Yesus Kristus jadi korban persembahan satu kali for slama-lamanya
10
1 Tu atoran-atoran di kitab Taurat, itu cuma gambaran dari tu hal-hal bae yang nanti torang mo dapa lewat Yesus, bukang yang sebenarnya. So itu, tu atoran-atoran di Kitab Taurat itu nyanda beking tu orang-orang yang basemba pa Tuhan Allah jadi sempurna di muka pa Dia, biar lei dorang tiap taong kase korban persembahan. 2 Soalnya kalu misalnya deng kase korban persembahan pa Tuhan kong orang bole jadi bersi di muka pa Tuhan, itu de pe arti tu orang-orang yang datang basemba pa Tuhan itu so nyanda perlu lei mo kase korban persembahan ulang-ulang, lantaran dorang so nyanda bapikir kalu dorang masi berdosa. 3 Mar deng dorang kase tu korban persembahan tiap taong, itu justru se inga pa dorang kalu dorang itu orang berdosa. 4 Soalnya memang nyanda mungkin tu dara dari sapi jantan deng dara dari tu kambing jantan bole mo se hapus tu manusia pe dosa-dosa.5 So lantaran tu korban persembahan itu nyanda cukup for se hapus dosa, itu no kong kiapa waktu Kristus datang ka dunia, Dia babilang pa Tuhan Allah bagini,
“Tuhan, Tuhan nimau tu korban deng persembahan,
mar Tuhan so se sadia badan for Kita.
6 Tuhan nyanda snang deng tu korban bakaran
deng tu korban-korban for se hapus dosa.
7 Trus Kita bilang,
‘Oh Tuhan Allah! Lia jo,
Kita so datang for beking tu Tuhan Allah pe mau,
itu sama deng yang da tatulis dari dulu tentang Kita di gulungan Kitab.’ ”
8 Tu pertama yang Kristus da bilang di atas bagini, “Tuhan Allah, Tuhan nimau deng lei nyanda snang deng tu korban-korban persembahan deng persembahan-persembahan laeng, tu korban bakaran deng tu korban-korban for se hapus dosa.” Padahal tu persembahan-persembahan yang dorang da kase itu, itu iko tu atoran-atoran di kitab Taurat. 9 Kong Kristus lei da bilang, “Tuhan Allah! Lia jo, Kita datang for beking tu Tuhan Allah pe mau.” Deng bagitu, Dia so nyanda pake lei tu atoran-atoran dari perjanjian yang pertama, Dia pake tu perjanjian yang baru. 10 So lantaran Tuhan Allah pe mau itu no kong torang jadi kudus lewat Yesus Kristus yang so kase Dia pe diri jadi korban persembahan satu kali for slama-lamanya.
11 Tiap hari, tu orang Yahudi pe imam-imam badiri for beking tu dorang pe karja, dorang ulang-ulang ja kase korban persembahan pa Tuhan Allah. Mar tu korban persembahan itu sama skali nyanda beking manusia pe dosa dapa ampung. 12 Mar Kristus, Dia cuma satu kali srahkan tu Dia pe diri jadi korban persembahan for se hapus tu manusia pe dosa, kong itu for slama-lamanya. Abis Dia jadi korban persembahan, Dia dudu di tampa yang terhormat, di sabla kanan pa Tuhan Allah. 13 Kong skarang Kristus batunggu tu waktu for Tuhan Allah taru Kristus pe musu-musu di bawa pa Kristus pe kaki. 14 Soalnya deng Dia pe korban persembahan yang satu kali itu, Dia so beking jadi sempurna for slama-lamanya tu orang-orang yang Dia da beking jadi kudus.
15 Kong Roh Kudus kase kesaksian tentang itu pa torang,
16 “Tuhan Allah bilang bagini,
‘Di hari-hari yang nanti mo datang,
Kita mo beking perjanjian yang baru deng dorang.
Kita mo taru tu Kita pe atoran-atoran pa dorang pe hati,
Kita mo tulis itu pa dorang pe pikiran.’ ”
17 Kong Tuhan Allah bilang lei,
“Kita so nyanda mo inga-inga lei tu dorang pe dosa-dosa,
deng tu jaha yang dorang ja beking.”
18 Jadi kalu Tuhan Allah so se ampung tu torang pe dosa-dosa deng tu jaha yang torang ja beking, itu de pe arti so nyanda perlu lei mo kase korban persembahan for se hapus dosa.
