4
Mag Ogma sa Kagorangnan
1 Kaya namumu'yan kong manga ipatngod, kamo na piidaw ko sa maray, na sa'kun na kaogmaan ag sa'kun na orgolyo, magpadaos kamong makusug sa Kagorangnan.
2 Nipakimaerak ako ki Euodia ag Sintique, na magkaoyon na kamo bilang magipatngod sa Kagorangnan. 3 Saymo man na matapat kong korokaiba sa pangangadal, piayat kong tabangan mo ana manga babaying adi, dail ta nagtrabaho sirang maigut kaiba ko sa pagpaukup nya Maraay na Barita, kaiba ni Clemente ag nya iba pang manga kapwa ko serbidor na ana pangaran nakasorat sa libro nin boway na uda kapondowan.
4 Dayaday kamong magogma sa Kagorangnan. Pi otro ko maogma kamo!
5 Ipakita ninyo sa ng'min ana sainyong pagigigin maraay na buut. Ana Kagorangnan madali nang omabot. 6 Indi kamo mag a'dit manunungud sa onoman na bagay, imbis ayatun ninyo sa Dios ana sainyong manga kaipowan, sa paagi nin pami'bi na agko pagpasalamat. 7 Kin gibowun ninyo an, tata'wan kamo nin Dios nin katoninungan na among magi-ingatun sa sainyong poso ag pag-iisip dail na ki Cristo kamo.
8 Pwera pa nyaan, manga ipatngod, pirmi ninyong isaisip ana manga bagay na maraay ag kaomawomaw; manga bagay na osto, maraay na rungug, matanos, malinig, maoyay, ag kagalanggalang. 9 Ipamoway ninyo yo nga'min ninyong natu'ran ag inako alin sa'kun, sa sasabiyun ag sa gibo, ag niistarun sainyo ana Dios na nitao nin katoninungan.
Padiosmagbalus Para sa Regalo
10 Niogma akong maray sa Kagorangnan dail ta pakaliis nin alawig na panaon, nagpakita kamo dayaday ngowan nya sainyong pagmakulug sa'kun. Ana muya kong sabiyun, bukung sa nalingawan na ninyo ako, kindi indi sana kamo nagkaagko nin oportonidad na maipakita ana saiyong pagmakulug sa'kun. 11 Pisabi ko adi indi dail sa pianapan ko kamo nin tabang. Natu'ran ko nang makontento ono man ana sa'kun na kamutangan. 12 Tatao akong mamoway sa kapobreyan o kagginnawaan. Natu'ran ko na ana nga'min na adi, kaya magin onoman ana kamutangan ko, bosog man o ponaw, bastante o agko sana agbay, kontento pa nanggayud ako. 13 Kaya kong atobangun ana maski onong kamutangan sa paagi nya tabang ni Cristo na nipakusug sa'kun.
14 Piro maray yo ginibo ninyo kaso tabangan ninyo ako sa sa'kun na manga kasakitan. 15 Isi ninyong manga tagaFilipos na pag alin ko sa Macedonia kaso magpoon akong mangadal nya maraay na Barita, uda ibang simbaan na nagtabang sa manga kinakaipowan ko kindi kamo sana. 16 Kaso adto ako sa Tesalonica, dakul na beses na pinadaraan ako ninyo nin tabang. 17 Pisabi ko adi, buku dail ta muya kong magresebi otro nin tabang, kindi dail muya ko na makaresebi kamo nin primiyo dail sa karaayan ninyo nin buut 18 Ngowan, dail sa tabang na ipinadara ninyo sa'kun sa paagi ni Epaprodito, nasolosyonan na yo manga kinakaipowa ko ag sobra pa. Ana manga tabang ninyo, arug nin maomot na atang sa Dios na piako niya na agko kaogmaan. 19 Ag dail kamo nasa ki Cristo Jesus, itatao sainyo nya sa'kun na Dios ana nga'min na kinakaipowan ninyo alin sa kadakulan nya kayamanan niya. 20 Pagomawun ana sa'tun na Dios ag Ama anggan noarin man! Amen.
21 Ikomosta ninyo ako sa nga'min na mga binanala diyan nin Dios na nasa ki Cristo Jesus. Pikomosta kamo nya manga ipatngod kay Cristo na kaiba ko didi. 22 Ana nga'min na manga banal didi, lalo na ading manga nasa palasyo ni Cesar, nipangomosta man sainyo.
23 Ana karaayan nin buut ni Jesu Cristo na sa'tun na Kagorngnan mapasainyo logod.