Melkisedek lebe penting dari Abraham
7
1 Tu Melkisedek, dulu dia itu raja Salem, dia lei imam dari Tuhan Allah Yang Mahatinggi, imam itu prantara hubungan manusia deng Tuhan Allah. Waktu Abraham pulang dari prang da se kala tu raja-raja, Melkisedek yang datang sambut pa Abraham kong minta akang berkat dari Tuhan Allah for Abraham. 2 Waktu itu, Abraham kase pa Melkisedek spulu persen dari samua tu dia da rampas waktu prang. Tu nama Melkisedek, de pe arti ‘raja tu ja beking yang butul’. Kong dia lei orang ja pangge ‘raja Salem’, tu de pe arti ‘raja damai’. 3 Tu Melkisedek itu, nyanda ada yang tau sapa tu de pe papa deng mama, deng nyanda ada yang tau tu de pe nene moyang. Nyanda ada lei yang tau tempo apa dia da lahir deng tempo apa dia da mati. Jadi dia itu sama deng tu Anak Allah, dia tetap jadi imam for slama-lamanya.4 Ngoni tarukira jo bae-bae, tu Melkisedek itu orang yang penting, sampe tu torang pe nene moyang Abraham da kase pa dia spulu persen dari samua yang dia da rampas waktu prang. 5 Kalu iko tu atoran yang ada di kitab Taurat, tu orang-orang dari keturunan Lewi yang so jadi imam-imam, dorang itu dapa tugas for kumpul tu spulu persen pendapatan dari tu dorang pe sudara-sudara tu orang-orang Yahudi, biar lei dorang deng tu sudara-sudara itu sama-sama Abraham pe keturunan. 6 Mar Melkisedek itu bukang dari keturunan Lewi, cuma biar lei bagitu Abraham tetap da kase pa dia tu spulu persen dari tu Abraham pe hasil yang da rampas waktu baprang. Kong lei Melkisedek da minta akang berkat dari Tuhan for Abraham, padahal sebenarnya Abraham itu orang yang Tuhan so kase akang janji. 7 Torang tau pasti kalu orang yang baminta berkat dari Tuhan for kase pa orang laeng, dia itu lebe penting dari tu orang yang dia da minta akang berkat dari pa Tuhan.
8 Tu imam-imam dari Lewi pe keturunan, dorang itu trima spulu persen for dorang pe hidop, mar dorang itu cuma manusia biasa yang nanti mo mati. Tu Melkisedek, dia lei trima spulu persen dari Abraham, cuma nyanda tulis di Kitab Suci kalu dia da mati, jadi ada kesaksian kalu dia da hidop trus. 9 Dulu cuma tu keturunan Lewi yang ja trima spulu persen for dorang pe hidop. Mar waktu Abraham tu torang pe nene moyang da kase spulu persen pa Melkisedek, itu torang bole bilang kalu tu keturunan Lewi so sama jo deng perna da kase spulu persen pa Melkisedek lewat Abraham. 10 Soalnya biar lei tu Lewi blum lahir waktu jaman Melkisedek, dia masi jadi satu bagean deng de pe nene moyang tu Abraham. Jadi waktu Abraham baku dapa deng Melkisedek kong kase tu spulu persen, itu sama jo deng Lewi deng lei dia pe keturunan tu imam-imam so sama-sama deng Abraham.
Yesus itu Imam Basar yang paling tinggi
11 Dulu Tuhan kase tu Dia pe atoran-atoran di kitab Taurat pa orang-orang Yahudi, kong Dia pili tu Lewi pe keturunan for jadi imam-imam tu ja kase korban persembahan. Tu imam-imam itu bole urus samua iko tu atoran-atoran, mar tu dorang da beking itu nyanda beking tu orang-orang Yahudi itu jadi sempurna di muka pa Tuhan. So lantaran itu no kong kiapa sampe musti muncul imam yang laeng. Tu imam yang muncul itu nyanda sama rupa imam Harun tu Lewi pe keturunan, mar tu imam yang muncul itu sama rupa tu Melkisedek. 12 Soalnya kalu imam dari Lewi pe keturunan da ganti deng imam yang laeng, tu atoran-atoran di kitab Taurat tantu lei mo dapa ganti. 13 Tu Imam yang skarang torang samantara da bilang-bilang itu, Dia itu bukang dari suku Lewi, Dia dari suku laeng, kong nyanda ada dari Dia pe suku itu yang perna da karja di tampa ja kase korban persembahan pa Tuhan. 14 Soalnya samua orang tau kalu torang pe Tuhan dari keturunan suku Yehuda, kong Musa nyanda perna bilang kalu Yehuda pe keturunan bole dapa pili jadi imam.
