22
Ana Balak Tomang ki Jesus
(Mt. 26:1-5; Mc. 14:1-2; Jn. 11:45-53)
1 Arani na yo Pista nin Tinapay na Uda Libadora na piba'nong Paskwa. 2 Ag yo manga namamayong saserdote ag yo manga paratoro nya kasogoan nagianap na nin paagi kin paono maipaguraan si Jesus na indi nagkakaribok, ta natatakot sira sa manga tawo.
Trinaydor ni Judas si Jesus
(Mt. 26:14-16; Mc. 14:10-11)
3 Kina si Satanas man lominuug ki Judas na piba'nong Iskariote, usad sa dosing disipolos. 4 Ag pominonta si Judas adto sa manga namamayong saserdote ag sa manga bantay nyo templo ag pinag-osipan nira kin paono niya maitatraydor si Jesus sa sakanda. 5 Naogma sira sa sakandang pag-oosip ag pinanogaan nira si Judas na ta'wan nin sintabo. 6 Ominoyon si Judas nyadto, kaya poon nyadto ominanap na iya nin maray na oportonidad tanganing maitraydor si Jesus na indi naiisiyan nyo manga tawo.
Pagpipriparar para sa Panga'biyan na Pangpaskwa
(Mt. 26:17-25; Mc. 14:12-21; Jn. 13:21-30)
7 Kaso ominabot na yo aldaw nyo Pista nin Tinapay, aldaw nin pagbono' sa ogbon na karniro tanganing iatang. 8 Minandaan ni Jesus si Pedro ag si Juan, saka sinabi sa sakanda, “Pomaadto kamo ag ipriparar ninyo yo sa'tun na panga'biyan na Pangpaskwa.” 9 “Sari mo tabi muyang ipriparar namun?” Onga nira. 10 Sominimbag si Jesus, “Sa pagluug ninyo sa Jerusalem agko kamo makikitang usad na lalaking agko darang usad na bang'ga na agko luug tobig. Somonod kamo sa kanya sa baguy na sakanyang lulu'gan. 11 Ag sabyun ninyo sa kagsadiri nyadtong baguy, ‘Ipipaonga tabi nyo Maestro kin sa'ring kwarto iya pwiding komaun nin Panga'biyan na Pampaskwa, kaiba yo sa kanyang manga disipolo.' 12 Itotoro niya sainyo yo kadakuung kwarto sa itaas na agko na nakapriparar na kagamitan. Adto kamo magpwisto.” 13 Kaya ominagi na sira ag nakita man talaga nira yo nga'min na sinabi sakanda ni Jesus, kaya nagpwisto na sira nyo Panga'biyan na Pampaskwa.
Yo Banal na Panga'biyan
(Mt. 26:26-30; Mk. 14:22-26; 1 Cor. 11: 23-25)
14 Kaso omabot na yo oras nin pangga'biyan, si Jesus ag yo sakanyang manga disipolos ominuga na sa lamisa. 15 Sinabi niya sa sakanda, “Uguy nang panaon na pima'wut ko na makaiba ko kamo sa pagkaun nyading Panga'biyan na Pangpaskwa bago ako magtius. 16 Ta pisabi ko sainyo di na ako otro nyadi nika'nun sagkud sa mangyari adi sa kaadi'an nin Dios.”
17 Pagkatapos ko'non ni Jesus yo kopa, nagpasalamat iya ag sominabi, “Ko'non ninyo adi ag pagbanga-bangaun. 18 Ta pisabi ko sainyo di na ako otro niinomon nyading taguk nin obas sagkud sa omabot yo kaadi'an nin Dios.” 19 Ag kominoko iya nin tinapay, ag nagpasalamat, iniras-iras, ag itinao sa sakanda ag sominabi, “Amo adi ana sa'kun na lawas na ipitao ko sainyo. Gibwun ninyo adi sa pagrumrum sa sa'kun.” 20 Sa pariyong paagi pagkatapos manga'biyan kinoko niya yo kopa, ag sinabi, “Ading kopang adi ana magigin ba'gong tipan nya sa'kun na rogo na paboboloson para sainyo. 21 Alagad kaiba ko didi sa lamisang adi yo tawong magitraydoron sa sa'kun. 22 Yo Agin nin Tawo magagraan oyon adto sa itinirmino sa kanya, alagad malairak yo mamati'un nyo tawong magitraydoron sa sakanya.” 23 Kaya yo manga disipolos nagpoon nang mag-orongaan sa lambang usad kin siisay sa sakanda yo nigibwun nin bagadto.
