6
Ana Kaongaan manunungud sa Aldaw nin Pagpadiskanso
(Mt. 12:1-8; Mc. 2:23-28)
1 Usad na Aldaw nin Pagpadiskanso lominiis sira si Jesus sa pitanuman nin manga trigo, yo sa kanyang manga parasonod nangutus nin bonga, ag piniri'pisi nira adi sa sakandang manga pagad saka kinaun nira yo luug. 2 Alagad sinabi nyo manga Pariseo, “Taynga ta ginibo ninyo ana ipinagibawal na gibwun sa Aldaw nin Pagpapadiskanso?” 3 Sinimbag sira ni Jesus, “Taynga di ninyo nabasa yo ginibo ni David kaso iya maponaw ag yo sa kanyang pag-iriba? 4 Lominuug iya sa baguy nin Dios kominoko iya nin tinapay na atang sa Dios. Ag kinaun niya adto ag tina'wan man niya yo sakanyang manga pag-iriba, dawa ngani sa kasogoan na yo manga saserdote sana yo agko podir na komaun nyadto.” 5 Ag sinabi pa ni Jesus sa sakanda, “Ana Aldaw nin Pagpadiskanso nasa kapangyariyan nya Agin nin tao.”
Ana Tawong Paralisado yo Usad na Kamut
(Mt. 12:9-14; Mc. 3:1-6)
6 Usad na naman na Aldaw nin Pagpapadiskanso si Jesus lominuug sa usad na sinanoga ag nangadal, adto agko usad na lalaki na paralisado yo toong kamut. 7 Adto agko nagkapirang manga Pariseo ag manga parapangadal nya kasogoan na nakabantay tanganing makaanap nin rason tomang ki Jesus, kaya pibantayan nira kin iya magparaay sa Aldaw nin Pagpapadiskanso. 8 Alagad isi ni Jesus kin ono yo sakandang manga piisip kaya sinabi niya sa lalaking paralisado yo toong kamut, “Mari tomindug ika didi sa o'naan.” Ag tominindug yo lalaki ag rominani. 9 Pagkatapos sinabi sa sakanda ni Jesus, “Oongaun ko daw kamo. Arin ana oyon sa kasogoan sa Aldaw nin Pagpapadiskanso; ana gomibo nin maraay o ana gomibo nin maraut? Magsalbar nin boway o gomuraan?" 10 Kinita ni Jesus yo nga'min na manga nakapalibot sa sakanya, ag sinabi niya adto sa lalaki, “Iunat mo ana saymong kamut.” Inunat man niya yo sakanyang kamut ag naraay na. 11 Alagad yo manga Pariseo ag yo manga parapangadal nya kasogoan grabi yo sa sakandang kaga'san ag nag-osip-osip sira kin ono yo maray nirang gibwun ki Jesus.
Nagpili' si Jesus nin Dosing Disipolos
(Mat. 10:1-4; Mc. 3:13-19)
12 Usad na aldaw na naman nagponta si Jesus sa tokad tanganing magpangadyi ag nagramrag iyang nakipag'osip sa Dios. 13 Kaso niipipita na bina'no ni Jesus yo sa kanyang manga parasonod ag nagpili' iya nin dosi sa sakanda tanganing maging manga apostolis niya. Amo adi yo sakandang manga pangaran: 14 Simon (na pinangaranan niyang Pedro), yo sa kanyang ipat'ngod na si Andres, sira Santiago, Juan, Felipe, Bartolome, 15 Mateo, Tomas, Santiago na agin ni Alfeo, Simon (na piba'nong makabayan); 16 si Judas na agin ni Santiago, ag si Judas Iscariote na naging traydor ki Jesus.
Nangadal ag Nagparaay si Jesus
(Mat. 4:23-25)
17 Pagkatapos bominongsod si Jesus kaiba yo dosing apostolis ag pominonta sira sa usad na logar na pantag. Aadto nakapalibot yo kadakul niyang manga parasonod ag marayray na manga tawo na nagi-alin pa sa bilog na Judea, ag Jerusalem ag alin man sa manga banwaan na nasa gilid nin dagat nyo Tiro ag Sidon. 18 Pominonta sira adto tanganing magrungug sa sakanya ag magparaay nyo sakandang manga kailangan. Yo manga pisaniban nin maraut na espirito pinaraay man niya. 19 Kaya yo nga'min na tawo nag-ingowa na maru'tan niya, ta iya agko kapangyariyan na magparaay sa nga'min.
Kaogmaan ag Kapu'ngowan
(Mat. 5:1-12)
20 Kinita ni Jesus yo sakanyang manga disipolos ag sinabi,
“Pinaorog kamong manga pobri,
ta para sainyo ana kaadi'an nin Dios.
21 Pinaorog kamong manga napoponaw ngowan,
ta kamo bobosogon.
Pinaorog kamo na nagiibi ngowan,
ta kamo paoogmaun.
22 Pinaorog kamo kin ikinagagasa' kamo nya manga tawo ag ipisobol, pimoda, ikinaooyam dail sa sainyong pagtood sa Agin nin Tawo. 23 Imbis mag-ogma kamo sa aldaw na aan ag mag-ondok sa kaogmaan, ta dakuu ana sa inyong primyo na niuwat sa langit. Ta kin ono ana gigibwun sainyo amo man adto yo ginibo nyo sakandang manga gorang sa manga propeta.
24 “Alagad kairak-irak kamo na manga mayayaman ngowan,
ta ana kaginawaan ninyo ngowan sana!
25 Kairak-irak kamo na pirming bosog ngowan,
ta pag-abot nya panaon kamo mapoponaw!
