23
Dinara si Jesus ki Pilato
(Mt. 27:1-2, 11-14; Mk. 15:1-5; Jn. 18:28-38)
1 Kina yo bilog na konsiyo nagtindug ag dinara si Jesus adto ki Pilato. 2 Ag adto pino'nan nirang pagparasaw'tan si Jesus, na yo sabi, “Narakup namun ading lalaking adi na nanonolsol sa manga tawo na magribildi sa sa'tun na nasyon. Ag pisabi sa manga tawo na indi magbayad nin bowis ki Cesar ag piangkun pa niya na iya yo Cristo, ag usad na Adi'.” 3 Kaya inonga ni Pilato si Jesus, “Ono ika talaga ana Adi' nya manga Judio?” “Amo, ika na mismo yo nagsabi,” simbag ni Jesus.
4 Kaya sinabi ni Pilato adto sa manga namamayo sa manga saserdote ag sa manga tawo, “Uda ako makitang ginibong kasa'lan nyading tawong adi.” 5 Alagad ipinagipirit talaga nira, “Sa paagi nyo sakanyang manga ipitoro pikombinsi niyang maray na magribildi yo bilog na Judea. Nagpoon na iya adto sa Galilea ngowan nadi na iya.”
Dinara si Jesus ki Herodes
6 Kaso marungug adto ni Pilato, ominonga iya kin taga-Galilea si Jesus. 7 Ag kaso maisyan niya na si Jesus alin sa banwaan na nasasakupan ni Herodes, ipinadara niya adi ki Herodes na nyo panaon na adto nasa Jerusalem. 8 Kaso makita ni Herodes si Jesus naogma iyang maray, ta kadakul na iyang nababari'tan manunungud didi. Ag uguy na man iyang nima'wut na makita man niya si Jesus na nigibong milagro. 9 Kaya pinagparaonga niya si Jesus, alagad di basang sominimbag si Jesus maski agbay. 10 Yo manga namamayong manga saserdote ag yo manga paratoro nya kasogoan nakatindug man adto sa o'naan, ag uda pondong pagparasawut nin manlain-lain na mararaut na bagay sa kanya. 11 Pinagparangingiritan man iya ag pinagparatoya-toya ni Herodes ag nyo sa kanyang manga soldados. Kina binadoan iya nin malaoyay na bado ag ipinasaoli ki Pilato. 12 Ag nyo aldaw man sanang adto si Herodes ag si Pilato nagin mag-amigo, na dating magkaro'ro.
Sinintinsyaan si Jesus na Magraan
(Mt. 27:15-26; Mk. 15:6-15; Jn. 18:39---19:16)
13 Ipinaba'no ni Pilato yo manga namamayong saserdote, yo manga namamayong manga Judio ag yo manga tawo. 14 Ag sinabi niya sa sakanda, “Dinara ninyo sa sa'kun ading tawong adi ag isinombong ninyo sa kasa'lan na parapanolsol sa manga tawo tanganing magribildi. Pinag-onga ko iya sa atobangan ninyo alagad uda ako makitang kasa'lan sa nga'min na ipisawut ninyo sa sakanya. 15 Maski si Herodes uda nakitang sala, kaya ngani ipinabalik niya si Jesus sa sa'kun. Kaya di iya dapat padosaan nin kagra'nan. 16 Kaya ipaparapado ko na sana iya saka palolowasun.”
17 Kada Paskwa kaipwan ni Pilato na magpalowas nin usad na nakakarsil para sa sakanda. 18 Alagad sabay-sabay sirang ominuyaw, “Gura'nun ana tawong aan! Ag palowasun si Barrabas!" 19 Nakarsil si Barrabas dail sa pagpoon nyo karibokan na nangyari sa syodad ag nakaguraan pa. 20 Sominabi otro si Pilato sa sakanda dail sa pagma'wut na mapalibri si Jesus. 21 Alagad padagos sira sa pagparauyaw, “Ipako iya sa krus! Ipako sa krus!" 22 Sa ikatolong bisis sinabi ni Pilato adto sa manga tawo, “Taynga? Onong maraut na nagibo nyading tawong adi? Uda man ako makitang rason tanganing ipaguraan iya. Kaya ipaparapado ko na sana iya ag papalowasun.” 23 Alagad mas lalo pa nirang kinusgan yo sakandang manga uyaw ag ipipirit na si Jesus ipako sa krus, ag sa katapos-taposi nasonod yo sakandang pag-uyaw. 24 Kaya si Pilato nagdisisyon na pagtata'wan yo sakandang kagostowan. 25 Pinalowas niya yo lalaking nakarsil dail sa pagribildi ag paguraan, ag itinao sa sakanda si Jesus tanganing gibwun yo sa sakandang kagostowan.
Ipinako si Jesus sa Kros
(Mt. 27:32-44; Mk. 15:21-32; Jn. 19:17-27)
26 Kaso dara na nira si Jesus tanganing ipako, nasabat nira si Simon na taga-Cirene na alin sa bokid, ag pinugul nira adi ag ipinapa'san sakanya yo kros na kasonod ni Jesus.
