6
1 So itu, mari jo torang se tinggal tu ajaran-ajaran yang dasar for tu orang yang baru percaya pa Kristus, kong lanjut deng tu ajaran yang lebe dalam lei supaya torang pe percaya pa Kristus bole jadi dewasa. Torang jang cuma ja ulang-ulang tu ajaran dasar rupa tu ajaran tentang bertobat dari tu kalakuan yang memang nyanda ada de pe guna, ajaran dasar bagimana percaya pa Tuhan Allah, 2 ajaran tentang baptisan, ajaran tentang taru tangan di atas pa orang, ajaran tentang orang yang so mati nanti mo hidop ulang deng ajaran tentang tu orang yang mo dapa tu hukuman kekal. 3 Jadi kalu Tuhan Allah kase isin pa torang, torang mo lanjut deng tu ajaran-ajaran yang lebe dalam.4 Soalnya tu orang-orang yang so nimau lei percaya pa Kristus, nyanda mungkin lei dorang itu mo dapa pimpin for bertobat dari tu kalakuan yang memang nyanda ada de pe guna, lantaran kwa dulu dorang itu so perna hidop di trang kong so rasa tu Tuhan pe berkat-berkat pa dorang pe hidop, deng dorang so trima tu bagean dari Roh Kudus. 5 Dorang so perna tau kalu Tuhan Allah pe firman itu bagus, deng dorang lei so rasa tu Tuhan pe kuasa, tu kuasa yang nanti mo ada di dunia yang baru. 6 Kong biar dorang so rasa tu samua itu, kalu dorang se lapas tu dorang pe percaya pa Yesus, dorang so nyanda mungkin lei mo dapa pimpin for bertobat. Itu so kurang sama jo deng dorang da se salib for kadua kali tu Anak Allah deng hina pa Dia di muka umum.
7 Torang bole mo se sama deng tana, kalu tu tana slalu ja ujang akang, tu tana mo batumbu akang tanaman deng ada lei de pe hasil, kong itu de pe guna basar skali for tu orang yang da karja di tana itu yang mo ambe de pe hasil dari situ. Tu tana itu dapa berkat dari pa Tuhan Allah. 8 Mar kalu tu tana cuma da batumbu akang rumpu baduri deng batumbu akang kusu-kusu, tu tana itu nyanda ada de pe guna. Tu tana itu so mo dapa kutuk dari Tuhan, kong de pe laste mo dapa bakar.
9 Sudara-sudara yang kita sayang, biar lei torang bicara bagitu pa ngoni, torang yakin kalu ngoni nyanda sama deng tu tana yang da dapa kutuk itu, mar torang tau kalu ngoni dapa tu hal-hal yang lebe bae dari itu, tu hal-hal for tu orang-orang yang mo dapa slamat dari hukuman dosa. 10 Soalnya Tuhan Allah itu adil. Dia nyanda perna lupa deng tu bae yang ngoni da beking deng tu ngoni pe sayang pa Dia yang ngoni da se tunjung deng cara tolong pa Dia pe orang-orang, kong ngoni tetap ja beking samua itu sampe ni hari. 11 Kong torang suka kalu ngoni masing-masing tetap brusaha se tunjung tu ngoni pe smangat deng cara itu sampe hari kiamat, supaya ngoni trima tu ngoni da baharap deng yakin pa Tuhan Allah. 12 Deng ngoni smangat rupa itu, ngoni nyanda jadi malas mar ngoni mo hidop rupa tu orang-orang yang so trima tu janji lantaran dorang percaya deng da tunggu-tunggu deng sabar for mo dapa itu.
Tuhan pasti mo beking apa tu Dia da janji
13 Sudara-sudara, dulu Tuhan Allah da bajanji pa Abraham. Waktu itu, Tuhan Allah da basumpa demi De pe Nama sandiri, lantaran nyanda ada yang lebe hebat dari Dia. 14 Tuhan Allah da bajanji pa Abraham bagini, “Kita pasti mo kase akang berkat pa ngana deng Kita mo beking ngana pe keturunan jadi pe banya skali.” 15 Kong Abraham da batunggu-tunggu deng sabar tu Tuhan Allah pe janji itu mo jadi, kong deng bagitu dia lei da dapa tu Tuhan pe janji itu.
16 Soalnya manusia pe biasa, kalu dia basumpa, dia pasti basumpa demi nama yang lebe penting dari dia. Dia pe sumpa itu beking kuat tu dia pe kata-kata, supaya nyanda ada yang bole mo banta tu dia da bilang. 17 Bagitu lei waktu Tuhan Allah bilang tu Dia pe janji pa Abraham deng pa Abraham pe keturunan, Dia suka beking lebe kuat tu dorang pe hati supaya dorang tau kalu Dia pe janji nyanda perna mo bruba. So lantaran itu, Dia se kuat tu Dia pe janji itu deng cara basumpa. 18 Ada dua hal yang nyanda perna mo bruba: pertama tu Tuhan Allah pe janji, deng yang kadua tu Tuhan Allah pe sumpa. Soalnya Tuhan Allah nyanda perna badusta. Jadi lewat Tuhan Allah pe janji deng sumpa itu, torang pe hati jadi kuat. Deng bagitu, torang yang da pigi pa Dia for cari slamat, torang bole pegang kuat tu torang pe harapan for mo dapa tu Dia pe janji. 19 Tu torang pe harapan itu bole mo se sama deng jangkar yang da tatanang di dasar laut, kong torang pe harapan itu beking torang pe hati jadi tenang. So lantaran torang kuat baharap rupa itu, torang bole ada hubungan langsung deng Tuhan, kong itu so kurang sama jo deng torang so bole maso di Ruang Mahasuci yang da pele deng tu kaeng pampele basar. 20 Yesus so lebe dulu da maso di situ, Dia so buka jalang for torang bole maso ka situ. Yesus itu so jadi Imam Basar for slama-lamanya, sama deng dulu tu Melkisedek da jadi imam.