4
Ana Pagtintar ki Jesus
(Mt. 4:1-11; Mc. 1:12-13)
1 Si Jesus pono' nin Espirito Santo nyo bominalik alin adto sa Jordan ag sa pangongo'na nyo Espirito dinara iya sa kalangtaran. 2 Adto tinintaran iya nyo diablo sa luug nin kwarintang aldaw. Nyo bilog na panaon na adto di iya nagkaun, kaya ponaw na iyang maray. 3 Sinabi sa kanya nyo diablo, “Kin ika ana Agin nin Dios, sabyun mo sa manga batong adi na magin tinapay.” 4 Sominimbag si Jesus, “Nasosorat, ‘Buku sana sa tinapay naboboway ana tawo.’ ”
5 Kina dinara iya nyo diablo sa pinaka-ataas na logar ag ipinakita sa kanya sa usad na kimat nin mata yo nga'min na kaadi'an nyo kina'ban. 6 Ag sinabi, “Itatao ko nga'min saimo ading intirong kapangyariyan ag kamorawayan na adi, ta adi naitao na sa sa'kun ag maitatao ko man adi sa muya ko man na ta'wan. 7 Kaya kin ika somamba sa sa'kun, itatao ko adi saimo nga'min.” 8 Somonimbag si Jesus, “Nasosorat,
‘Sambaun mo ana
Kagorangnan mong Dios,
ag iya sana ana saimong pagsirbiyan.’ ”
9 Kina dinara iya nyo diablo adto sa Jerusalem ag pinatindug sa atup nyadtong temlpo, ag sinabi sakanya, “Kin ika ana Agin nin Dios, tomawun ika! 10 Ta nasosorat,
‘Mamandaan niya yo manga angel
tanganing pagmaanan ika ag bantayan,
11 Ag sasaw'on ika nira sa sakandang manga kamut tanganing di ika matikrag ag makulgan sa kababatowan.’ ”
12 Alagad sominimbag si Jesus, “Nasosorat man, ‘Di mo pagtistingun ana kagorangnan mong Dios.’ ” 13 Kaso tapos na yo diablo na tintaran si Jesus sa manlain-lain na paagi, bina'yan na iya ag nag-uwat nin ibang oportonidad.
Pino'nan ni Jesus yo sa Kanyang Ministeryo sa Galilea
(Mat. 4:12-17; Mc. 1:14-15)
14 Bominalik si Jesus sa Galilea na pono' nin kapangyariyan nyo Espirito ag yo barita' manunungud sa kanya naka-ukup sa nga'min na logar. 15 Nagtoro iya sa manga sinagoga, ag yo manga nakarungug sa kanya inomaw iya.
Di Inako si Jesus sa Nazaret
(Mat. 13:53; Mc. 6:1-6)
16 Sominamput si Jesus sa Nazaret, na sakanyang pinagdakuwuan na banwaan. Ag sa Aldaw nin Pagpadiskanso lominuug iya sa sinagoga, oyon sa sakandang kostombri. Nagtindug iya tanganing magbasa. 17 Ag itinao sa kanya yo libro ni propeta Isaias. Binoklat niya yo libro adto sa logar na nasosoratan nin bagadi:
18 “Nasa sa'kun yo Espirito nin
kagorangnan,
ta linaidan niya ako tanganing
ipangadal sa manga pobri
yo maray na barita.
Sinogo niya ako tanganing ipaisi
sa manga nakokolong na sira makakalaya,
saka sa manga bota na sira makakakita,
tanganing ta'wan nin kaginawaan yo manga
pioriyan,
19 Ag ipamarita yo taon nin pagsasalbar na gigibwun nya Kagorangnan.”i 20 Kina piniripit na niya yo kasoratan. Pagkatapos isinaoli sa nagtao sakanya, ag nag-uwa na iya. Yo nga'min na nasa sinagoga nagkiriling sa sakanya. 21 Ag sinabi ni Jesus sa sakanda, “Naotob ngowan yo kasoratan na narungug ninyo.” 22 Dail sa narungug na adto inomaw iya nyo nga'min ag nagngalas sa la oyay niyang sasabyun. “Bukung amo adi yo agin ni Jose?” Onga nira. 23 Kaya sominabi si Jesus sa sakanda, “Sigoradong sasabyun ninyo sa sa'kun ana sasabyun na adi, ‘Doktor, bolongon mo ana sadiri mo!’ Sasabyun man ninyo sa sa'kun, ‘Gibwa man didi sa sadiri mong banwaan yo manga nabari'tan namun na ginibo mo sa Capernaum.' 24 Sa kaostowan pisabi ko sainyo, “Uda propetang pibisto sa sadiri niyang banwaan. 25 Pisigoro ko sa sainyo na kadakul yo manga balo sa Israel nyadtong panaon ni Elias, kaso indi mag-oran sa luug nin tolong taon ag kabanga ag nagka-agko grabing kaponawan sa bilog na karagaan. 26 Alagad buku sa usad man sa sakanda pinaponta si Elias, kindi adto sa usad na babaying balo na taga Sarepta sa logar nin Sidon. 27 Sa kadakul-dakulan na manga pudpurun sa Israel nyadtong panaon ni propeta Eliseo uda basang ibang pinaraay, kindi si Naaman pang taga Siria.”