15 Kong tentang ada imam yang bukang dari keturunan Lewi, ini lebe jelas lei lantaran ada satu Imam laeng tu da muncul yang sama rupa tu Melkisedek. 16 Tu Imam yang da muncul itu, so Dia no tu Yesus. Dari tu atoran-atoran yang ada di kitab Taurat, torang bole tau kalu tu imam-imam itu musti dari Lewi pe keturunan. Yesus da jadi Imam bukang lantaran Lewi pe keturunan, mar Dia jadi Imam lantaran pa Dia ada kuasa yang beking Dia hidop for slama-lamanya. 17 Soalnya di Kitab Suci da tulis tentang Dia bagini,
“Ngana itu Imam for slama-lamanya,
sama deng dulu tu Melkisedek da jadi imam.”
18 Tuhan bilang bagitu lantaran tu atoran-atoran di kitab Taurat dulu tentang tu imam-imam so nyanda pake lei, lantaran tu atoran itu so nyanda ada lei kuasa deng so nyanda ada lei de pe guna. 19 Soalnya tu atoran-atoran di kitab Taurat, itu sama skali nyanda beking sesuatu jadi sempurna di muka pa Tuhan Allah. Mar skarang torang so ada harapan yang lebe bae, torang bole baharap deng yakin pa Yesus supaya torang bole badekat pa Tuhan Allah.
20 Dulu waktu Tuhan Allah angka pa tu Lewi pe keturunan for jadi imam, Dia nyanda angka pa dorang deng sumpa. Mar waktu Tuhan Allah angka pa Yesus jadi Imam, Dia angka pa Yesus deng sumpa. 21 Waktu Tuhan Allah angka pa Yesus jadi Imam, Dia basumpa bagini,
“Kita ini Tuhan Allah! Kita basumpa kong Kita nyanda perna mo roba apa tu Kita mo bilang ini,
‘Ngana itu Imam for slama-lamanya.’ ”
22 Jadi deng Tuhan Allah pe sumpa itu, torang bole tau kalu Yesus jadi jaminan dari perjanjian yang baru tu jao lebe bagus dari tu perjanjian yang pertama.
23 Dulu tu imam-imam itu pe banya lantaran kalu dari pa dorang ada yang mati, musti ada laeng yang ganti pa imam yang so mati itu. 24 Mar Yesus, Dia itu slama-lamanya mo pegang tu Dia pe jabatan sbagai Imam, lantaran Dia itu hidop for slama-lamanya. 25 So lantaran itu, Dia lei mampu butul-butul se slamat tu orang-orang dari hukuman dosa. Dia se slamat pa tu orang-orang yang badekat pa Tuhan Allah lewat Dia. Soalnya, Dia itu hidop for slama-lamanya supaya Dia bole slalu ja basombayang akang torang pa Tuhan Allah.
26 Soalnya Yesus itu, tu Imam Basar yang torang perlu. Dia itu kudus, Dia nyanda beking sala sama skali, Dia itu nyanda perna beking dosa. Tuhan Allah se pisa pa Dia dari tu orang-orang berdosa, deng Tuhan Allah da angka pa Dia ka tingkat yang lebe tinggi dari tu tingkat-tingkat di sorga. 27 Dia itu nyanda sama deng tu imam-imam basar yang laeng. Dorang tiap hari musti kase korban persembahan for hapus dorang pe dosa-dosa sandiri, kong baru abis itu dorang kase korban persembahan for hapus dong pe orang-orang pe dosa-dosa. Mar Yesus, Dia kase korban persembahan pa Tuhan Allah for hapus samua manusia pe dosa, kong Dia pe korban persembahan itu cuma satu kali Dia da kase, mar Dia pe korban persembahan itu for slama-lamanya. 28 Soalnya kalu iko tu atoran-atoran di kitab Taurat, tu orang-orang yang da dapa angka jadi imam basar, dorang itu cuma manusia biasa yang ada kelemahan. Mar abis Tuhan Allah kase tu atoran-atoran di kitab Taurat, Dia beking perjanjian yang baru yang Dia da kase deng sumpa. Pa Dia pe perjanjian yang baru itu, Dia da angka tu Dia pe Anak sandiri for jadi Imam Basar yang sempurna for slama-lamanya.