1 Yohanes
Yohanes pe surat yang pertama for orang percaya
Kata Pengantar
Ni kitab 1 Yohanes ini Yohanes yang da tulis. Yohanes nyanda tulis de pe nama di kitab ini, mar lantaran banya persamaan deng Injil Yohanes, so jelas kalu Yohanes tu da tulis ni kitab. Yohanes ini tu satu dari Yesus pe murit. Kitab ini de pe model surat, kong Yohanes da tulis for samua orang percaya di daera Asia kacil di negara Turki skarang.
Yohanes tulis ni surat pa orang-orang percaya supaya dorang jang iko tu ajaran sesat yang guru-guru palsu da se ajar. Tu guru-guru palsu itu se ajar kalu Yesus itu nyanda perna datang sbagai manusia mar waktu itu Dia cuma datang sbagai roh, jadi tu pikiran macam itu beking tu orang-orang percaya Yesus itu jadi bingo. Dorang se ajar kalu beking tu hal-hal jaha itu nyanda apa-apa lantaran cuma tu badan tu jadi jaha. Jadi ni surat da tulis for malawang tu ajaran dari guru-guru palsu itu, so itu Yohanes kase tau tentang ajaran yang butul kalu Yesus itu butul-butul so perna hidop sbagai manusia. Yohanes tulis supaya orang-orang jang sayang tu hal-hal yang ada di dunia ini, mar supaya sayang yang Kristus suru torang mo sayang. Dia lei se inga kalu orang percaya mo dapa tu hidop kekal lewat percaya pa Yesus, so itu dorang musti se kuat tu hati for iko pa Tuhan (1Yoh. 5:13), deng orang percaya musti brenti beking dosa deng iko tu Tuhan pe prenta for baku-baku sayang.