28 Pagkarunug nira sa sinabi ni Jesus grabi yo sakandang kaga'san. 29 Kaya nagtirindugan sira ag inauw si Jesus palowas sa banwaan ag dinara sa pontok nyo bokid na nabubutangan nyo sakandang banwaan tanganing itikrag iya sa bangin. 30 Alagad ominagi iya sa bitnga nira ag ominalin.
Yo lalaking Pisaniban nin Maraut na Espirito
(Mc. 1:21-28)
31 Alin adto pominonta si Jesus sa Capernaum, banwaan nya Galilea, ag nagtoro iya adto sa manga tawo sa Aldaw nin Pagpadiskanso. 32 Nagngalas yo manga tawo sa manga pitoro niya ta agko kapangyariyan yo sa sakanyang pangangadal. 33 Adto sa logar na pitiponan agko usad na lalaking sinaniban nin demonyo ag ominuyaw nin malak'sug ki Jesus, 34 “Oy! Jesus na taga-Nazaret, onong pakilabut mo sa sa'mun? Pominonta ika didi tanganing rautun kami? Bistado ko ika. Ika ana Banal na sogo nin Dios.” 35 Alagad minandaan iya ni Jesus, “Pomondo ka! Lomowas ika sa tawong a'an.” Kina itinomba nyo demonyo yo lalaki adto sa atobangan mismo nyo manga tawo, ag bina'yan na di man kinulgan. 36 Nagngalas yo nga'min na tawo ag nag-osip-osip sira, “Onong klasing katoroan adi? Agko iya kapangyariyan na pagbu'tan ana demonyo na lomowas sa usad na tawo sa kasogoan niya.” 37 Yo barita manunungud ki Jesus nag-ukup sa bilog na rihiyon na adto.
Pinaraay ni Jesus yo Kadakul na Tawo
(Mat. 8:14-17; Mc. 1:29-34)
38 Pagka-alin ni Jesus sa sinagoga nagdagos iya sa baguy ni Simon. Grabi yo kalintora nyo panogangan ni Simon, kaya ipinakiosip nira ki Jesus na parayun yo sakanyang panogangan. 39 Kaya pominonta si Jesus adto sa tung-tung nyo pibatangan nyadtong agko kamatian, minandaan niya na mag-alin yo kalintora, kaya nyo oras man sanang adto naraay iya. Kina nagtindug yo babayi ag nagpriparar na nin pagkaun para sa sakanda. 40 Paglunud nyo aldaw dinara nyo manga tawo ki Jesus yo agko manlain-lain na kailangan ag irinuta niya nyo sa kanyang kamut sa lambang usad ag pinaraay. 41 Nagrolowas yo manga demonyo adto sa kadakul na tawo na inuyaw, “Ika ana Agin nin Dios!” Alagad sinawi' sira ni Jesus ag di sira tinogotan na magsabi pa ta nabibisto na kaya nira na iya amo yo Mesias.
Nangadal si Jesus sa Judea
(Mc. 1:35-39)
42 Kaso niipipita' na, pominonta si Jesus sa usad na pwirang logar. Ag yo manga tawo inanap iya, kaso iya matorakan nira pinaki-osipan iya na di nawna mag-alin. 43 Alagad sominbi iya, “Dapat ko man na ipangadal sa ibang banwaan yo Maray na Barita manunungud sa kaadi'an nin Dios, ta amo adi yo katoyowan sa pagsogo sa sa'kun. 44 Kaya iya nagpadagos na nangadal sa manga sinagoga sa Judea.