10
Ana Dosing Desipolo
(Marcos 3:13-19; Lukas 6:12-16)
1 Bina'no ni Jesus yo dosi niyang disipolo, ag tina'wan niya nin kapangyariyan na magpalayas nin mararaut na espirito ag magparaay nin nga'min na klase nin ilang ag kamatian. 2 Amo adi yo manga pangaran nyo dosing disipolo: Si Simon na piba'nong Pedro ag yo ipatngod niyang si Andres; yo mag-ipatngod man na Santiago ag Juan na manga agin ni Zebedeo; 3 si Felipe, si Bartolome, si Tomas, si Mateo na parasingil nin bowis, si Santiago na agin ni Alfeus, si Tadeus, 4 si Simon na makabayan, ag si Judas Iscariote na among nagtraydor ki Jesus.
Sinogo ni Jesus yo Dosi
(Marcos 6:7-13; Lukas 9:1-6)
5 Sinogo ni Jesus yo dosing disipolo ag pinagtogon nin bagadi: “Indi kamo magponta sa teritoriyo nyo manga Hentil, o sa arin man na banwaan nin Samaritano. 6 Imbes, ana pontaan ninyo yo manga Israelita sana, na baga manga nalalagalag na karniro. 7 Lomarga na kamo ag ipangadal ninyo sa sakanda na arani na ana paghahadi nin Dios. 8 Paraayun ninyo ana manga agko kamatian, bowayun ana manga guraan, paraayun ninyo ana manga pudpurun ag palayasun ana manga maraut na espirito. Inako ninyo ana kapangyariyan na adi na uda bayad, kaya ipaayag man ninyo ading uda man bayad. 9 Indi kamo magdara nin bolawan, pirak o tanso sa bolsa ninyo. 10 Indi man kamo magdara nin bag sa pag-agi ninyo, sasanglian na bado, tsinelas o sogkod. Ta ana trabaador kinakaipowan na soportaan nya sakanyang manga pangangaipo. 11 Ag pag-abot ninyo sa usad na banwaan o baryo, omanap kamo nin taong anda na magpadagos sainyo, adto kamo mag-istar miyentras na indi ninyo piba'yan ana logar na aan. 12 Pagkaluug ninyo sa baguy na aan, magtaong galang kamo, sabiyun ninyo, ‘Pagbendisiyonan logod nin Dios ana manga niistar sa baguy na adi!’ 13 Kin ana kagbaguy padagoson kamo, papagdanayun ninyo sa sakanda ana bendisiyon. Piro kin indi, bawiun ninyo yo sainyong sinabi. 14 Ag kin agko baguy o banwaan na indi omako o romungug nya manga pisabi ninyo, omalin kamo sa baguy o banwaan na aan, ag ipagpag ana alpog sa manga paa ninyo bilang sinyalis na uda na kamo sisimbagun sakanda. 15 Pisabi ko sainyo ana kaostowan, sa Aldaw nin Pag-oosgar mas mabu'gat na padosa ana maaako nya manga taong adi kisa sa manga tagaSodoma ag manga tagaGomora nyo o'nang panaon.”
Manga Kasakitan na Niaboton
(Marcos 13:9-13; Lukas 12:12-17)
16 “Magrungug kamo! Pisogo ko kamo na baga manga karniro sa bitnga nin manga lobo, kaya magpakadonong kamo arug nya manga agas, ag magin mabuut arug nya manga salampati. 17 Maglikay kamo, ta rarakupun nira kamo, dadaraun sa sakandang okoman, ag aampakun nira kamo sa sakandang manga baguy sambaan. 18 Dail sa pagsonod ninyo sa sa'kun dadaraun nira kamo sa manga gobernador ag sa manga Hadi, tanganing imbestigaan. Magigin oportonidad na ninyo adi tanganing magpatonay sa sakanda ag sa manga Hentil manunungud sa sa'kun. 19 Kin iatobang kamo sa osgado, indi kamo mag-a'dit kin ono ana isisimbag ninyo o kin papaono kamo magsimbag, ta ipapasabung sainyo kin ono ana tamang sasabiyun o gigibowun pag-abot nya oras na aan. 20 Ta ana manga sasabiyun ninyo buku alin sainyo kindi alin sa Espirito nya sainyong Ama na among nagisabiyun sa paagi ninyo.”