Yo Pagdiskotir manunungud sa Kadaku'wan
24 Yo manga disipolos nagdiriskotiran sa lambang usad kin siisay sa sakanda yo bibistowun na pinakadakuu. 25 Alagad sinabi ni Jesus sa sakanda, “Ana manga adi' sa kina'ban na adi among agko kapangyariyan sa sakandang manga nasasakupan; ag yo manga nasapodir nipaba'nong paratabang sa banwaan. 26 Alagad di kamo omarug nyaan sakanda. Imbis, yo pinakadakuu sainyo bomutang sa pinakaobin ag yo usad na namamayo omarug sa usad na nagisirbi. 27 Siisay yo pinakadakuu, yo usad na adto sa lamisa o yo nagisirbi? Bukung yo nasa lamisa? Alagad kaiba ninyo ako bilang usad na tagasirbi. 28 Kamo ana pirmi kong kaiba sa nga'min kong manga piagiyan na manga kadipisilan. 29 Kin papaonong pitaga'man ako nya Ama nin kaadi'an, arug man nyaan pitaga'man ko man kamo nin logar sa sa'kun na kaadi'an. 30 Tanganing kamo man mangagkaun ag mangag-inom na kaiba ko adto sa sa'kun na kaadi'an ag maging owis tanganing amo ana mamayo sa dosing tribo nin Israel.”
Sinabi ni Jesus yo Pagdiyar ni Pedro
(Mt. 26:31-35; Mk. 14:27-31; Jn. 13:36-38)
31 Sinabi si Jesus, “Simon, Simon, inayat ni Satanas na tistingun kamo, ag sirniun na baga trigo. 32 Alagad ipinangadyi ko na ika Simon tanganing ana saimong pagtood di manloya. Ag kin ika makabalik na, pakusgun mo yo saimong manga ipat'ngod.” 33 Alagad sominimbag si Pedro, “Kagorangnan, anda akong makarsil ag magraan na kaibanan mo.” 34 Sominimbag si Jesus, “Pisabi ko saimo Pedro, bago tomora'guk sa aldaw na adi ana manok, tolong bisis mo akong ididiyar na di mo ako bistado.”
Bag, Lulu'gan Sintabo, ag Sondang
35 Kina inonga sira ni Jesus, “Kaso kamo minandaan ko na uda darang bag, lulu'gan sintabo, o sandalyas, ono nagkolang kamo nin onoman?” “Indi tabi,” simbag nira. 36 Sinabi niya sa sakanda, “Alagad ngowan kin agko kamo bag daraun ninyo aan ag kin uda kamo sondang ipabakal ninyo ana sainyong alikbuy ag bomakal nin usad. 37 Ta nasosorat: ‘Inarug iya sa manga kriminal,' amo pisabyan ta kamo na kaipwan na maotob adi sa sa'kun. Amo, kin ono man yo nasosorat manunungud sa sa'kun naootob na.” 38 Sinabi nyo manga disipolo, “Ki'tun mo tabi Kagorangnan, agko didi dowang sondang!” “Tama na aan,” simbag ni Jesus.
Yo Pangadyi ni Jesus
(Mt. 26:36-46; Mk. 14:32-42)
39 Si Jesus pominonta adto sa bokid nin manga Olibo arug nyo sakanyang kinaosowan, ag yo sakanyang manga disipolo ominiba man. 40 Pag-abot adto sa logar, sinabi ni Jesus sa sakanda, “Mangadyi kamo tanganing indi kamo matikrag sa tintasyon.”
41 Rominayo-rayo si Jesus nin usad na umut nin bato adto sa sakanyang manga disipolo saka lominood iya ag nangadyi. 42 “Ama' ko, kin pwidi tabi irayo mo sa sa'kun ading kopa nin kadipisilan. Alagad buku ana kagostowan ko ana masonod, kindi ana kagostowan mo.” 43 Kina agko nagpakitang angel sakanya na alin sa langit ag pinakusug yo buut niya. 44 Pono' nin kapu'ngowan nangadyi iya nin mas maigut ag yo sakanyang lo'wa ag inang tominobod sa raga na baga kadarakuung tobod nin rogo.
45 Kina tominindug na iya pagkapangadyi ag bominalik na adto sa saknyang manga disipolo. Naabotan niya sira na manga torog ta grabi yo sa sakandang kapu'ngowan. 46 “Taynga ta manga nagitorog kamo?” Onga niya sa sakanda, “Bomowat kamo ag mangadyi tanganing di kamo matintaran.”
