19
Si Jesus ag si Zaqueo
1 Nagluug si Jesus sa Jerico ag ominagi sa kasintrowan. 2 Adto agko usad na lalaki na ana pangaran Zaqueo. Iya yo namamayo sa manga parasingil nin bowis, ag malayaman niyang maray. 3 Minawut niyang makita si Jesus tanganing mabisto kin siisay adi. Alagad ta kaababa niya, ag kadakul yo manga tawo kaya indi niya makita si Jesus. 4 Kaya dominalagan iya sa o'naan ag pominanik sa kaoy nin sikomoro na nasa gilid nyo tinampo, tanganing makita niya si Jesus na adto niagiyun. 5 Pag-abot ni Jesus sa tung-tung na adto, tinangad niya si Zaqueo ag sinabiyan, “Zaqueo, bomaba ika tolos diyan. Ta kaipwan kong domagos ngowan sa baguy mo.” 6 Kaya dali-dali man tolos bominaba si Zaqueo ag maogmang-maogmang inako si Jesus sa sakanyang baguy. 7 Alagad yo nga'min na tawong nakakita nyadto nag-iring-ingan, na yo sabi, “Nakikidagos iya sa manga makasa'lan.” 8 Mintras, tominindug si Zaqueo ag sominabi sa Kagorangnan, “Kagorangnan, itatao ko tabi sa manga pobri yo kabanga nyo sa'kun na pagsorosadiri, ag kin agko man ako nadaya na siisay man, isasaoli ko sa sakanda nin upat na dobli yo kantidad.” 9 Sominabi si Jesus sa sakanya, “Ngowan ominabot yo kaligtasan sa baguy na adi, ta ading lalaking adi agin man ni Abraham. 10 Ta pominadidi yo Agin nin Tawo tanganing anapun ag isalbar yo manga nauuda.”
Ana Parabola manunugud sa Bolawan na Sintabo
(Mt. 25:14-30)
11 Mintras na nagirungug ki Jesus yo manga tawo, sominabi pa iya nin usad na parabola, ta nipadangadang na iya sa Jerusalem ag sa pagtaud nyo manga tawo maaayag na yo kaadi'an nin Dios. 12 Sabi niya, “Agko usad na lalaking alin sa ipigalang na pamilya na pominonta sa arayong logar tanganing gibwun adi', ag magbalik pagkatapos nyadto. 13 Bago iya ominalin, bina'no niya yo sakanyang sampolong sorogoon ag tina'wan nin tig-uusad na bolawan na sintabo ag sinabyan, ‘Kapitalun ninyo ading sintabong adi sagkud sa makabalik ako.' 14 Alagad grabi yo kaungtan nyo sakanyang manga kababayan, kaya pagkaalin niya nagpasogo sira nin manga diligado tanganing sabyun, ‘Di namun muyang maging adi' ana tawong adi.'
15 Alagad ginibo man dayaday adi' yo tawong adto, ag pagkatapos sominamput na sa sakanyang baguy. Ag ipinaba'no niya yo manga sorogoon na tina'wan nin bolawan na sintabo tanganing maisyan kin pira yo itinobo nyo kada usad. 16 Rominani yo o'nang sorogoon ag sominabi, ‘Among, yo bolawan na sintabong itinao mo sa'kun nagtobo nin sampolo.' 17 Sominimbag yo among, ‘Maraay, maraay kong sorogoon! Ta naging sinsiro ika sa saday na bagay, pamamaalaun ko ika sa sampolong syodad.' 18 Rominani man yo ikadowa ag sominabi, ‘Among, yo saimong bolawan na sintabo nagtobo nin lima.' 19 Yo sakanyang among sominimbag, ‘Mamamaala ika sa limang syodad.' 20 Ag rominani man yo usad pang sorogoon ag sominabi, ‘Kagorangnan, moadi yo saimong bolawan na sintabo; pinotos ko sa panyo ag isinaray. 21 Natatakot tabi kaya ako saimo, ta laigpit mong tawo. Pikoko mo yo buku mo man pinagpagalan ag pigosi mo yo di mo man itinanum.' 22 Sominimbag yo sakanyang among, ‘Maraut na oripun! Sa sasabyun mo man sanang aan ko ika oosgaran. Isi mo palan na laigpit kong tawo, ta pikoko ko yo di ko man pinagpagalan, ag pigosi ko yo di ko man itinanum. 23 Taynga ta di mo ibinutang yo sintabo sa bangko. Di kinta'na sa pagbalik ko agko na adi tobo.' 24 Ag sinabi niya sa manga aadto, ‘Ko'non ninyo sakanya ana bolawan na sintabo ag itao sa agko sampolong bolawan na sintabo.' 25 Alagad sominimbag sira, ‘Kagorangnan, agko na tabi iya sampolo!' 26 Sominimbag yo kagorangnan, ‘Pisabyan ko kamo ana siisay man na agko, tata'wan pa, alagad adto sa uda, maski yo kaagbay na nasa sakanya koko'non pa. 27 Adto man sa manga kalaban ko na di muyang maging adi' ako sa sakanda daraun ninyo didi ag gu'ranun sa atobangan ko.’ ”