21 “Sa panaon na aan, tatraydoron nya ipatngod ana sakanyang ipatngod tanganing ipaguraan; bagaan man ana gigibowun nya ama sa agin niya. Ana manga agin nagitomangun sa manga gorang nira, ag ipapaguraan. 22 Ikakagasa kamo nya nga'min dail sa sa'kun, piro ana magpadagos na tapat anggan sa kapondowan, amo ana maliligtas. 23 Kin kamo pasakitan sa usad na banwaan, pomonta kamo sa ibang logar. Sa kaostowan pisabi ko sainyo, indi pa ninyo nalilibot ana bilog na Israel akong Agin nin Tao, nibalikun na.”
24 “Uda pitoroan na mas orog pa sa maestro niya, ag uda man oripun na mas orog pa sa among niya. 25 Kaya maogma na ana pitoroan na makaarug sa maestro niya, ag ana sorogoon sa among niya. Kin ako na namamayo sainyo, piba'no nirang Beelzebul a lalo nirang momodaun kamong manga nasasakupan ko!”
Ana Dapat Katakotan
26 “Kaya indi kamo matakot sa kiisay man, ta uda nasasaray na indi nabobolgar, ag uda ilum na indi naiisyan. 27 Onoman na pisabi ko sa sainyo sa dulum, kinakaipowan na sabiyun ninyo sa liwanag; ag kin ono ana ining-ing ko sainyo, iuyaw ninyo sa manga tao. 28 Indi kamo matakot sa manga tao na ana kaya sanang gura'nun ana lawas, piro ana kalag indi nira kayang gura'nun. Imbes, matakot kamo sa Dios. Ta agko iya kapangyariyan na gomuraan nin lawas ag mag-umut nin kalag sa impiyerno. 29 Bukung ana dowang rignus ipipabakal sa kantidad na usad na sintabo sana? Piro maski usad sa sakanda indi natitikrag sa raga kin bukung kamu'yan nya sainyong Ama. 30 Maski ana bowuk ninyo bilang niya. 31 Kaya di kamo matakot, ta mas makantidad kamo kisa ribo-ribong rignus.”
Ana Nagibisto ag Nagidiyar ki Jesu Cristo
32 Ana siisay man na nagibisto sa sa'kun na ako ana sakandang Kagorangnan sa atobangan nin manga tao, bibistowun ko man sa atobangan nya sa'kun na Ama sa langit. 33 Piro ana siisay man na magdiyar sa'kun sa atobangan nin manga tao, didiyaran ko man sa atobangan nya sa'kun na Ama na nasa langit.
Bukung Katoninungan kindi Sondang
34 “Indi ninyo pag-unaun na nagpadidi ako sa raga tanganing magdara nin katoninungan sa manga tao. Indi! Kindi nagpadidi ako tanganing magdara nin sondang, ag buku katoninungan. 35 Dail sa sa'kun, totomangun nya agin na lalaki ana sakanyang ama, ag totomangun man nya agin na babayi ana sakanyang ina. Arug man nyaan ana gigibowun nya manogang na babayi sa sakanyang panogangan na babayi. 36 Ana magigin karoro nya usad na tao, amo ana kapamilya niya mismo.”
37 “Ana siisay man na namumuya sa sakanyang ama o ina nin mas orog pa kisa sa sa'kun, indi iya naaangay na magin disipolo ko. Ag ana namumuya sa agin na lalaki o sa agin na babayi nin mas orog sa sa'kun, indi iya naaangay na magin disipolo ko. 38 Ana siisay man na indi nipa'san nya sakanyang kros ag nagisonod sa sa'kun, indi iya naaangay sa sa'kun. 39 Ana taong nima'wut na magligtas nya sakanyang boway among mauu'dan nyadi, piro ana taong muyang mag-atang nya sakanyang boway dail sa sa'kun among magkakaagko nin boway na uda kapondowan.”
Manga Primeyo
(Marcos 9:41)
40 “Ana siisay man na nagiako sainyo, nagiako man sa sa'kun, ag ana nagiako sa sa'kun, nagiako man sa nagsogo sa sa'kun. 41 Ana siisay man na nagiako sa usad na propita dail ta iya propita, tata'wan nin primeyo na para sa usad na propita. Ag ana nagiako nin usad na matanos na tao dail ta matanos adi, makakaresibi nin primeyo basi sa usad na matanos na tao. 42 Ag siisay man na magpainom dawa usad na basong tobig sa usad sa pinakaminos kong disipolo, dail ta disipolo ko adi, sigoradong tata'wan iya nin primeyo.”