1 Timotius
Paulus pe surat yang pertama for Timotius
Kata pengantar
Ni kitab 1 Timotius ini Paulus yang da tulis. Kitab ini de pe model surat, kong Paulus kirim ni surat pa Timotius. Ni surat for Timotius tu Paulus so anggap de pe anak sandiri lantaran dorang dua pe hubungan so dekat. Timotius itu masi muda mar dia so bebrapa taong da iko pa Paulus pe perjalanan for kase tau tu Kabar Bae tentang Yesus (Kis. 16:3, 17:14-15, 18:5, 19:22, 20:1-6). Timotius itu asli dari Listra. Dia pe mama orang Yahudi kong dia pe papa orang Yunani (Kis. 16:1). Tu sudara-sudara yang percaya di kota Listra deng kota Ikonium tau skali kalu Timotius itu orang bae-bae (Kis. 16:2). Dia pe mama deng dia pe oma so lebe dulu percaya kong dorang ja se ajar pa dia tentang Kitab Suci (2Tim. 1:5, 3:15). Waktu Paulus tulis ni surat, Timotius ada di kota Efesus, kong Paulus ada di Makedonia. Paulus pikir kalu dia mungkin talat pigi ka Efesus, so itu dia tulis ni surat for kase tau bagimana tu orang percaya musti hidop jadi Tuhan pe kluarga pa Timotius (2Tim. 3:14-15).
Pa Paulus pe surat ini, dia suru pa Timotius for se brenti tu orang-orang yang ja se tau tu ajaran sesat yang baku laeng deng tu dong Paulus pe ajaran tu kabar bae tentang Yesus Kristus (2Tim. 1:3, 4:1-6). Soalnya di Efesus ada yang ajar kalu mo iko pa Yesus musti lei iko tu atoran-atoran di kitab Taurat, mar dorang sandiri nyanda mangarti apa tu dorang da se ajar deng dorang nintau tu de pe arti, kong dorang pake itu deng maksut yang nyanda butul (2Tim. 1:7-8). Pa dorang pe ajaran, dorang se tau kalu orang mo slamat dia lei musti beking tu atoran-atoran di kitab Taurat rupa jang kaweng deng jang makang tu makanan haram (2Tim. 4:1-5). Paulus lei se nasehat pa Timotius bagimana mo ator tu jemaat deng tu atoran baibada rupa tu basombayang (2Tim. 2:1-8). Dia lei se tau tentang tu sifat-sifat yang pantas dari tu orang yang mo jadi pemimpin jemaat (2Tim. 3:1-13), deng lei cara yang bae for tolong tu janda yang mendrita (2Tim. 5:3-16). Dia lei se tau pa Timotius bagimana jadi Yesus Kristus pe budak yang bae deng bagimana tu tanggong jawab pa anggota jemaat.