Ana Mapanganang Pagluug sa Jerusalem
(Mt. 21:1-11; Mc. 11:1-11; Jn. 12:12-19)
28 Pagkatapos ading sabyun ni Jesus, nagpa'ona iya paponta sa Jerusalem. 29 Kaso ni dangadang na si Jesus sa Betfage ag Betania, sa bokid na piba'nong Bokid nin manga Olibo, sinogo niya yo dowa sa sakanyang manga disipolos ag tinogon nin bagadi, 30 “Pomanta kamo sa sosonod na baryo, ag pag-abot ninyo adto, agko kamo makikitang usad na ogbon na asno na nakaguguud, di pa adi nakakabaywan maski niisay. Obadun ninyo adi ag daraun sa sa'kun. 31 Kin agko omonga sa sainyo, kin taynga ta piobad aan ninyo? Sabyun ninyo, ‘Kaipwan adi nin Kagorangnan.’ ”
32 Kaya ominagi na yo manga minandaan ag naanap man talaga nira yo asno oyon sa pagkasabi sa sakanda ni Jesus. 33 Kaso piobad na nira yo guud nyo asno, inonga sira nyo manga kagsadiri, “Taynga ta piobad aan ninyo?" 34 Sominimbag sira, “Kaipwan adi nin Kagorangnan.” 35 Dinara nira adi ki Jesus, ag inapin nira yo sakandang manga alikbuy sa tawtod nyadtong asno ag pinalonad si Jesus. 36 Mintras na iya nangangabayo, ipibibukad man nyo manga tawo yo sakandang manga alikbuy sa tinampo. 37 Kaso nipadangadang na iya pabolsat, alin sa Bokid nin manga Olibo, yo nga'min niyang manga disipolo nagpoon nang magkaragratan sa kaogmaan, ag nagiomaw sa Dios dail sa nga'min na milagrong nakita nira. 38 Yo sabi nira, “Omawun ana Adi' na niabot sa pangaran nyo Kagorangnan! Katoninungan sa kalangitan ag kamorawayan sa Dios.”
39 Agko nagkapirang Pariseo na aadto sa kadaklan ana sominabi ki Jesus, “Maestro sawiun mo ana saimong manga disipolos sa sakandang pagparauyaw.” 40 Sominimbag si Jesus, “Pisabyan ko kamo, sabi ni Jesus, kin sira pomondo, ading manga batong adi na among umuuyawun.”
Inibian ni Jesus yo Jerusalem
41 Kaso si Jesus arani na ag natata'naw na niya yo Jerusalem, inibian niya adi. 42 Ag sinabi niya, “Kin isi mo sana sa aldaw na adi kin ono yo makakapagtao saimo nin katoninungan, alagad naluluum adi ngowan sa saimong manga mata. 43 Ta niaboton yo aldaw na palilibotan ika nyo saimong manga kalaban, lalaumun, ag gigipitun ika sa kada gilid. 44 Rara'tun ika nira ag gugura'nun ika ag yo saimong manga agin sa luug nyo saimong lunub. Uda sira itutudang bato sa sapuw nya kada bato, ta indi mo inintindi yo pag-abot nin Dios saimo tanganing isalbar ika.
Yo Paglinig sa Templo
(Mt. 21:12-17; Mk. 11:15-19; Jn. 2:13-22)
45 Kina si Jesus lominuug sa templo ag pino'nan na niyang ipangsobol palowas yo manga paratinda. 46 Sinabi niya sa sakanda, “Nasosorat, ‘Ana sa'kun na baguy baba'nowun na baguy pangadyian.’ Alagad ginibo ninyong sawug nin manga maonas.”
47 Oroaldaw si Jesus nagitoro adto sa templo alagad yo namamayo sa manga saserdote ag yo manga parapangadal nya kasogoan ag yo manga namamayong manga Judio iningowang maipagraan si Jesus. 48 Alagad uda sira maanap na paagi na gibwun adi, ta yo nga'min na tawo padagos na nirungug nyo sakanyang manga sasabyun.