Filemon
Paulus pe surat for Filemon
Kata Pengantar
Ni kitab Filemon ini Paulus yang da tulis. Ni kitab de pe model surat, kong surat ini for Filemon tu satu orang percaya yang top di kota Kolose. Dia ada satu budak tu de pe nama Onesimus. Tu budak itu da lari dari pa dia kong pigi ka kota Roma, trus waktu itu dia baku dapa deng Paulus tu da dapa se maso ka bui lantaran da se tau tu Kabar Bae tentang Yesus. Di surat ini da se tau kalu Paulus da se ajar pa Onesimus tentang tu Kabar Bae, kong Onesimus jadi orang yang percaya pa Yesus. Abis itu Paulus se nasehat pa Onesimus supaya babale ulang pa de pe tuang tu Filemon. So itu no kong Paulus tulis ni surat. Di surat ini, Paulus bamohon pa Filemon supaya Filemon se maaf akang pa Onesimus kong trima ulang pa dia lantaran kalu iko tu atoran di Krajaan Romawi, budak yang lari dari de pe tuang musti dapa hukuman mati. Paulus minta pa Filemon trima pa Onesimus sbagai sudara yang sama-sama percaya pa Yesus. Di bahasa Yunani, tu nama ‘Onesimus’ de pe arti ‘berguna’, kong Paulus bilang kalu dulu Onesimus nyanda ada de pe guna for Filemon, mar skarang Onesimus so percaya pa Yesus, so itu dia jadi orang yang berguna (Flm. 11).