1 Petrus
Petrus pe surat yang pertama for orang percaya
Kata Pengantar
Ni kitab 1 Petrus ini Petrus tu da tulis. Petrus ini satu dari Yesus pe dua blas murit, dia ini Yesus pe rasul tu Yesus pe utusan. Kitab ini de pe model surat, kong Petrus da tulis ni surat for tu orang-orang pendatang yang da tinggal di tenga-tenga orang-orang: Pontus, Galatia, Kapadokia, Asia, deng Bitinia (1Ptr. 1:1).
Tu orang-orang percaya itu samantara da mangada tu siksa lantaran dorang pe percaya pa Yesus. Ada bebrapa dari pa dorang yang dapa fitna ja beking tu jaha deng dapa hina (1Ptr. 2:11-12, 3:16, 4:4). Ada dari pa dorang yang budak kong dapa siksa dari tu dong pe tuang (1Ptr. 2:18-20). Ada lei dari pa dorang tu parampuang yang percaya tu da kaweng deng laki yang blum percaya. Dorang musti bae-bae pa dong pe laki supaya dorang pe laki lei bole jadi percaya (1Ptr. 3:1, 6). So itu Petrus kirim ni surat pa dorang for se kuat tu dorang pe iman supaya dorang bole batahang percaya biar dapa siksa. Petrus bilang kalu dorang musti snang biar lei skarang ini dorang sedi lantaran dapa macam-macam siksa lantaran tu siksa itu se bukti kalu dorang itu butul-butul percaya pa Tuhan Yesus (1Ptr. 1:6-7, 4:12). Petrus se inga pa dorang tentang Yesus Kristus, bagimana Yesus Kristus mati mar da hidop ulang deng so bajanji mo datang ulang. Petrus se tau pa dorang bagimana tu Kristus pe keadaan da mendrita di bumi (1Ptr. 2:21-24). So itu, dia se nasehat supaya dorang snang kalu dorang mendrita lantaran dorang percaya pa Yesus, lantaran dorang so rasa tu pendritaan sama deng Kristus (1Ptr. 4:13). Kong kalu ada orang yang dapa siksa lantaran itu Tuhan pe mau, dia itu musti srahkan de pe diri pa Tuhan deng lei ja beking tu bae (1Ptr. 4:19). Banya tu Petrus da bilang pa dorang for se kuat tu dong pe hati supaya bole tetap baharap cuma pa Tuhan, supaya dorang pe kalakuan bagus deng tetap batahang mangada tu siksa. Dia se nasehat pa dorang supaya dorang hidop baku-baku sayang, dengar-dengaran pa orang yang berkuasa. Dia lei se nasehat for laki deng bini supaya dorang ja baku hargai satu deng laeng (1Ptr. 3:1-7).