20
Pagdowa-dowa sa Podir ni Jesus
(Mt. 21:23-27; Mk. 11:27-33)
1 Usad na aldaw, mintras na si Jesus nagitoro sa luug nyadtong templo ag nipangadal nyo Maray na Barita adto sa manga tawo, rominani sakanya yo manga namamayong saserdote ag yo manga parapangadal nya kasogoan. Kaiba yo manga namamayong manga Judio. 2 Inonga nira si Jesus, “Sabyun mo daw sa sa'mun onong podir mong gibwun ana manga bagay na adi? Siisay ana nagtao saimo nin podir na gibwun adi?" 3 Sominimbag si Jesus, “Oongaun ko man kamo. 4 Siisay nagtao ki Juan nin podir tanganing magbunyag sa manga tawo? Yo Dios o manga tawo?" 5 Ag nag osip-osip sira ag sinabi, “Kin sabyun ta na alin sa Dios; oongaun kita niya, ‘Taynga ta di ninyo tinood si Juan?' 6 Alagad kin sabyun ta man na alin sa manga tawo, boborokon kita nya manga tawo, ta nitood sira na si Juan usad na propeta.” 7 Kaya sominimbag sira ki Jesus, “Di namun isi kin siisay yo nagtao ki Juan nin podir tanganing magbunyag.” 8 Ag sinabi ni Jesus, “Di ko man sasabyun sainyo kin ono ana podir kong gibwun ana manga bagay na adi.”
Ana Parabola manunungud sa Obasan ag sa manga Trabador
(Mt. 21:33-46; Mk. 12:1-12)
9 Kominiling si Jesus sa manga tawo ag sominabi nin usad na parabola, “Agko usad na lalaki na nagtanum sa sakanyang obasan, ag ipinariparo niya adi sa manga kinokong trabador. Ag pominonta iya sa ibang logar ag uwuy na indi bominalik. 10 Kaso ominabot na yo panaon nin gorosiyan, pinaponta niya yo usad niyang sorogoon adto sa manga trabador tanganing ko'non yo sakanyang kairasan sa obas. Alagad binanug sana adi saka pinasamput na uda basang dara. 11 Kaya yo kagsadiri pominaponta pa otro nin usad na naman na sorogoon, alagad binanug man adto ag sinupug ag pinasamput man na uda basang dara. 12 Pinaponta pa niya yo ikatolong sorogoon, kinulgan man adi ag inumut palowas adto sa obasan. 13 Yo kagsadiri nyadtong obasan sominabi, ‘Ono daw kaya ana maray kong gibwun? Isi ko na kin ono! Maray pa sigoro yo namumu'yan kong maray na agin among papontaun ko, sigoradong igagalang iya nira.' 14 Alagad kaso makita nyo manga trabador yo agin nyadtong kagsadiri nag-osip-osip sira ag sominabi. ‘Amo adi ana tagapagmana, gura'nun ta iya, tanganing mapasa'tun ana sakanyang mamanaun.' 15 Kaya ginodgod iya nira palowas adto sa obasan ag ginuraan.
Inonga sira ni Jesus, “Ono kaya yo gigbwun nyo kagsadiri nyadtong obasan sa manga trabador? 16 Pisabi ko sainyo pomapaadtowun iya ag guguranun man yo manga trabador ag itatao yo sakanyang obasan adto sa iba.” Kaso marungug adto nyo manga tawo, sominabi sira “Di man logod mangyari!" 17 Kinita sira nin diritso ni Jesus saka inonga, “Ono palan yo muyang sabyun nyadtong nasosorat adto sa kasoratan?
‘Yo batong inindian nyo manga taga togrok nin baguy
amo yo naging batong pasu'naran.' 18 Ana lambang matikrag sa batong adi magkakapusa-pusa, ag ana siisay man na matikragan nya batong adi magkakaronot-ronot.”