Yo Pagrakup ki Jesus
(Mt. 26:47-56; Mk. 14:43-50; Jn. 18:3-11)
47 Nagisabi pa si Jesus nyo ominabot yo kadakul na tawo, na pipango'naan ni Judas usad sa dosing disipolo. Rinaniyan niya si Jesus ag inarang. 48 Alagad inonga iya ni Jesus, “Judas ipinagitraydor mo ana Agin ni Tawo sa paagi nin arang?" 49 Kaso makita adto nyo manga disipolo ni Jesus kin ono yo mangyayari, sominabi sira, “Kagorangnan manigbas na tabi kami!" 50 Ag usad sa sakanda tinigbas yo sorogoon nyadtong pinakanamamayo sa manga saserdote, ag nataras yo toong talinga nyadto. 51 Alagad sinabi ni Jesus, “Pondowan ninyo aan!” Ag kinaptan niya yo talinga nyo sorogoon ag pinaraay niya adto.
52 Kina, sominabi si Jesus sa manga namamayo sa saserdote, ag sa namamayo nyo manga bantay sa templo, ag sa manga namamayong Judio na pominaadto tanganing rakpun iya, “Ono ako usad na ribildi, ta pominonta kamo didi na agko manga dara-darang manga sondang ag manga pamuspus? 53 Oroaldaw kaiba'an ako ninyo sa luug nyo templo, piro di man ninyo ako pirakup. Alagad aldaw adi ninyo ngowan ag ana kadulman among nagiadi'.”
Pinagdiyaran ni Pedro si Jesus
(Mt. 26:57-58, 69-75; Mk. 14:53-54, 66-72; Jn. 18:12-18, 25-27)
54 Kaya rinakup nira si Jesus ag dinara adto sa baguy nyo pinakanamamayo sa manga saserdote. Ag si Pedro sominonod man piro sa arayo. 55 Yo manga bantay nag-amak nin kalayo adto sa bit'nga nyadtong patyo, ag nag-urugan yo manga tawo sa palibot nyadto, ag si Pedro nakiuga man sa sakanda. 56 Nakita iya nyo sorogoon na babayi na nakakauga sa arani nyadtong kalayo. Kaya biyo iyang piniyaran, ag sominabi, “Ading tawong adi kaiba man ni Jesus.” 57 Alagad idiniyar adi ni Pedro sa babayi ag sominabi, “Babayi, inda ta indi ko iya bistado.” 58 Nataun-taun agko na naman lalaking nakarisa sa sakanya, ag yo sabi, “Usad man ika sa sakanda!” Alagad sominimbag si Pedro, “Lalaki, nasasala ika di ko aan bistado!” 59 Pagkaagi nin usad na oras, agko usad na tawo na rominani ag ipipirit talaga, “Ading lalaking adi kaiba talaga ni Jesus, ta iya usad man na Galileo.” 60 Sominimbag si Pedro, “Lalaki, indi ko isi kin ono ana manga pisabi mo!” Nagisabi pa si Pedro nyo tomora'gok yo manok. 61 Kominiling yo Kagorangnan ag kominita ki Pedro nin diritso. Ag narumruman ni Pedro yo sinabi sa sakanya nyo Kagorangnan: “Bago tomora'gok ana manok sa aldaw na adi tolong bisis mo akong ididiyar.” 62 Kaya lominowas si Pedro ag ominibi nin agko kapaitan.
Tinoya-toya ag Pinus-pusan si Jesus.
(Mt. 26:67-68; Mk. 14:65)
63 Yo manga lalaking nagibantay ki Jesus nagpoon nang magtoya-toya ag pagparapus-pusan iya. 64 Kina tina'guban yo sakanyang mata ag sinabyan, “Sik'ri daw! Kin siisay yo nagpus-pus saimo?" 65 Ag kin ono-ono pang pantoya-toyo yo isinabi pa sa kanya.
Si Jesus sa Atobangan nyo Konsio
(Mt. 26:59-66; Mk. 14:55-64; Jn. 19-24)
66 Kinaodmaan nagtipon yo manga namamayong Judio, yo manga namamayo sa manga saserdote, ag yo manga paratoro nya kasogoan, ag inatobang si Jesus adto sa sakandang pitiponan. 67 Sominabi sira, “Kin ika yo Mesias, sabyun mo sa sa'mun?” Sominimbag si Jesus, “Kin sabyun ko sainyo, di man sana kamo magtood. 68 Ag kin ongaun ko man kamo di man kamo somisimbagun. 69 Alagad poon ngowan, ana Agin nin Tawo omougaun adto sa toong parti nyo Dios na Makapangyariyan sa nga'min.” 70 Ominonga sira intiro. “Muya mong sabyun ika ana Agin nin Dios?” Sominimbag iya, “Tama kamo sa sainyong sinabi na Ako.” 71 Sominabi sira. “Taynga ta kaipwan ta pa nin kadakul na manga tistigo? Narungug ta na mismo alin sa sakanyang ngoso.”