“Kairak-irak kamo na niparaoogma ngowan,
ta kamo magimunduun ag magiibiun.
26 “Kairak-irak kamo na manga piomaw nin manga tawo, ta amo man aan yo ginibo nyo manga ginikanan ninyo adto sa manga bukung ostong propeta.”
Mamu'yan yo manga Kalaban
(Mat. 5:38-48; 7:12a)
27 “Alagad pisabyan ko kamo na manga nirungug sa'kun: Mamu'yan ninyo ana sainyong manga kalaban, gibwan ninyo nin maraay ana manga nagagasa' sa inyo. 28 Bindisyonan ninyo ana manga nisompa sa inyo, ipangadyi ninyo ana manga nidaug-daug sa inyo. 29 Kin agko somampaling sa walang parti nya sainyong lalawgun, iatobang mo pa ana sa too. Kin agko niaguw nya sainyong alik'buy, itao mo pa pati ana sainyong bado. 30 Ta'wan mo ana siisay man na niayat saimo, ag kin agko komoko nya sainyong pagsorosadiri, di mo na pagbawiun. 31 Gibwun mo sa iba ana muya mong gibwun nira saimo.
32 “Kin ana mamu'yan mo yo manga namumuya sana saimo, ono man ana pakinabang mo nyaan? Maski ana manga mararaut namumuya man sa manga namumuya sa sakanda. 33 Ag kin ana gibwan mo sana nin maraay yo manga maraay sana saimo, ono man ana karayan nyaan saimo? Maski ana manga mararaut nigibo man nyaan. 34 Kin ana pasobliun mo yo manga tawong sa pagtaud mo sira makababayad saimo, ono man ana karaayan nyaan saimo? Maski ana mamaraut nipasobli man sa manga mamaraut, sa paglaom na adi makakabayad sa inotang sakanda. 35 Alagad mamu'yan ninyo ana sainyong manga kalaban, gibwan ninyo sira nin karaayan. Ag magpasobli kamo sa sakanda na indi nilaom nin ono man na kabalyo, tanganing makaako kamo nin dakuung primyo sa langit, ag magiging tonay kamo na manga agin nin Dios sa kalangitan. Ta iya maraay maski adto sa manga mararaut ag adto sa di tataong magta'naw nin otang na buut. 36 Maging mairakun kamo, arug nya sainyong Ama' na maiirakun.”
Pag-osga sa Kapwa
(Mt. 7:1-5)
37 “Di kamo magpara-osgar, tanganing di man kamo osgaran nin Dios. Di kamo magpadosa, tanganing di kamo padosaan nin Dios. Magpatawad kamo, tanganing kamo patawarun man nin Dios. 38 Magtao kamo tanganing ta'wan man kamo. Pariyong maray na sokol, dusdus, yinugyug ag nisu'pay pa ana itatao sa inyo. Ta yo ginamit ninyong pansokol sa iba, amo man ana gagamitun sa inyo.” 39 Si Jesus nagsabi pa sa sakanda sa paagi nin usad na parabola, “Pwidi daw na magin parakabit nin bota ana usad man na bota? Kin amo, pariyo sirang matitikrag sa kali. 40 Uda para adal na mas madonong sa sakanyang paratoro. Alagad kin iya matoroan nang maray magiging kapariyo na iya nyo sakanyang maestro.
41 “Taynga mo ta pipararisa ana mota' nya saimong ipat'ngod, alagad ana dakuung mota' sa sadiri mong mata di mo pirisa? 42 Paono mo masasabi sa saimong ipat'ngod, ‘Ipat'ngod togotan mo ako na alinun ana saimong mota',’ na indi mo ngani naririsa yo mota' sa saimong mata. Ika na parasagin-sagin, alinun mo nawna ana mota' sa saimong mata, tanganing mapiyaran mong maray ana pag-alin mo nyo mota' sa mata nyo saimong ipat'ngod.
Ana Kaoy Nabibisto sa Sakanyang Bonga
(Mt. 7:16-20; 12:33-35)
43 “Uda maray na kaoy na nibonga nin maraut, ag uda man maraut na kaoy na nibonga nin maray. 44 Ana lambang kaoy nabibisto sa klasi nya sakanyang bonga. Ta di makakagoro' nin igos sa poon nin aroma, a o obas adto sa katutuwukan. 45 Ana maray na tawo nakakagibo nin maray na bagay ta ana maray na bagay monaan sa sakanyang poso', ag ana maraut na tawo nigibo nin maraut ta ana maraut didiyan sa sakanyang poso'. Ana saimong manga sasabyun amo ana nagipabisto kin ono ana nasa sa saimong poso'.”
Ana Dowang Klasi nin Tawo na Nagtogrok nin Baguy
(Mt. 7:24-27)
46 “Ono kamo ta niba'no sa sa'kun nin ‘Kagorangnan,’ ‘Kagorangnan,’ alagad di man ninyo pigibo ana pisabi ko? 47 Itotoro ko sainyo kin kiisay nakakaarug ana lambang nirani sa sa'kun, tanganing magrungug ag somonod pa nyo sa'kun na manga pisabi. 48 Iya arug sa usad na tawo na nagtogrok nin baguy, nagkali nin ararum ag itinogrok yo pondasyon sa bato. Kaso ominabot yo ba'a, rinapas nin mak'sug na tobig yo baguy alagad di man basang naraut, ta matibay yo pagkatogrok nyadto. 49 Alagad yo nagirungug nyo sa'kun na manga sasabyun piro indi nigibo nyadto nakakaarug iya sa usad na tawo na nagtogrok nin baguy sa baybay. Kaso ominabot yo malakusug na ba'a, yo baguy biyong naragba.