2 Petrus
Petrus pe surat yang kadua for orang percaya
Petrus pe salam
1
1 Ni surat dari kita, Simon Petrus. Kita ini orang yang ja beking tu Yesus Kristus da suru, deng kita ini Kristus Yesus pe rasul tu Dia pe utusan.Surat ini for ngonia tu orang-orang yang sama-sama deng torang tu so percaya pa Yesus Kristus. Yesus Kristus, Dia itu Tuhan Allah deng Dia lei tu Juruslamat yang se slamat pa torang dari hukuman dosa. Dia yang beking ngoni jadi percaya sama deng torang lantaran Dia itu ja beking tu adil.
2 Kita minta supaya Tuhan se tunjung tu Dia pe bae deng beking ngoni hidop deng hati tenang, kong samua itu Dia kase pa ngoni deng talebe-lebe. Ngoni mo trima samua itu lantaran ngoni kanal pa Tuhan Allah deng pa Tuhan Yesus.
Tuhan da pili deng pangge pa torang for iko pa Dia
3 Tuhan pake Dia pe kuasa for kase pa torang samua hal yang torang perlu supaya torang bole hidop iko Dia pe mau. Tuhan da kase samua itu lantaran torang so kanal pa Dia. Tuhan yang da pangge pa torang for iko pa Dia lantaran Dia itu pangbae deng luar biasa. 4 Kong lantaran Dia pe pangbae deng luar biasa itu, Dia kase pa torang samua janji yang bagus skali deng berharga. Tu janji-janji itu Tuhan kase supaya torang bebas dari tu nafsu yang besae tu beking rusak pa manusia, kong torang pe sifat bole mo jadi sama deng Tuhan pe sifat.
5 So lantaran samua yang Tuhan da beking itu, torang yang so percaya jang cuma percaya, mar torang musti brusaha sunggu-sunggu hidop deng kalakuan yang pe bagus skali. Kong kalu torang so hidop deng kalakuan yang pe bagus skali, torang lei musti tau mana tu bae deng mana tu jaha. 6 Kong kalu torang so tau mana tu bae deng mana tu jaha, torang lei musti kuasai torang pe diri. Trus kalu torang so kuasai torang pe diri, torang lei musti batahang percaya pa Tuhan biar dapa siksa. Kong kalu torang so batahang percaya pa Tuhan, torang lei musti hidop ja iko Tuhan Allah pe mau. 7 Trus kalu torang so hidop ja iko Tuhan Allah pe mau, torang lei musti sayang pa torang pe sudara-sudara yang percaya. Kong kalu torang so sayang pa torang pe sudara-sudara yang percaya, torang lei musti sayang pa samua orang. 8 Soalnya kalu ngoni hidop ja beking tu samua hal itu deng tamba trus ja beking itu, samua itu mo bantu pa ngoni yang so kanal pa Yesus Kristus tu torang pe Tuhan supaya ngoni bole berhasil hidop beking tu Dia pe mau. 9 Mar tu orang-orang yang nyanda ja beking tu samua hal-hal itu, dorang pe cara bapikir pende, dorang itu sama jo deng orang buta. Dorang lupa kalu Tuhan so se ampung dong pe dosa-dosa yang dorang da beking dulu.
10 Jadi kita pe sudara-sudara yang percaya, ngoni musti brusaha butul-butul beking tu samua yang kita da bilang itu. Deng ngoni beking itu, ngoni se tunjung kalu ngoni memang butul-butul Tuhan da pili deng da pangge for iko pa Dia. Soalnya deng ngoni hidop bagitu, ngoni nyanda mo se tinggal tu ngoni pe percaya, sama deng ngoni nyanda perna mo tasontong di batu kong jatung. 11 Kalu ngoni beking samua hal itu, Tuhan Allah mo trima pa ngoni deng snang hati waktu ngoni maso pa Yesus Kristus pe krajaan, kong tu krajaan itu mo ada for slama-lamanya. Yesus Kristus itu torang pe Tuhan deng torang pe Juruslamat.
12 So itu kita mo se inga trus pa ngoni tentang tu samua hal itu yang ngoni musti beking, biar ngoni so tau tu samua hal itu deng lei biar ngoni so iko tu ajaran yang butul yang ngoni so trima itu. 13 Kong slama kita masi hidop, kita rasa itu kita pe kewajiban for se inga-inga trus pa ngoni tentang tu samua hal itu. 14 Soalnya kita tau kalu so nyanda lama lei kita mo mati, lantaran Yesus Kristus tu torang pe Tuhan so kase tau itu pa kita. 15 So itu kita mo brusaha for se inga pa ngoni, supaya nanti kalu kita so mati, ngoni bole mo inga trus tu samua hal itu.
Yesus pe luar biasa yang Petrus da lia
16 Torang so kase tau pa ngoni tentang Yesus Kristus pe kuasa deng tentang Dia lei mo datang ulang ka dunia. Kong tu torang da kase tau itu bukang da iko tu cirita-cirita dongeng yang orang-orang pande da beking, mar torang tu da lia deng tong pe mata kapala sandiri pa Yesus Kristus yang luar biasa itu. 17-18 Soalnya perna satu kali, torang da nae sama-sama deng Yesus ka atas satu gunung, tu gunung yang kudus itu. Kong di situ deng torang pe talinga sandiri, torang da dengar suara dari Tuhan Allah tu Bapa yang luar biasa da hormat deng puji pa Yesus. Tuhan Allah bilang bagini, “Ini tu Kita pe Anak, Kita sayang pa Dia. Dia beking Kita pe hati snang.”
19 Tu suara yang torang da dengar itu beking torang lebe percaya apa tu nabi-nabi dulu da bilang tentang Kristus. Kong tu dorang da bilang itu bole mo se tunjung tu jalang yang butul, sama deng lampu yang bacahaya di tampa glap. So itu, lebe bae ngoni tarukira jo tu nabi-nabi da bilang itu sampe tu hari Kristus datang ulang, kong ngoni bole kanal pa Dia pa ngoni pe hati. Kristus mo datang ulang itu sama deng bintang timur yang muncul amper siang kong tu hari so mo trang.
20 Ini yang penting tu ngoni musti tau: Di Kitab Suci, tu nabi-nabi dulu da tulis apa tu Tuhan da suru dorang kase tau pa orang-orang, dorang tulis itu nyanda iko dong pe pikiran sandiri. 21 Soalnya tu pesan yang Tuhan da se tau pa tu nabi-nabi itu, itu nyanda iko manusia pe mau, mar tu Roh Kudus da kuasai pa nabi-nabi trus dorang da se tau tu Tuhan Allah pe pesan for orang-orang.