21
Yo Atang nyo Babaing Balo
(Mc. 12:41-44)
1 Mintras na si Jesus nasa templo, nangangalag-kalag iya, ag nakita niya yo mayayaman na nagibutang nyo sa sakandang manga atang sa lulu'gan sa templo. 2 Nakita man niya yo usad na pobring balo na nagbutang man nin dowang gansal na sintabo. 3 Kaya sinabi niya, “Sa kaostowan pisabyan ko kamo, ading pobring balong adi nagbutang nin mas dakul kisa sa iba. 4 Ta parti sana nyo indi na nira kaipwan yo sakandang manga itinao, alagad ading balong adi na pobring-pobri itinao niya yo nga'min niyang ikaboboway.”
Ana manunungud sa Pagkaragba nyo Templo
(Mt. 24:1-2 Mc. 13:1-2)
5 Yo nagkapira niyang disipolo nagiosip-osip manunungud sa malaoyay na manga batong pinagpatong-patong na ginamit adto ag sa manga laooyay na dikorasyon na inatang nyo manga tawo sa Dios. Alagad sinabi ni Jesus, 6 “Omaabaton ana panaon na intirong nakikita ninyong aan marurumpag ag uda itutuda na bato sa sapuw nya kada bato.”
Kariribokan ag Kadipisilan na Niaboton
(Mt. 24:3-14; Mc. 13:3-13)
7 Inonga nira si Jesus, “Maestro, kinaono tabi adi mangyayari? Ag ono ana magigin sinyalis na adi madali nang mangyari?" 8 Sominimbag si Jesus, “Maglikay kamo tanganing indi kamo mailagalag' niisay man. Ta kadakul ana niaboton na omaangkunun nyo pangaran ko, na nisabiyun, ‘Ako yo Cristo,' ag ‘Ana panaon na aan ominabot na.’ Indi kamo tomood sa sakanda. 9 Ag kin marungug ninyo ana manga gira ag ralabanan, di kamo matakot ta dapat mangyari ana manga bagay na adi, alagad buku pa adi yo kataposan.” 10 Ag sinabi pa ni Jesus sa sakanda, “Ana usad na nasyon nitindugun tomang sa usad na nasyon, ag ana kaadi'an tomang sa kaadi'an. 11 Magkakaagko nin makukusug na paglinog, kaponawan, magkakapisti sa manlain-lain na logar, ag agko nilowasun na manga langi-ngilong manga bagay, ag makangangalas na manga sinyalis na alin sa langit. 12 Alagad bago mangyari ana nga'min na adi, rarakpun nawna nira kamo ag oosigun ag dadaraun nira kamo sa manga sinagoga ag sa manga karsilan, ag dadaraun nira kamo sa manga adi' ag gobernador. Gigibwun aan nira nga'min dail sa pagsonod ninyo sa'kun. 13 Alagad amo adi ana magigin oportonidad ninyo tanganing makapagpamatood manunungud sa sa'kun. 14 Kaya itoninung sana ninyo ana sainyong manga isip, di kamo magparaadit kin paono ninyo ididipinsa ana sainyong manga sadiri. 15 Ta ako ana magita'wun sainyo kin ono ana sasabyun ninyo ag nin kadonongan na di kayang sayu'man o paambogan man maski nyo sainyong manga kalaban. 16 Tatraydoron kamo maski nyo sainyong manga gorang, ipat'ngod, irinsya ag amigo ag ipapaguraan yo iba sainyo. 17 Ikauungut kamo nya nga'min na tawo dail sa sa'kun. 18 Alagad uda mauuda sainyo maski usad na pidasong buwuk. 19 Dail sa sainyong manga pagtitius kin makatagal kamo, mapapasainyo ana boway na uda kasagkuran.
Ana manunungud sa Pagkaragba nyo Jerusalem
(Mt. 24:15-21; Mc. 13:14-19)
20 “Kin makita na ninyo yo Jerusalem na napapalibotan na nin manga soldados, urup-urupun ninyo na madali na ana pagkaragba nyadi. 21 Ag ana nasa Judea dumulag nang papontang tokad, ag ana manga nasa kasintroan omalin na diyan, ag yo adto sa lowas nyo syodad di na lumuug pa adto. 22 Ta adi yo Aldaw nin Pagpadosa, tanganing maotob yo nasa kasoratan. 23 Sa aldaw na aan malairak yo manga mabrus ag nagipasoso nyo sakandang manga agin ta omaaboton ana grabing kamunduan sa raga, ag yo kaga'saan nyo Dios sa banwaan na adi. 24 Magagraan sira sa sondang, ag adtong ibang di nagraan dadaraun bilang manga karsil sa nga'min na manga nasyon, ag ana Jerusalem pagbabasangbasangun nin manga Hentil sagkud sa matapos ana panaon na itinao sa sakanda.”
Yo Pagpadidi nyo Agin nin Tawo
(Mt. 24:29-31; Mk. 13:24-27)
25 “Magkakaagko nin manga sinyalis sa aldaw, bolan ag sa manga bitoon. Didi sa raga, ana manga nasyon masisindakan ag malilibungan sa ragobrob, ag dakuung longso sa dagat. 26 Yo manga tawo madidismayo sa takot, dail sa kaiisip nyo manga kara'tan na niaboton didi sa kina'ban, ta matatanyug ag mauuda sa kanya-kanyang aagyan ana manga planita ag manga iba pang arug nyadi sa kalawakan. 27 Sa panaon na adto, makikita nirang niaboton ana Agin nin Tawo na nasa panganoron na agko dakuung kapangyarian ag kamorawayan. 28 Kin magpoon nang mangyari ana manga bagay na adi, tomindug kamo ag tomangad ta ana pagsalbar sainyo arani na.”
Ana Adal Alin sa Kaoy nin Igos
(Mt. 24:32-35; Mk. 13:28-31)
29 Ag sinabi pa ni Jesus sa sakanda yo usad na parabola: “Ki'tun ninyo ana kaoy nin igos ag yo nga'min na kaoy. 30 Kin nagidaon na adi, isi na ninyo na arani na yo tag-init. 31 Kaya kin makita ninyo na nangyayari na ana manga bagay na adi, maiisyan ninyo na yo kaadi'an nin Dios arani na. 32 Pisabi ko sainyo ana kaostowan, mangyayari ana nga'min na bagay na adi bago magraan yo intirong tawo na naboboway sa ngowan. 33 Ana langit ag ana kina'ban mauuda, alagad ana sa'kun na manga sasabyun di mauuda.”
Maglikay kamo
34 “Maglikay kamo sa kapasluan, pagboborat ag sa pag-iisip manunungud sa boway na adi. Ta kin gigibwun ninyo aan, baka aboton pa kamo nyo aldaw na adto na indi priparado. 35 Ta niaboton aan sa intirong tawo sa bilog na kina'ban sa panaon na indi pilaoman. 36 Kaya magin priparado kamo sa nga'min na oras ag pirmi kamong mangadyi na magkaagko nin kusug tanganing makasalbar sa nga'min na mangyayaring adi, ag makaatobang sa Agin nin Tawo.”