iko tu de pe sabar, deng iko lei tu dia pe basayang. Paulus lei se inga tentang tu dua orang tu da se tau tu ajaran palsu. Dorang se ajar kalu Tuhan Allah so se hidop ulang tu orang-orang yang so mati, jadi kata nanti so nyanda ada lei orang yang mo hidop ulang (2Tim. 2:17-18). Paulus bilang kalu dorang pe ajaran itu nyanda butul. Nanti, Tuhan Allah mo se hidop ulang orang yang so mati (1Kor. 15:12, 19-23; 1Tes. 4:16-17).