Torang musti batahang trus iko pa Kristus Yesus
2
1 Timotius, kita pe anak. Kristus Yesus so se tunjung Dia pe bae pa ngana lantaran ngana so percaya, so itu pake jo itu for se kuat ngana pe hati. 2 Ngana so dengar tu ajaran yang kita da se ajar di muka banya orang. Ngana musti kase ajar tu ajaran itu pa orang laeng yang ngana bole mo se percaya akang itu deng yang pande mangajar. Deng bagitu dorang bole kase ajar pa orang laeng.3 Kalu ngana beking tu ngana pe tugas kong mendrita, ngana lei musti batahang. Ngana musti batahang sama deng Kristus Yesus pe tentara yang setia. 4 De pe conto bagini: kalu tentara samantara beking de pe tugas, dia nyanda pusing deng urusan-urusan laeng. Dia cuma mangada trus tu de pe tugas supaya de pe kapala perwira Romawi snang pa dia. 5 Kalu orang iko lomba, dia musti iko tu atoran-atoran lomba supaya bole mo dapa juara. 6 Kong kalu petani karja kras pa de pe kobong, dia yang musti pertama dapa tu kobong pe hasil. 7 Tarukira jo bae-bae apa yang kita da bilang tentang tu conto-conto tadi! Soalnya kalu ngana tarukira bae-bae, Tuhan pasti mo kase mampu pa ngana for mangarti samua itu.
8 Kong inga bae-bae tu hal ini: Yesus Kristus, Dia itu raja Daud pe keturunan. Dia mati mar Tuhan Allah se hidop ulang. So ini no tu Kabar Bae tentang Yesus yang kita ja kase tau. 9 Waktu kita da kase tau tu Kabar Bae itu, orang-orang siksa pa kita. Dorang ika pa kita pake rante, dorang tahang pa kita di bui rupa deng kita ini orang jaha. Mar biar lei bagitu, dorang nyanda dapa tahang tu Tuhan Allah pe firman mo tasiar. 10 So itu no kita sabar ja tanggong samua tu siksa, supaya orang yang Tuhan Allah so pili bole mo dengar tu Kabar Bae tentang Yesus. Deng bagitu dorang bole percaya pa Kristus Yesus kong dapa slamat yang beking dorang dapa puji deng hormat sama-sama deng Tuhan sampe slama-lamanya.
11 Memang butul tu kata-kata ini,
“Kalu torang se tinggal tu torang pe cara hidop dulu yang malawang pa Tuhan,
itu sama deng torang da mati sama-sama deng Dia.
Deng bagitu, torang lei nanti mo hidop sama-sama deng Dia.
12 Kalu torang mendrita kong batahang percaya,
torang lei mo berkuasa sama-sama deng Dia.
Kalu torang manyangkal kanal pa Dia,
Dia lei mo manyangkal kalu Dia kanal pa torang.
13 Biar torang nyanda setia, Dia tetap setia,
lantaran apa yang Dia so bilang pasti Dia mo beking.”
Cara hidop yang Tuhan suka
14 Kase inga pa orang-orang percaya tentang samua tu kita da bilang pa ngana ini. Bilang pa dorang deng sunggu-sunggu di muka pa Tuhan Allah kalu dorang jang baku ambe tentang arti dari kata-kata. Soalnya itu nyanda ada de pe guna, kong cuma mo beking kacau pa orang-orang yang da dengar itu. 15 Beking jo tu ngana pe tugas deng bae-bae supaya Tuhan Allah snang pa ngana. Deng beking bagitu, ngana beking ngana pe tugas kong nyanda usa malo di muka pa Tuhan, ngana bole kase tau pa orang deng bae-bae tu ajaran yang butul itu. 16 Ngana lei jang badekat pa tu orang-orang yang da bacirita tu cirita yang nyanda ada de pe guna deng yang nyanda hormat pa Tuhan. Soalnya orang-orang yang ja bacirita bagitu beking dorang pe kalakuan jadi sama deng orang yang nyanda percaya pa Tuhan. 17 Dorang pe cirita yang nyanda butul itu menjalar deng bahaya sama deng tu panyaki kanker. Kong dari antara tu orang-orang yang ja bacirita itu, ada Himeneus deng Filetus. 18 Dorang dua itu so nyanda iko tu ajaran yang butul. Dorang ja se ajar kalu Tuhan Allah so se hidop ulang tu orang-orang yang so mati, jadi kata nanti so nyanda ada lei orang yang mo hidop ulang. Deng dorang se ajar bagitu, ada bebrapa orang yang so nyanda percaya lei pa Yesus. 19 Mar biar lei bagitu, Tuhan Allah pe ajaran tetap ada pa tu orang-orang percaya pe hati sampe dorang pe percaya nyanda mo tagoyang, itu sama deng satu fondasi yang Tuhan Allah da beking tetap kuat. Di fondasi itu ada tulis bagini, “Tuhan kanal tu De pe orang-orang” deng “Sapa jo yang semba pa Tuhan, dia musti brenti beking tu jaha.”
20 Di ruma basar, ada barang-barang yang da beking dari macam-macam bahan. Ada yang da beking dari mas, perak, kayu deng ada lei yang dari tana liat. Tu barang yang da beking dari mas deng perak, tu barang-barang itu ja pake waktu acara kusus. Kong tu barang yang da beking dari kayu deng tana liat, ja pake for acara yang biasa-biasa. 21 Bagitu lei deng tu orang percaya. Kalu ada yang brenti beking tu jaha, dia sama deng tu barang yang ja pake di acara kusus. Tuhan mo pake tu orang itu for hal-hal yang kusus. Tuhan beking tu orang jadi kudus. Tuhan snang pake pa dia lantaran dia lei siap mo beking samua karja yang bae.
22 So itu ngana bajao jo dari tu nafsu yang besae tu biasa anak muda ja beking. Ngana musti bagini: beking tu butul di muka pa Tuhan, percaya pa Yesus, sayang pa orang laeng, kong deng hati yang bersi hidop tenang deng samua orang yang percaya pa Tuhan. 23 Ngana lei jang taiko-iko baku ambe tentang tu hal-hal yang nyanda butul deng nyanda ada guna. Ngana tau kalu tu baku ambe bagitu cuma mo beking orang bakalae. 24 Mar tu Tuhan pe orang karja rupa ngana ini nimbole baku ambe bagitu. Malatare tu orang itu musti bae-bae pa samua orang, pande mangajar deng lei sabar pa orang-orang. 25 Tu orang itu musti mangajar deng cara yang nyanda sombong pa orang-orang yang ja malawang tu ajaran yang butul. Dia beking bagitu lantaran sapa tau Tuhan Allah kase kesempatan pa dorang for bertobat sampe dorang bole tau tu ajaran yang butul. 26 Deng bagitu, dorang jadi sadar ulang kong talapas dari setang pe bos pe kuasa, sama deng da talapas dari prangkap. Soalnya dulu setang pe bos da kuasai pa dorang sampe dorang iko-iko dia pe mau.