2
Ana Pagpakombaba ni Cristo
1 Ono nitao sainyo nin kusug ana boway na nakatugod ki Cristo? Ono nararanga kamo nya sakanyang pagkamuya? Ono agko kamo pagkakauusad sa Espirito Santo? Ono agko basang kamo namamating pagma'wut na tomabang sa iba? 2 Kin agko, nipakiosip ako na biyobiyoon na ninyo ana sa'kun na kaogmaan, maghade sainyo ana pagkakasorondo, mabugkus kamo sa usad na pagkamuya ag magin usad sana kamo sa poso ag isip. 3 Indi kamo gomibo nin ono man na bagay dail sana ta muya ninyong mabisto, kindi, magpakombaba kamo ag indi ninyo pagisipun na mas maraay kamo kisa iba. 4 Ana ipagmakulug ninyo amo na kin ono ana mas maraay para sa iba, buku sanang ana para sa sainyong sadri.
5 Ana sainyong ogali pirmi sanang pagpapakombaba arug ni Cristo Jesus:
6 Na maski iya usad na Dios,
indi niya ipinagpipirit na pirming kapantay nin Dios.
7 Imbis, sadidiring buut niyang bini'liwan yo poder niyang adto,
ag namoway na usad na oripun
ipinangagin iyang arug nin usad na tao.
8 Nagpakababa iya,
ag nagin masinonodsonod sa Dios anggan sa kagra'nan,
angan sa kagra'nan sa kros.
9 Kaya man, itinaas iyang maray nin Dios
ag tina'wan iya nin pangaran
na alangkaw sa ki isay man na pangaran,
10 tanganing sa pangaran ni Jesus
ana nga'min na tood lomood,
sa kalangitan man o sa raga, ag sa irarum nin raga.
11 Ag bistowun nya nga'min
na si Jesu Cristo amo ana Kagorangnan,
sa ikamomoraway nin Dios na Ama
Magliwanag Bilang Ilaw Didi sa Kina'ban
12 Manga namumu'yan, kin papaonong pirmi ninyo akong pisonod kaso magkakaibanan pa kita, lalo logod kamong magin masonoron maski ngowan na arayo na ako sainyo. Ingowaun ninyong ipamowaya ana kaligtasan na inako ninyo, ag gibowun ninyo adi na agko pagkatakot ag paggalang sa Dios. 13 Dail ana Dios among nitao sainyo nin pagma'wut ag kakayanan na magibo ninyo ana sakanyang kamu'yan.
14 Gibowun ninyo ana nga'min na bagay na uda reklamo ag deriskotiran, 15 tanganing magin kamo maraay na manga agin nin Dios, malinig ag uda katatsaran sa bitnga nya manga taong siko ag mararaut. Sa bagaan, magiserbiyun kamong manga ilaw sa sakanda, arug nya bitoon na niliwanag sa kalangitan 16 miyentras na piatud ninyo ana bareta nin kaligtasan, tanganing sa aldaw na pagabot ni Cristo, maipagoorgolyo ko kamo dahil indi nasayang yo sa'kun pagtrabao ag pagpagal.
17 Kin ana sa'kun na rogo paboloson bilang parti nya sainyong atang nin pagtood, maoogma ako pa nanggayud ako ag makikipagogma sainyo nga'min. 18 Kaya dapat magin maogma man kamo ag makipag-ogma sa'kun.
Si Timoteo ag Epafrodito
19 Nilaom ako sa Kagorangnan na si Jesus na mapapaponta ko diyan si Timoteo sa lalong madaling panaon, tanganing mapamutang ana sa'kun na buut, kin maibarita na sa'kun ana sainyong kamtangan. 20 Iya sana ana bistado ko na arug kong agko ostong pagmakulug sainyo. 21 Dail ana iba uda ibang piisip kindi ana sadri sana nirang karaayan, bukung ana manunungud ki Cristo. 22 Piro isi man sana ninyo kin papaono pinatonayan ni Timoteo ana sakanyang sadiri. Baga ko iya tonay na agin sa pagtaabang niya sa'kun sa pangangadal nin Maraay na Barita. 23 Kaya piplano ko na iya ana papontaun diyan sainyo pagkatapos kong maisiyan ana magigin osgar saa'kun didi. 24 Nisarig ako sa Kagorangnan na ako mismo, makakaponta sainyo sa lalong madaling panaon.
25 Sa ngowan, naisip ko na kaipowan nang pasamputun ana ipatngod tang si Epafrodito na pinaponta ninyo didi tanganing tabangan ako. Pariyo ko man iyang serbidor ag paradipensa nin Maraay na Barita. 26 Ka muya na niyang makabalik diyan. Indi iya mapamutang dail nya baritang nakaabot diyan sainyo manunungud nyo sakanyang pagkakaagko mate. 27 Nailang iyang grabi piro kinairakan iya nya Dios, pati ako kinaerakan man. Sinabi kong pati ako kanaerakan man, dail sa pagkaraay niya sa sakanyang kailangan naligtas man ako sa grabing kamunduan. 28 Kaya ngani, muya kong makasamput na iya diyan dail isi kong maoogma kamo kin makita na ninyo iya otro. Sa bagaan mauuda na ana sa'kun na kaporisawan. 29 Kaya, akoon ninyo iya na agko bilog na kaogmaan bilang usad na serbidor nin Kagorangnan. Igalang ninyo ana manga taong arug niya. 30 Ibinutang niya sa peligro ana sakanyang boway sa pagpagal alang-alang ki Cristo kaso iya magserbi sa'kun imbis na kamo.