5
Yo Pagba'no ni Jesus sa O'nang manga Desipolo
(Mt. 4:18-22; Mk. 1:16-20)
1 Usad na aldaw nagtindug si Jesus sa gilid nyo Lawud nin Genesaret ag pinag tipon-tiponan iya nyo kadakul na tawo na gostong makarungug nyo sasabyun nin Dios. 2 Agko iya nakitang dowang bangka na nakaroroong na sa gilid nyo lawud, ta nakaa'was na yo manga paraisra, ag niogas nyo sa sakandang manga pokot. 3 Lominonad iya adto sa usad na bangka na sadiri ni Simon, ag nakiosip na magsagwan tanganing makarayo-rayo nin agbay adto sa gilid. Nag-uga iya sa bangka ag nangadal sa manga tao.
4 Pagkatapos niyang mangadal sinabyan niya si Simon, “Magsagwan kamo palawud kina ilosbog ninyo ana pokot tanganing makarakup kamo nin isra.” 5 Sominimbag si Simon, “Maestro, nagramrag na tabi kaming nagparapagal na namokot alagad uda basang kami nakoko. Alagad dail sinabi mo, ilolosbog namun ana manga pokot.” 6 Kaso gibwun nira adto marayraay yo sakandang napokot, kaya agbay pang magkararaut yo sa kandang manga pokot. 7 Kaya pinaypay nira yo manga kaiba nirang nasa ibang bangka tanganing magpatabang. Rominani man yo manga pinaypay ag naponong maray yo dowang bangka mala' ngani agbay pang matundag. 8 Kaso makita ni Simon Pedro yo manga pangyayari, lominood iya sa atobangan ni Jesus, ag sominabi, “Romayo tabi ika sa sa'kun, Kagorangnan; ta ako usad na makasa'lan!" 9 Nagngalas iya ag yo sa kanyang manga kaiba adto sa kadakul nirang napokot. 10 Nagngalas man si Santiago ag si Juan na manga agin ni Zebedeo na manga kabakas ni Simon sa pagpangisra. Sinabyan ni Jesus si Simon, “Di ika matakot ta poon ngowan magigin na ikang parapangadal sa manga tao tanganing makatood sa Kagorangnan, kapariyo sa pararakup nin isra.” 11 Kaso mairoong na nira yo sa kandang manga bangka, bina'yan nira yo nga'min saka sominonod ki Jesus.
Pinaraay ni Jesus yo Usad na Pudpurun
(Mt. 8:1-4; Mk. 1:40-45)
12 Kaso si Jesus nasa usad na banwaan, agko usad na lalaki na pono' nin pudpud na rominani sakanya. Pagkakita niya ki Jesus, lominood iya na sagyad sa raga yo lalawgun ag nakimairak, “Kagorangnan, kin muya motabi, mapaparaay mo ako.” 13 Rinu'tan ni Jesus yo lalaki ag sinabi, “Muya ko. Ngowan man sana maray na ika.” Insigida nauda yo sakanyang pudpud. 14 Kina tinogon iya ni Jesus, “Di mo adi pagsabyun maski kiisay man. Kindi pomonta ika adto sa saserdote ag magparisa ika. Pagkatapos mag-atang ika nin sakripisyo na ipisogo ni Moises bilang pagpamatood sa manga tawo na ika maray na.”
15 Piro yo barita manunungud ki Jesus mas lalo pang kominayat, kaya kadakul yo manga tawong pominonta sakanya tanganing magrungug ag magpraay nyo sakandang manga kailangan. 16 Alagad nidulag si Jesus sa manga tao tanganing pomonta sa pwirang logar, arug nyo sakanyang kinaosowan tanganing mangadyi.
