24
Yo Pagkaboway Otro ni Jesus
(Mt. 28:1-10; Mk. 16:1-8; Jn. 20:1-10)
1 O'nang aldaw nin simana, kaamay-amayi nin pita, yo manga babayi pominonta sa pinaglubngan ki Jesus dara-dara yo manga paomot na pinagpriparar nira. 2 Kaso omabot sira adto sa linub'ngan, nakita nira na naipaligid na yo bato na nakasakub sa pintoan nyo linub'ngan. 3 Kaya lominuug sira sa lulubngan, alagad indi nira nakita yo bangkay nyo Kagorangnan Jesus. 4 Mintras na nalilibungan yo sa sakandang isip manunungud sa manga nangyari, bigla na sanang nagbot'wa yo dowang lalaki na nakasusu'wut nin nakakapasi na bado adto sa kaabay nira. 5 Sa sobrang katakotan, yo manga babayi napalood na sagyad sa raga yo sakandang lalawgun, alagad sinabi nyo mga lalaki sa sakanda, “Taynga ninyo pianap yo boway sa bitnga nyo manga guraan? 6 Uda na iya didi, ta naboway na iya otro! Rumrumun ninyo kin ono yo sinabi niya sa sainyo kaso korokaiba pa iya ninyo sa Galilea. 7 Ana Agin nin Tawo kaipowan na maitao sa kamut nyo manga makasa'lan, tanganing ipako sa kros. Alagad sa ikatolong aldaw iya maboboway otro. 8 Ag narumruman nira yo manga sinabi ni Jesus.
9 Kaso makabalik na sira alin sa lulub'ngan, inistorya nira yo nga'min na nangyari adto sa onsing disipolos, ag adto sa iba pang manga kaiba. 10 Amo adi yo manga babaying nagponta sa lulubngan, sira Maria Magdalena, Juana saka si Maria na ina ni Santiago, ag yo iba pang babayi. Sira yo manga oministorya sa manga apostol kin ono yo nangyari. 11 Alagad indi nagtood yo manga apostol sa manga isinabi nyo manga babayi, ta pagtaud nira kapotnayan sana adto. 12 Alagad tominindug si Pedro saka dominalagan paponta adto sa lulub'ngan. Ominokrong iya ag pagkita niya sa luug uda iya nakita kindi yo manga kayong lino sana na pinot'san ki Jesus. Kaya sominamput iya na nagingalas adto sa manga nangyari.
Sa Dagan Paponta sa Emaus
(Mk. 16:12-13)
13 Nyo aldaw man sanang adto agko dowang disipolo na paponta adto sa baryo na piba'nong Emaus, agko onsing kilometro ana rayo adto sa Jerusalem. 14 Mintras na sira niagi pinagi-osipan nira yo manunungud sa intirong nangyari. 15 Mantang nagiosip sira ag nagi-orongaan, rinaniyan sira ni Jesus ag nakisabay sa sakanda sa pag-agi. 16 Nakita iya nira, alagad indi nabisto tolos. 17 Inonga sira ni Jesus, “Ono ana sainyong pidiskotiran mintras na kamo nagiagi?” Pominondo sira sa pag-agi na mapupu'nguw ana manga lalawgun. 18 Sinabi nyo usad sa sakanda na pangaran Cleopas, “Kamo sana tabi gayud ana dayowan sa Jerusalem na indi nakaisi nyo manga pangyayari na katatapos pa sanang nangyari adto.” 19 “Onong manga bagay aan?” Onga niya, “Manunungud ki Jesus na taga-Nazareth,” simbag nira, “Usad na propeta, makapangayariyan yo sakanyang sasabyun ag manga gibo sa atobangan nin Dios ag sa atobangan man nin manga tawo. 20 Yo manga namamayong manga saserdote, saka yo manga namamayo sa banwaan isinomon iya ag ipinaguraan sa paagi nin pagpako sa kros. 21 Iya kinta'na yo pilaoman namun na niaboton tanganing isalbar ana Israel. Lain pa nyadi, tolong aldaw na ngowan poon nyo ipaguraan iya. 22 Nasindakan kami sa ibinarita sa sa'mun nyo nagkapirang babayi na kaibanan sa gropo namun. Kaamay-amayi kono sirang pominonta sa lulubngan. 23 Piro indi nira naanap yo bangkay ni Jesus. Kaya bominalik sira ag sinabi na nakakita kono sira nin usad na pangitaun, manga angel na nagisabing boway si Jesus. 24 Yo nagkapira sa manga kaibanan namun pominonta man adto sa lulubngan ag bagadto ngani yo sakandang naabotan, arug nyo pagkasabi nyadtong manga babayi alagad di nira natorakan si Jesus.