27 Kadakul yo manga tawong nagisonod ki Jesus, kaiba adto yo manga babaying nagiibi ag nipanambitan sa sakanya. 28 Kinilingan sira ni Jesus ag sinabi sa sakanda, “Manga babayi nin Jerusalem, di ninyo ako pag-ibian. Ibian ninyo ana sainyong manga sadiri ag ana sainyong manga agin. 29 Ta niaboton ana panaon na sasabyun nira, ‘Pinaorog yo manga na babaying baog, yo sakandang tuyan na indi nagmabrus, ag yo manga sosong indi nagpasoso.' 30 Sa manga aldaw na aan sasabyun nya manga tawo adto sa manga bokid, ‘Roma'tog kamo sa'mun!' Ag sa manga bantuy, ‘Ta'bonan ninyo kami!' 31 Kin ana manga bagay na adi ginibo sa sa'kun na boway na kaoy, amo man aan ana gigibwun sainyo na manga uwang na kaoy.
32 Agko pa sira dinarang dowang lalaki na pariyong manga kriminal tanganing guranun kaiba ni Jesus. 33 Kaso omabot na sira sa logar na piba'nong Bongo, ipinako nira sa kros si Jesus, kaiba yo manga kriminal, usad sa parting to'o, ag usad sa parting wala. 34 Ag sinabi ni Jesus, “Ama' ko, patawarun mo tabi sira, ta indi nira isi yo sa sakandang manga pigibo.” Ag nagsogal yo manga soldados tanganing maisyan nira kin arin sa bado ni Jesus yo mapoponta sa kada usad. 35 Yo manga tawo man nakatindug adto, ag nagisugung; ag yo manga namamayo nyadtong banwaan pinagparatuul man iya na yo sabi, “Isinalbar niya yo iba; isalbar man daw niya ngowan ana sakanyang sadiri kin iya talaga ana Mesias, yo Pinili' nin Dios.” 36 Yo manga soldados rominani ag tinuul man iya ag dinaraan nin maawsum na alak. 37 Ag sinabi nira, “Kin ika ana Adi' nya manga Judio, isalbar mo ana saimong sadiri.” 38 Agko nakasorat sa pamaywan niya na mababasa, [Sa sabyun na Griego, Latin ag Hebreo] “AMO ADI ANA ADI' NYA MANGA JUDIO.”
39 Usad adto sa manga kriminal na nakakapako sa kros na kaabay niya yo nagtoya' man sakanya, na yo sabi, “Bukung ika ana Mesias? Isalbar mo ana saimong sadiri, pati man kami!" 40 Alagad sinawi' iya nyo usad, “Ono uda basang ika pagkakatakot sa Dios? Ika man ngani pipadosaan arug niya. 41 Tama sanang padosaan kita nin bagadi ta kita agko manga ginibong manga kasa'lan, alagad ading tawong adi uda basang nagibong kasa'lan.” 42 Ag sinabi niya, “Jesus, rumrumun mo man ako kin adto na ika sa saimong kaadi'an.” 43 Sominimbag si Jesus sa sakanya, “Sa kaostowan pisabi ko saimo, ngowan tolos iiba ko ika sa Paraiso.”
Yo Pagkagraan ni Jesus
(Mt. 27:45-56; Mt. 15:33-41; Jn. 19:28-30)
44 Kaso mag-aalas dosi na nyo odto, nagdulum sa bilog na karagaan sagkud sa oras na alas-tris nin apon. 45 Naudaan nin liwanag yo aldaw, ag yo lingud nyo kortina adto sa templo narapak sa pagbitngaan. 46 Kina ominuyaw si Jesus nin maksug. “Ama', sa manga kamut mo ipisarig ko ana sa'kun na espirito.” Ag pagkasabi niya nyadto, iya naut'san na.
47 Kaso makita nyo Romanong kapitan yo manga pangyayari, nag-omaw iya sa Dios ag sominabi; “Osto talaga na ading tawong adi uda kasa'lan.” 48 Kaso makita nyo manga tawo na nagitipon sa logar na adto yo manga pangyayari, sominamput sirang napapatobtob sa sobrang kamunduan. 49 Alagad yo nga'min na amigo ni Jesus pati na yo manga babaying sominonod sa kanya alin sa Galilea, nakatindug sana sa arayong logar ag nagimasid sa manga pangyayari.
Paglubung ki Jesus
(Mt. 27:57-61; Mk. 15:42-47; Jn. 19:38-42)
50-51 Agko usad na lalaki na yo pangaran Jose, taga-Arimatea, usad na banwaan nin manga Judio. Maraay ag matanos iyang tawo ag kaiba iya sa manga nagi-ugat sa pag-aadi' nin Dios. Dawa kaiba iya sa konsio indi iya ominoyon sa ginibong disisyon tomang ki Jesus. 52 Pominonta iya ki Pilato tanganing makiosip na ayatun na sana niya yo bangkay ni Jesus. 53 Ibinaba niya yo bangkay ni Jesus ag pinotos niya adi nin kayong lino, ag dinara niya adi sa lulub'ngan na ilinobot sa bato, di pa basang adi nalulub'ngan. 54 Aldaw nyadto nin Pagpriparar, ag nipo'non na yo Aldaw nin Pagpapadiskanso.
55 Yo manga babaying sominonod ki Jesus alin sa Galilea, ominiba ki Jose ag nakita nira yo lulub'ngan ag kin paono ibinutang yo lawas ni Jesus adto sa luug nyo lulub'ngan. 56 Kina sominamput na sira ag nagpriparar nin manga pang apwas ag manga paomot. Alagad nagpadiskanso sira kaso omabot yo Aldaw nin Pagpapadiskanso bilang pagsonod sa kasogoan ni Moises.