Ana Sorat ni Pablo sa manga
Taga Filipos
1
1 Alin ki Pablo, ag kaiba ko si Timoteo, na kapariyong oripun ni Jesu Cristo. Nipangomosta kami sainyo nga'min diyan sa Filipos pati sa manga namamayo sainyo ag sa manga nitabang sakanda.
2 Mapasainyo logod ana bendisyon ag katoninungan nin Dios na sa'tun na Ama ag nya Kagorangnan na Jesu-Cristo.
Pamibi ni Pablo Para sa manga Cristiano sa Filipos
3 Nipasalamat ako sa Dios kada narurumruman ko kamo. 4 Ag pirmi akong maogma sa kada pangadyi ko para sainyo nga'min. 5 Dail katabang ko kamo sa pagpapaukup nya Maraay na Barita poon pa nyo tomood kamo anggan ngowan. 6 Nasisigoro ko na ipapadagos nin Dios ana maraay na gibo na pinonan niya sainyo anggan sa aldaw na pagbabalik ni Cristo Jesus. 7 Dapat sanang bagadi ana namamatian ko dail namumu'yan ko kamo. Nagin kaparti kamo sa manga trabao na itinao nin Dios sa'kun, maski ngowan na nakakarsil akong nidepensa ag nipatonay nya Maraay na Barita. 8 Naiisyan nin Dios na grabi na ana pagidaw ko na makita kamo dail namumu'yan ko kamo kapariyo nya pagkamuya ni Cristo Jesus sainyo.
9 Ipipangadyi ko na lalo pang magso'pay ana sainyong pagkamuya sa kada usad na agko kadonongan ag pagintindi, 10 tanganing mapili ninyo ana pinaka maraay sa nga'min na bagay. Sa paaging aan, pagabot nya Aldaw nin pagbabalik ni Cristo, makoko kamong malinig ag uda katatsaran. 11 Mapono logod kamo nya maoyay na ogali na itinao ni Jesu Cristo para sainyo tanganing mata'wan onra ag mata'wan nin kaomawan ana Dios.
12 Muya kong maisiyan ninyo, manga ipatngod, na yo nangyari sa'kun biyong nakatabang sa ikakaukup nya Maraay na Barita 13 Dail isi na nya nga'min na manga bantay adto sa palasyo ag nyo iba pang didi na ako nakarsil dail sa pagiging tagasonod ko ki Cristo. 14 Ag dail man sa pagkakarsil ko, lalong kominusug yo pagtood nin kadaklan sa manga ipatngod sa Kagorangnan, kaya mas orog pa sirang naging makusug yo buut sa pagpaisi nin Maraay na Barita.
15 Osto na agko diyan na nipangadal manunungud ki Cristo dail naiibug sira sa'kun ag muya nirang ipakita na mas maraay sira kisa sa'kun. Piro agko man na nagkapira na nipangadal na agko osto ana katoyowan nya pangangadal. 16 Nipangadal sira dail ta namumu'yan nira ako, ag isi nira na dinara ako didi nin Dios tanganing idipinsa ana Maraay na Barita. 17 Ana manga tao na naiibug sa'kun bukung osto sa sakandang pangangadal manunungud ki Cristo, dail pigibo nira adi na agko pangsadiring ma'wut nipangadal na buku man na tapat sa buut kindi agko maraut na intensiyon, dail muya sana nira akong pasakitan miyentras na nakakarsil. 18 Piro indi ko na pinapakilabutan ana manga bagay na aan, ikinaoogma ko pa ngani ana manga pangyayaring aan. Ana importante naipangadal si Cristo maski sa onong paagi, tapat man o buku ana intensiyon nira. Ag padagos akong maoogma, 19 dail isi ko na sa paagi nya manga pami'bi ninyo ag sa tabang nin Espirito ni Jesu Cristo, makakalowas ako sa karsilan. 20 Dakuu ana pagma'wut ag paglaom ko na indi ako mapapasupug, kindi arug nyo dati, magkakaagko ako nin kusug buut na ipangadal si Cristo tanganing sa paagi nya boway o kagra'nan ko mapamorawayan iya. 21 Dahil para sa'kun, amo na, ana maboway para ki Cristo. Ag kin magraan man ako, kapakinabangan adi sa'kun dail makakaibanan ko na iya. 22 Kin padagos man akong maboway, makagibo pa nin mararaay na bagay. Kaya indi ko isi ngowan kin arin ana sa'kun na pipiliun. 23 Nababanga ana isip ko sa dowa. Ana maboway o magraan. Muya ko na kinta'nang magraan na, tanganing makaibanan na si Cristo, dail amo adi ana mas maraay. 24 Piro sa karaayan ninyo, mas maalaga na magpadagos akong boway. 25 Dail nyadi, nasisigoro kong nipadagoson pa akong boway ag makaiba ninyo tanganing matabangan ko kamong magpadagos na agko kaogmaan sa sainyong pagsarig sa Kagorangnan. 26 Ag kin makabalik na ako sainyo, mas lalo pa kamong magkakagko dailan tanganing omawun si Cristo Jesus.
27 Kinakaipowan sana, manga ipatngod, na pagingowaun ninyong mamoway basi sa Maraay na Barita manunungud ki Cristo. Sa bagaan, makabalik man ako sainyo o indi, makasisigoro akong nipadagos kamo sa usad na katoyowan ag niiribang ipidipensa ana Maraay na Barita. 28 Indi kamo mangatakot sa manga nikalaban sainyo. Dail kin indi kamo matakot, magigin tanda adi sakanda na mapapakaraut sira ag ililigtas kamo nin Dios. 29 Dail buku sanang itinao sainyo ana pribiliiyong tomood ki Cristo, kindi magsakit man para sakanya. 30 Ngowan, namamatian na ninyo ana pagsakit na nakita ninyong namatian ko nyadto, ag nabaritaan ninyong namamatian ko pa nanggayud anggan ngowan.