Pinaraay ni Jesus yo Usad na Paralisado
(Mt. 9:1-8; Mk. 2:1-12)
17 Usad na aldaw mintras na si Jesus nitoro, aadto man nakauwa yo manga Pariseo ag yo manga parapangadal nya kasogoan, na alin sa manlainlain na banwaan nin Galilea ag Judea, ag sa Jerusalem. Yo kapangyariyan nyo Kagorangnan aadto ki Jesus tanganing paraayun yo agko manga kailangan. 18 Nyo oras na adto agko nagkapirang lalaki na ominabot ag piboligan yo usad na lalaking paralisado na nakakabatang sa doyan. Nagpirit sira na maka'luug sa baguy tanganing madara nira sa atobangan ni Jesus yo paralisado. 19 Alagad kaso di nira mairani ta kadakul yo tawo nag-isip sira nin ibang paagi, pominanik sira sa atupSa sakanda yo atup patag \fr 19 ag linobot nira adto. Kina lowayloway nirang itinonton yo pibatangan nyo paralisado sa tung-tung nyo atobangan ni Jesus. 20 Kaso makita ni Jesus yo sakandang pagtood sinabi niya sa paralisado, “Amigo, ana manga kasa'lan mo pinatawad na.” 21 Alagad yo manga Pariseo ag yo manga parapangadal nya kasogoan sinabi nira sa sakandang sadiri. “Siisay man daw ana tawong adi na nisabi nin pagyoga-yoga sa Dios? Bukung Dios sana ana pwiding magpatawad nin manga kasa'lan?" 22 Alagad isi ni Jesus kin ono yo sakandang manga piisip kaya sinabi niya sa sakanda, “Taono kamo ta niisip nin bagaan? 23 Arin ana mas pasil sabyun, ‘Ana saimong kasa'lan pinatatawad na,’ o sabyun, ‘Bomowat ika ag omagi'? 24 Pamamato'ranan ko sa sainyo ngowan na ana agin nin tawo agko kapangyariyan na magpatawad nin manga kasa'lan didi sa kina'ban.” Kaya sinabyan niya yo paralisado “Pimandaan ta ika. Tomindug ika ag daraun mo ana saimong pibatangan ag somamput na ika.” 25 Insigida tomonindug man tolos yo paralisado sa atobangan nyo intirong tawo, ag binowat niya yo sa sakanyang pibatangan saka sominamput na nagiomaw sa Dios. 26 Yo lambag usad nagkaagko nin grabing pagkangalas ag nag-omaw sa Dios ag nagsarabi, “Nakakita kami ngowan nin manga makakangalas na bagay.”
Yo Pagba'no ni Jesus ki Levi
(Mt. 9:9-13; Mk. 2:13-17)
27 Pagkatapos nyadto ominalin si Jesus ag pominonta sa banwaan. Adto nakita niya yo parasingil nin bowis na yo pangaran Levi na nakauga adto sa pibayaran nin bowis ag sinabyan iya ni Jesus, “Somonod ika sa sa'kun.” 28 Ag tominindug si Levi, bina'yan yo nga'min ag sominonod ki Jesus. 29 Kina ipinag-anda ni Levi nin usad na dakuung andaan si Jesus adto sa sakanyang baguy. Aadto man kaiba niya yo kadakul na parasingil nin bowis saka yo iba pang manga tawo. 30 Alagad yo manga Pariseo ag yo manga parapangadal nya kasogoan na kaiba nira adto nagingorob-ngorob adto sa manga disipolo ni Jesus, “Taynga kamo nipakikaun ag nakikiinom sa manga parakasala?" 31 Sinimbag sira ni Jesus, “Di nangangaipo nin parabolong ana uda kailangan kindi yo agko. 32 Di ako nagponta didi tanganing ba'nowun yo manga matatanos. Kindi nagponta ako didi tanganing ba'nowun yo manga makasa'lan tanganing makapagsuwsuw.”
Ana Onga manunungud sa Pag-aayono
(Mt. 9:14-17; Mk. 2:18-22)
33 Alagad sinabi nira ki Jesus, “Ana manga parasonod ni Juan pirming nagiayono ag nipangadyi. Maski man yo manga parasonod nyo manga Pariseo. Alagad taono ta ana manga parasonod mo indi.” 34 Sominimbag si Jesus, “Pwidi daw na mag-ayono ana manga bisita kin kaiba pa nira yo nobyo? 35 Alagad kin omabot na yo panaon na uda na yo nobyo na kaiba nira saka pa sana sira mag-ayono.” 36 Ag sinabyan pa sira ni Jesus nin usad na parabola, “Indi pwiding italak ana ba'gong tinabas na tila sa lomang bado. Ta kin gibwun aan, mararaut yo ba'gong talak, ag ana ba'gong talak di babagay sa lomang bado. 37 Indi man pwidi na magluug nin ba'gong alak sa anit na loma na inalinan na nin luug. Ta kin gigibwun aan, papapotokon sana aan nya ba'gong alak ag maoowa' sana yo alak ag mararaut yo lulu'gan. 38 Ana dapat sa ba'gong lulu'gan iluug ana ba'gong alak. 39 Ag uda mamumuyang ominom nin ba'gong alak, kin nakainom na nin lomang alak, ta sasabyun niya, ‘Mas masiram yo lomang alak.’ ”