2 Yohanes
Yohanes pe surat yang kadua for orang percaya
Kata pengantar
Ni Kitab 2 Yohanes ini, Yohanes tu da tulis. Yohanes nyanda tulis de pe nama di kitab ini, mar lantaran banya persamaan deng Injil Yohanes deng lei 1 deng 3 Yohanes, so jelas kalu Yohanes tu da tulis ni kitab. Yohanes ini tu satu dari Yesus pe murit. Kitab ini de pe model surat, kong Yohanes da tulis ni surat for satu ibu yang Tuhan Allah so pili deng for tu ibu pe anak-anak (2Yoh. 1). Menurut kebanyakan ahli Alkitab, tu ibu itu de pe arti for tu pemimpin jemaat, kong tu anak-anak itu de pe arti tu orang-orang percaya di jemaat itu. Jadi Yohanes da tulis ni surat for orang-orang percaya di bebrapa jemaat di daera Asia Kecil (Asia Kacil ini di negara Turki).
Yohanes pe maksut deng surat ini for se smangat pa orang-orang percaya supaya baku-baku sayang (2Yoh. 6), deng lei supaya dorang hati-hati deng tu guru-guru palsu pe ajaran. Kalu umpama orang bilang Yesus nyanda perna datang sbagai manusia, dia itu sama deng tu antiKristus tu orang-orang yang ja beking sesat tu orang percaya. Yohanes lei se inga kalu orang yang nyanda iko tu Kristus pe ajaran, dia itu nyanda ada hubungan deng Tuhan Allah (2Yoh. 7, 9).