Tetap batahang percaya pa Tuhan biar dapa siksa
19 Sudara-sudara, Yesus pe dara so tacura for se hapus tu torang pe dosa-dosa, so itu torang so bole deng brani mangada pa Tuhan Allah, itu sama deng torang bole deng brani mo maso pa Tuhan Allah pe Ruang Mahasuci. 20 Waktu Yesus srahkan Dia pe diri for mati, Dia buka jalang yang baru supaya torang dapa tu hidop kekal kong bole mangada langsung pa Tuhan Allah, itu bole mo se sama deng Dia da rabe tu kaeng pampele basar yang dulu da pele tu Ruang Mahasuci. 21 Yesus itu torang pe Imam Basar tu Prantara hubungan antara Tuhan Allah deng manusia, Dia yang bapimpin pa torang tu Tuhan Allah pe ruma. 22 So itu, mari jo torang badekat pa Tuhan Allah. Torang badekat pa Dia deng hati yang sunggu-sunggu deng lei torang pe percaya butul-butul pa Dia. Dia so se hapus tu jaha yang ada pa torang pe hati, itu sama deng torang pe hati so dapa pancar deng dara for beking jadi suci, kong sama lei deng torang pe badan so dapa cuci deng aer for beking bersi. 23 Mari jo torang tetap batahang pa torang pe percaya pa Yesus yang torang so akui itu, so Dia no tu torang bole mo baharap akang. Soalnya Tuhan Allah itu setia, Dia pasti beking tu Dia so janji pa torang. 24 Mari jo torang baku tarukira deng baku kase smangat for basayang pa orang-orang deng bole beking tu hal-hal yang bae. 25 Ada tu bebrapa orang yang brenti pi bakumpul sama-sama for baibada, torang jang sama deng dorang itu. Torang musti tetap ja bakumpul sama-sama for baku se kuat tu torang pe percaya, lebe-lebe lei lantaran torang tau kalu tu waktu for Tuhan mo datang ulang so lebe dekat.
26 Soalnya kalu torang so trima tu brita yang butul dari Tuhan, kong abis itu torang masi tetap sengaja ja babeking dosa, nanti so nyanda ada lei korban persembahan yang mo kase for hapus tu torang pe dosa. 27 Kalu torang pe kalakuan sama deng itu, torang kurang mo tunggu-tunggu Tuhan Allah pe penghakiman yang pe dapa tako, deng tu api pe basar yang bamanyala-manyala yang mo se angus tu orang-orang yang malawang pa Dia. 28 Dulu sapa jo yang tolak tu atoran-atoran di kitab Taurat yang Musa da tulis, asal ada dua ato tiga orang yang basaksi tentang itu, tu orang itu mo dapa hukuman mati, nyanda ada ampung for dia. 29 Kalu tu orang yang tolak tu atoran-atoran itu dapa hukuman brat, no ngoni pikir jo, pasti katu lebe brat lei tu hukuman yang mo kase pa orang yang beking ini: yang pandang enteng pa Yesus tu Anak Allah, itu sama deng dia injang-injang tu Anak Allah, deng lei yang anggap nyanda berharga tu Yesus pe dara yang da beking sah tu perjanjian yang baru antara Tuhan Allah deng manusia, tu dara yang beking torang jadi kudus di muka pa Tuhan Allah, kong lei yang hina pa Tuhan Allah pe Roh yang ja se tunjung tu Dia pe sayang pa torang. 30 Soalnya torang so kanal pa Tuhan Allah yang da babilang,
“Kita ini yang mo babalas tu jaha yang orang da beking,
deng Kita ini yang mo bahukum.”
Kong Dia bilang lei,
“Tuhan yang mo adili tu Dia pe orang-orang.”
31 Pe dapa tako skali kalu sampe torang dapa hukum dari Tuhan Allah Yang Hidop.
32 Ngoni musti inga tu waktu ngoni baru jadi percaya, waktu itu ngoni baru trima tu trang, kong ngoni banya mendrita lantaran ngoni pe percaya, mar biar lei ngoni mendrita, ngoni tetap batahang percaya. 33 Ada dari pa ngoni yang dapa hina deng dapa siksa di muka umum, kong ada yang dari pa ngoni tu da babantu tu tamang-tamang yang da dapa siksa sama deng tu ngoni lei da dapa. 34 Ngoni rasa kasiang kong bantu tu orang-orang yang da dapa maso bui lantaran iko pa Yesus Kristus. Kong waktu orang rampas tu ngoni pe harta, ngoni trima itu deng snang hati lantaran ngoni tau kalu ngoni nanti mo dapa harta yang lebe bagus dari Tuhan, tu harta yang mo batahang for slama-lamanya.
35 Jadi sudara-sudara, ngoni jang se lapas tu ngoni pe percaya yang kuat itu. Soalnya kalu ngoni tetap kuat percaya, ngoni mo dapa upah yang basar dari pa Tuhan. 36 So itu ngoni musti tetap batahang percaya biar dapa siksa, supaya kalu ngoni so beking tu Tuhan Allah pe mau, ngoni bole mo trima apa tu Tuhan Allah so janji mo kase. 37 Soalnya di Kitab Suci da tulis tu Tuhan Allah da bilang bagini,
“So nyanda lama lei,
tu Dia yang mo datang itu so mo datang,
Dia so nyanda mo tunda-tunda lei mo datang.
38 Mar tu Kita pe orang-orang yang ja beking tu butul,
dorang hidop cuma bagantong pa dorang pe percaya pa Kita.
Cuma kalu ada dari pa dorang yang so nimau lei percaya,
Kita so nyanda snang deng dorang itu.”
39 Mar torang ini sudara-sudara, torang ini bukang tu orang-orang yang nimau percaya deng tu mo binasa itu, mar torang ini tu orang-orang yang percaya deng yang dapa slamat.