Ana Sorat ni Pablo sa manga
Taga Filipos
Intodoksiyon
Ana sorat ni Pablo sa manga tagaFilipos sinorat para sa o'nang simbaan na natindug sa paagi ni Pablo sa Eoropa, sa Macedonia, usad na pribinsiya nin Roma. Sinorat adi kaso ana apostol nasa karsilan, ag kaso panaon na iya nasasakitan nya pagkontra sakanya nya ibang trabaador na Kristiyano, ag napoporisaw iya dail nya salang katoroan sa saimbaan nin Filipos. Piro nag-iras nin kaogmaan ag pagsarig ana sorat na adi na pwedi sanang ipaliwanag dail nya masarig na pagtood ni Pablo ki Jesu Cristo.
Ana o'nang katoyowan nya sorat na adi, amo ana pagpasalamat sa manga kristiyano sa Filipos dail nya tabang na ipinadara nira ki Pablo kaso iya nipangaipo. Ginamit niya ana oportonidad na adi, sa pagsarig sakanda, tanganing magkaagko sira isug ag pagtood maski iya nasa kasakitan ag nasa kasakitan man sira. Nipakimaerak iya sakanda na magin mapakombaba arug ni Jesus, embes na magpadaug sa sadiring kama'wutan ag pag-abaw. Ipinarumrum niya sakanda na ana sakandang boway sa pakikiusad ki Cristo usad na regalo nya karaayan nin buut nin Dios na renesebi nira pormedyo nyo sakandang pagtood, ag bukung sa paggibo nya mga seremonya nya Kasogoan nin manga Judio. Isinorat niya ana kaogmaan ag katoninungan na ipitao nin Dios sa manga nipamoway sa pakikiusad ki Cristo.
Pipaalagaan nya sorat na adi ana kaogmaan, ana pagsarig, ana pakikiusad, ag ana pakatagal sa kristiyanong pagtood ag pamomoway. Ipipaayag man didi ana tuduk sa posong pagkamuya ni Pablo sa simbaan sa Filipos.
An Luug
Introdoksyon 1:1-11
Mga pangyayari sa boway ni Pablo 1:12-26
Ana boway ki Cristo 1:27—2:18
Mga plano para ki Timoteo ag ki Epaprodito 2:19-30
Mga patanid tomang sa mga kalaban ag manga peligro 3:1—4:9
Si Pablo ag ana sakanyang mga amigo sa Filipos 4:10-20
Kapondowan 4:21-23