Ana Pagbayad nin Bowis
(Mt. 22:15-22; Mk. 12:13-17)
19 Kaso marungug nyo manga parapangadal nya kasogoan ag nyo manga namamayong manga saserdote yo isinabi ni Jesus, iningowa nirang rakpun tolos si Jesus ta namati' nirang sira yo pipatamaan nyo parabolang adto. Alagad natatakot sira sa manga tawo. 20 Kaya nag-uwat sira nin oportonidad, sominogo sira nin manga ispiya na magsagin-sagin na nianap nin kaostowan, tanganing rakpun si Jesus sa sakanyang pagisabi, tanganing maisombong nira iya sa gobernador. 21 Sinabi nyo manga ispiya ki Jesus, “Maestro, isi tabi namun na ana manga ipisabi mo ag manga ipitoro tama, ag indi ika namimili' nin tawo, ag ana ipitoro mo yo kabu'tan nyo Dios na gibwun nya manga tawo. 22 Ono daw tabi oyon sa kasogoan na magbayad kita nin bowis ki Cesar o indi?" 23 Alagad isi ni Jesus yo maraut nirang katoyowan kaya sinabi niya. 24 “Paayat nin usad na dinaryo. Kiisay na lalawgun ag pangaran ana nakabutang didi?" 25 “Ki Cesar,” simbag nira. Sinabi ni Jesus sa sakanda, “Itao ninyo ki Cesar yo para ki Cesar, ag itao ninyo sa Dios kin ono ana para sa Dios. 26 Kaya uda nangyari sa plano nirang rakpun si Jesus na agko iya masabing sala sa atobangan nyo manga tawo, imbis, nagkakangalas sira sa simbag niya sa sakanda, kaya nagtoninung na sana sira.
Pagdowa-dowa manunungud sa Pagkaboway Otro
(Mt. 22:23-33; Mk. 12:18-27)
27 Agko nagkapirang Saduseo na rominani ki Jesus ag ominonga. Indi sira nitood na agko pagkaboway otro ana manga guraan. 28 “Maestro,” sabi nira, “Nagsorat tabi sa'mun si Moises na kin ana ipat'ngod na lalaki magraan ag maba'yan yo sakanyang sugud na uda agin, kaip'wan pakasalan nyadtong ipat'ngod niyang lalaki yo balo tanganing magkaagko sira agin para adto sa subang na ipat'ngod na nagraan. 29 Agko pitong mag-oroipat'ngod na lalaki. Yo subang sominugud ag nagraan na uda agin. 30 Yo pangdowa nagpakasal adto sa balo, ag nagraan man. 31 Ag yo pangtolo nagpakasal man sa balo, ag pariyo man nyo nangyari sagkud adto sa ikapito nga'min sira nagraan na uda agin. 32 Sa katapos-taposi nagraan man yo babayi. 33 Ngowan sa pagkaboway otro nya manga guraan siisay yo bibistowun na sugud nyadtong babayi. Ta nasugud niya yo pitong mag-oroipat'ngod?" 34 Sominimbag si Jesus, “Ana manga babayi ag lalaki sa panaon na adi nisuruguran. 35 Alagad adto sa manga tawong maninigong bowayun para sa ikadowang boway indi na nisugurun. 36 Ag indi na sira magagraan, ta magiging arug na sira sa manga angel, ag magigin agin na sira nin Dios ta sira binoway otro. 37 Ag pipamato'ran adi ni Moises na piboway otro yo manga guraan, kaso makita niya yo kaababang poon nin kaoy na nagiludab, yo Kagorangnan bina'no niyang Dios ni Abraham, Isaac, ag ni Jacob. 38 Ag iya buku Dios nin manga guraan, kindi iya Dios nin manga boway, sa paagi niya naboboway ana nga'min.” 39 Agko nagkapirang paraturo nya kasogoan yo sominabi, “Maray ana saimong simbag Maestro!" 40 Ag uda na namoso' na omonga pa sa sakanya nin ono man na manga kaongaan.
Ana Onga ni Jesus manunungud sa Agin ni David
(Mt. 22:41-46; Mk. 12:35-37)
41 Kina sominabi si Jesus sa sakanda, “Paonong masasabi ninyo na ana Mesias amo ana agin ni David? 42 Si David na mismo yo sominabi sa Libro nyo manga Salmo:
‘Yo Kagorangnan sominabi sa sa'kun na Kagorangnan:
Umuwa ika sa sa'kun na toong parti,'
43 Sagkud sa ana saimong manga kalaban gibwun kong tongtongan nya saimong manga paa.' 44 Si David na mismong bomina'no sa kanya ng Kagorangnan. Kaya paonong mababanong agin ni David yo Mesias?"
Patanid Tomang sa manga Paratoro nya Kasogoan
(Mt. 23:1-36; Mk. 12:38-40)
45 Mintras na nagirungug yo nga'min na manga tawo, sominabi si Jesus sa sakanyang manga disipolo, 46 “Maglikay kamo sa manga paratoro nya kasogoan na naoogmang mag-agi na agko maabang bado, ag namumuyang pagparaomawun adto sa sa'ran. Ag ana muya nira yo pinaka maray na uu'gan sa sinagoga, ag maooyay na uu'gun adto sa manga andaan. 47 Piobos nira yo pagsorosadiri nyadtong manga babaing balo na yo ipisarawtan adtong pagpangadyi nin malaaaba mas lalong nibu'gatun yo kapadosaan sa sakanda.”