3
Ana Tonay na Pagiging Matanos
1 Sa kapondowan, manga ipatngod, mag-ogma kamo sa Kagorangnan. Indi ako nisawa na isorat otro sainyo ana manga bagay na adi, dail para adi sa karaayan ninyo. 2 Maglikay kamo sa manga Judio na ipipirit na toriun ana manga Hentil. Manga ogaling ayup sira ag nigibo nin maraut. 3 Rumrumun ninyong kita ana tonay na agko pagkatori, bukung sira, pormedyo ta nisamba kita sa Dios sa paagi nin Espirito ag nipamoraway diyan ki Cristo Jesus. Indi kita nisarig sa panlowas na seremonya tanganing maligtas kita. 4 Kin sabagay, agko ako maiipagorgolyo kin ana pagsonod sa manga seremonya ana pag-osipan. Kin piisip nin siisay man na agko iya poder na mag-orgolyo sa manga bagay na adi, lalo na ako. 5 Dail tinori ako kaso walong aldaw pa sana ako pagkapangagin. Namundag akong usad na Israelita, alin sa tribo ni Benjamin, usad na tonay na Hebreo. Kin manungud sa paggibo nin Kasogoan nin manga Judio biyo ko ading sinonod, dail usad akong Faresio. 6 Kin sa kaigusan na mapagserbiyan ko ana Dios, pinagosig ko ana simbaan. Kin manunungud sa pagigin matanos nin usad na tao dail sa pagsonod nya manga ipisogo sa kasogoan, uda sa'kun maitatatsar. 7 Piro ana nga'min na aan na nyadto agko pakinabang sa'kun, ngowan ipibilang kong uda nin pakinabang dail ki Cristo. 8 Sa kaostowan ana nga'min na bagay ibinilang kong uda alaga, kin ipapariyo sa pagkabisto ko ki Cristo Jesus na sa'kun na Kagorangnan. Ana nga'min na bagay ipinamutang kong basora mapasa'kun sana si Cristo, 9 ag ako man magin sakanya. Indi na ako nisarig na magin matanos sa paagi nin pagsonod sa Kasogoan, kindi sa pagtood ki Cristo. Ana pagigin matanos ko regalo sa'kun nin Dios kaso magtood ako ki Cristo. 10 Uda na ako iba pang pima'wut ngowan kindi ana mas orog pang mabisto si Cristo ag maako ana kapangyariyan nya sakanyang pagkaboway otro, makaparti sa sakanyang manga kasakitan, kina makaarug sa sakanyang kagranan, 11 sa paglaom na ako man bobowayun otro.
Nipadagos Anggan sa Kapondowan
12 Indi ko pisabing naako ko na ana nga'min, o kaya uda na ako kakolangan. Imbis, padagos akong niingowa tanganing makoko adi, dail amo an ana katoyowan ni Cristo Jesus kaso ba'nowun niya ako. 13 Manga ipatngod, ana kaostowan, indi ko piisip na uda na ako kakolangan sa boway. Piro amo adi ana pigibo ko ngowan: Pilingawan ko yo manga nakaagi na, ag piingowa kong makoko ana sa niaboton. 14 Kaya arug nin usad na parayamun, nipadagos ako anggan na maako ko ana premiyo na uda iba kindi ana pagkaba'no sa'kun nin Dios na makapamowaay adto sa langit sa paagi ni Cristo Jesus.
15 Kitang masarig na sa pagtood, logod magka-agko nin bagading kaisipan. Piro kin ana iba sainyo agko iba man na kaisipan, ipaiintindi man aan nin Dios sainyo. 16 Ana maalaga, padagos tang sonodon ana mga kaostowan na natu'ran ta na.
17 Manga ipatngod, arugun ninyo ako, ag arugun man ninyo ana iba pang namomoway na kapariyo namun. 18 Dail dakul ana nipamoway nin sarongat sa katoroan manunungud sa kagra'nan ni Cristo sa kros. Pirang beses ko nang sinabi sainyo ana manunungud sakanda, ag napapalowa akong iparumrum adi sainyo ngowan. 19 Kapaamakan ana kaabotan nira dail piDios nira ana sakandang tuyan.a Ipiorgolyo pa nira ana bagay na dapat kinta'na nirang ikasupug, ag uda sira piisip kindi ana makakina'ban na bagay. 20 Piro para sa'tun, ana langit amo ana tonay tang banwaan. Ag alin adto, niugat kita na magbalik ana Paraligtas, ana Kagorangnan na si Jesu Cristo. 21 Pag-abot niya, babagowun niya ana maloloya ag malulupaun tang lawas ag gigibowun na arug nya sakanyang mamorawayun na lawas, sa paagi nya kapangyariyan na ginamit niya sa pagsakup nya nga'min.