Yakobus
Yakobus pe surat for orang percaya
Kata Pengantar
Ni kitab ini Yakobus yang da tulis. Yakobus ini pemimpin basar dari tu orang-orang yang percaya Yesus Kristus di kota Yerusalem (Kis. 21:18; Gal. 2:9), deng dia lei sudara dari Yesus Kristus (Mat. 13:55). Ni kitab de pe model surat, kong da tulis for sudara-sudara dari dua blas suku Israel yang so percaya pa Yesus Kristus tu da pi merantau ka sluru dunia (Yak. 1:1).
Tu maksut dari surat ini mo se nasehat pa orang-orang percaya supaya dorang brusaha beking tu kalakuan yang bae. Dia tulis macam-macam nasehat rupa ini: nimbole se beda-beda orang, orang yang badengar tu Tuhan pe firman musti beking tu firman, deng dia lei bilang musti babicara bae-bae nimbole bicara jaha ato beking saki hati. Dia pe surat ini memang de pe isi bukang Kabar Bae tentang Yesus mar tentang nasehat for tu orang-orang yang so percaya tu Kabar Bae itu. Dia suka mo bilang deng tegas kalu tu orang yang so percaya pa Yesus, tu orang itu musti se tunjung tu dia pe percaya itu lewat de pe kalakuan yang bae deng butul, bukang cuma lewat dia pe kata-kata yang bilang kalu dia percaya. Dia lei se smangat tu orang-orang yang percaya yang mendrita lantaran da mangada macam-macam cobaan (Yak. 1:2-18).