25 Sominabi si Jesus sa sakanda, “Grabi ana kapatalan ninyo! Taynga ta indi ninyo matood kin ono yo nga'min na ipisabi nyo manga propeta? 26 Bukung kaipwan nawna na magtius nin manga bagay na adi yo Mesias bago iya lumuug sa sakanyang kamorawayan?” 27 Ag ipinaintindi sa sakanda ni Jesus yo nga'min na nasosorat sa kasoratan manunugud sa kanyang sadiri poon sa kasoratan ni Moises sagkud sa isinorat nyo manga propeta.
28 Kaso sira nidangadang na adto sa baryo na sakandang dadagosan, si Jesus man bagana nipadagoson pa sa kanyang pag-agi. 29 Alagad iya pinaka pugul-pugul nira, “Magdagos na tabi kamo sa sa'mun ta palunud na yo aldaw.” Kaya ominiba na iya sa sakanda. 30 Kaso iya kaiba na nira sa lamisa, kominoko iya nin tinapay ag nagpasalamat sa Dios, saka pinagbanga-banga ag itinao sa sakanda. 31 Insigida naboksan yo sakandang manga mata ag nabisto nira si Jesus, alagad bigla iyang nauda. 32 Nasabi nira sa sakandang sadiri; “Kaya palan bagadto na sana yo sa sa'tun na pagmati kaso pikaosip niya kita adto sa dagan ag piisplikar sa sa'tun yo kasoratan.
33 Nyadto man sanang oras na adto tominindug sira ag bominalik sa Jerusalem. Naabotan nirang tipon yo Onsi ag yo iba pang manga kaibanan 34 na nagiosip-osip nin bagadi, “Osto talagang naboway otro yo Kagorangnan? Nagpakita iya ki Simon.” 35 Ag inistorya man nyo dowa yo nangyari sa dagan, ag kin paono nira nabisto si Jesus kaso banga-bangaun yo tinapay.
Nagpakita si Jesus sa Sakanyang manga Disipolos
(Mt. 28:16-20; Mk. 16:14-18; Jn. 20:19-23; Mga Gibo 1:6-8)
36 Mintras na pinagiosip-osipan nira adto, nagtonga si Jesus sa atobangan nira saka sominabi, “Ana katoninungan mapasainyo!" 37 Nga'min sira nagkasirindakan ag nagkatatakot, ta pagtaud nira molto yo nasa atobangan nira. 38 Kaya sinabi ni Jesus sa sakanda. “Taynga kamo ta nariribaraw? Taynga ta nagidowa-dowa pa kamo? 39 Ki'tun ninyo ana sa'kun na kamut ag manga paa. Ako mismo adi! Apwasun ninyo ako ag ki'tun. Ana molto uda laman ag to'wang, alagad ako agko, arug nya sainyong nakikita.” 40 Pagkasabi niya nyadi, ipinakita niya sakanda yo sakanyang kamut saka manga paa. 41 Kaso di pa man dayaday sira makatood ta sa kadakuung kaogmaan ag kangalasan, inonga sira ni Jesus, “Agko kamo kakanun diyan?" 42 Ag tina'wan nira iya nin kau'tuw na sinogbang isra. 43 Kinoko niya adto ag kinaun sa atobangan nira.
44 Kina sominabi iya sa manga disipolo, “Amo adi yo pisabi ko sa inyo kaso kaiba-iba pa ninyo ako, dapat maotob yo nga'min na nasosorat manunungud sa sa'kun adto sa manga kasoratan ni Moises ag adto man sa libro nyo manga propeta saka sa libro nyadtong manga Salmo.” 45 Kina binoksan niya yo sa sakandang manga isipan tanganing maintindiyan nira yo Kasoratan. 46 Ag sinabi niya sa sakanda, “Bagadi yo nasosorat. Ana Mesias kinakaipowan na magtius nin kadipisilan ag magraan alagad sa ikatolong aldaw iya maboboway otro. 47 Ag sa kanyang pangaran ana pagsuwsuw ag kapatawaran nya manga kasa'lan dapat ipangadal sa nga'min na manga nasyon, magpoon sa Jerusalem. 48 Kamo ana magiging manga tistigo ko sa manga bagay na adi. 49 Tandaan ninyo; sosogoon ko sainyo yo ipinanoga nyo sa'kun na Ama'. Kaya di kamo mag-alin sa syodad na adi sagkud na indi ninyo naririsibi yo kapangyariyan na alin sa langit.”
Yo Pagtaas ni Jesus sa Langit
(Mt. 16:19-20; Mga Gibo 1:9-11)
50 Kina iniba sira ni Jesus sa lowas nyadtong syodad. Pag-abot nira sa Betania, itinaas niya yo sa kanyang manga kamut ag pinagbindisyonan sira. 51 Mintras na pinagibindisyonan niya sira, nirayo man iya pataas sa langit. 52 Ag sinamba iya nira, pagkatapos bominalik na yo manga disipolo sa Jerusalem na agko dakuung kaogmaan. 53 Ag padagos sira adto sa templo, ag adto nagi-omaw sa Dios.