2 Petrus
Petrus pe surat yang kadua for orang percaya
Kata Pengantar
Ni kitab 2 Petrus ini, Petrus yang da tulis. Kitab ini de pe model surat, kong ini surat kadua yang Petrus da kirim for orang-orang percaya dari macam-macam golongan tu kemungkinan basar bukang orang dari bangsa Yahudi (2Ptr. 1:1). Nyanda jelas di mana dorang pe tampa tinggal, mungkin di propinsi Asia sama deng tu surat Petrus yang pertama (2Ptr. 3:1).
Petrus pe maksut di surat ini, dia mo malawang tu guru-guru palsu pe ajaran. Tu guru-guru palsu itu ajar tu dorang pe atoran-atoran sandiri. Antara laeng, dorang bilang kalu Tuhan so se tunjung tu Dia pe sayang pa torang sampe torang bole slamat, jadi skarang torang ini bole hidop iko tu torang pe nafsu sandiri lantaran biar torang beking bagimana, Tuhan pe sayang itu tetap ada pa torang. Jadi Petrus malawang tu dorang pe ajaran itu. Petrus kase ajar kalu tu ajaran yang butul itu no yang orang-orang da lia deng da dengar sandiri langsung dari pa Yesus, kong dorang se tau itu pa orang-orang laeng supaya tau yang butul. Dia se inga lei pa dorang supaya dorang hati-hati deng tu guru-guru palsu. Tu guru-guru palsu itu gila doi, so itu tu guru-guru itu se cirita tu cirita for mo tipu pa orang-orang supaya bole dapa untung (2Ptr. 2:3). Tuhan mo hukum se binasa pa guru-guru itu (2Ptr. 2:1-22). Tu guru-guru palsu itu bilang kalu Tuhan Yesus nyanda perna mo datang for kadua kali (2Ptr. 3:4). Petrus bilang kalu Tuhan itu bukang talalu lama mo beking tu Dia pe janji for Kristus mo datang ulang, mar Tuhan itu sabar. Dia suka samua orang ada waktu for mo bertobat lantaran Dia nimau ada yang mo binasa biar lei cuma satu orang (2Ptr. 3:9). Nyanda ada yang tau kapan Tuhan Yesus mo datang, mar Dia pasti mo datang.