18
Ana Parabola manunungud sa Babaying Balo ag sa Usad na Owis
1 Usad na aldaw sinabi ni Jesus sa sakanyang manga disipolo yo usad na parabola tanganing toroan sira na pirming mangadyi ag indi manloya. 2 Sabi niya; “Sa usad na syodad agko owis na indi basang natatakot sa Dios ag uda tawong ipigalang. 3 Sa syodad man na adto agko usad na babaying balo na pirming ni parabalik-balik adto sa owis ag siging pakimairak na ta'wan nin ostisya tomang adto sa nangulug sakanya. 4 Sa luug nin uguy na panaon pirmi sanang niparasayoma yo owis, alagad sa katapostaposi sinabi nyadi sa sakanyang sadiri, ‘Dawa di ako natatakot sa Dios ag di nigalang maski kiisay man, 5 itatao ko na sa balong adi yo ostisyang piayat niya. Tanganing di na niya ako pagparapirwisyowun, baka maoyam pa ako sa kapapadidi niya.’ ” 6 Ag sominabi yo Kagorangnan, “Narungug ninyo kin ono yo sinabi nyo maraut na owis. 7 Itatao daw nin Dios ana ostiya sa manga pinili' niya na nagiagrangay sakanya sa aldaw ag ga'bi? Mag-abala pa daw iya sa pagtabang sa sakanda? 8 Pisabi ko sainyo, itatao niya tolos ana ostisya sa sakanda. Alagad sa pag-abot nyo Agin nin Tawo sa kina'ban na adi, agko pa daw iya matorakan na manga tawong paratood sa kanya?"
Ana Parabola manunungud sa Pariseo ag sa Parasingil nin Bowis
9 Sominabi pa si Jesus nin usad na parabola para adto sa iba na ana pagtaud sa sakandang manga sadiri malaraay na ag niminos man sa iba: 10 “Agko dowang lalaki na pominonta sa templo tanganing magpangadyi. Yo usad Pariseo ag yo usad parasingil nin bowis. 11 Tominindug yo Pariseo ag nangadyi na iya sana yo nakarurungug, ‘O Dios, nagipasalamat ako saimo ta ako bukung arug nyo iba na manga maoonas, manga mandaraya, manga parasambay, o kaya arug nyading parasingil nin bowis na adi. 12 Dowang bisis akong niayono sa usad na simana ag ipitao ko yo sa'kun na ikapo sa intiro kong pidilinsya.' 13 Alagad yo parasingil nin bowis nakatindug sa arayo. Di man basang makatangad sa langit, kindi piparatobtob yo sakanyang rugan ag nisabi nin bagadi, ‘Dios ko, kairaki man tabi ako na usad na makasa'lan.' 14 Pisabi ko sainyo, ading lalaking adi sominamput na matanos sa atobangan nin Dios buku yo Pariseo. Ta ana lambang nipakataas ipibaba, ag ana nagipakaori ipitaas.”
Pinagbindisyonan ni Jesus yo manga Saraday na Agin
(Mt. 19:13-15; Mc. 10:13-16)
15 Usad na aldaw agko nagkapirang gorang na dominara ki Jesus nin sakandang manga agin tanganing ipakiosip na iruta yo sakanyang kamut ag bindisyonan ana manga adto. Kaso makita adto nyo manga disipolo sinawi' nira adto. 16 Alagad bina'no ni Jesus yo manga agin ag sominabi sa sakanyang manga disipolo, “Paba'yan ninyong romani sa sa'kun ana manga agin. Di ninyo sira pag-ulangun, ta sa manga arug nira nagiadi' ana Dios. 17 Pisabi ko sainyo ana kaostowan, ana siisay man na indi omako sa kaadi'an nin Dios arug sa saraday na agin na adi indi makakalug adto.”
Yo Usad na Lalaking Mayaman
(Mt. 19:16-30; Mc. 10:17-31)
18 Agko usad na namamayo na ominonga ki Jesus, “Maray na Maestro, ono tabi ana dapat kong gibwun tanganing magkaagko ako boway na uda kasagkuran?" 19 Sinimbag iya ni Jesus, “Taynga ta piba'no mo akong maray? Uda ibang maray kindi ana Dios sana. 20 Alagad para sa saimong kaongaan, isi mo ana kasogoan: ‘Di ika magsambay, di ika manguraan, di ika mangonas, di ika magpotnay sa saimong pagtistigo, igalang mo ana saimong ama' ag ina'.’ ” 21 Sominimbag yo lalaki, “Nagibo ko na tabi aan nga'min na kasogoan na aan poon pa kaso ako agin pa sana.” 22 Kaso marungug adi ni Jesus, sominabi iya adto sa lalaki, “Agko pa ika usad na dapat gibwun. Ipabakal mo ana intiro mong pagsorosadiri ag ipanao mo adto sa manga pobri, ag magkakaagko ika nin kayamanan adto sa langit. Kina pomadidi ika ag somonod sa sa'kun.” 23 Kaso marungug adto nyo lalaki napu'nguw iya, ta iya usad na lalaking malayaman. 24 Nakita ni Jesus na napu'nguw yo lalaki, kaya sominabi iya, “Kadipisil sa manga mayaman na tawo na maka'luug sa kaadi'an nin Dios! 25 Mas madali pa sa usad na kamilyo na lomuug sa lobot nyo ragom kisa sa usad na mayaman na makaluug sa kaadi'an nin Dios.” 26 Nag-onga sakanya yo manga nakarungug nyadto, “Siisay sana palan tabi yo masasalbar?" 27 Sominimbag si Jesus, “Ono man ana imposible sa tawo bukung imposible sa Dios.”
28 Saka sominabi si Pedro ki Jesus, “Ki'tun tabi ninyo, bina'yan namun yo intirong sa sa'mun tanganing somonod sa saimo.” 29 Sinimbag iya ni Jesus, “Sa kaostowan pisabyan ko kamo, ana siisay man na magbaya nya sakanyang baguy, nyo sakanyang sugud, o gorang, o nyo sakanyang agin dail sa kaadi'an nin Dios, 30 makakaako nin mas dakul sa panaon na adi ag sa boway na uda kasagkuran sa panaon na niaboton.”
Ikatolong Pagsabi ni Jesus manunungud sa Kanyang Kagra'nan
(Mt. 20:17-19: Mc. 10:32-34)
31 Isinoway ni Jesus yo dosing disipolos ag sinabi sa sakanda, “Nipontaun na kita sa Jerusalem ag adto maootob na yo nga'min na sinorat nyo manga propeta manunungud sa Agin nin Tawo. \v 32 Itatao iya sa manga Hentil, ag gigibwun kangingiritan, totoya'toyaun, ag lolostaban. 33 Kukulgan iya ag gugura'nun alagad sa ikatolong aldaw maboboway otro.” 34 Alagad uda basang naintindiyan yo manga disipolo maski ono sa manga sinabi ni Jesus, ta indi pa adto ipinapaintindi sa sakanda. Kaya indi nira makoko yo gostong sabyun nyadto, ag di man basang nira naisyan kin ono yo ipisabi ni Jesus.
Yo Pagparaay sa Lalaking Bota
(Mt. 20:29-34; Mc. 46-52)
35 Kaso arani na si Jesus sa Jerico, agko usad na lalaking bota na nakauga sa gilid nyo tinampo ag nipakilimos, 36 Kaso marungug nyadi yo kadakul na tawong niagi, ominonga iya kin ono yo nangyayari. 37 Sinabyan iya, “Si Jesus na taga-Nazaret nagiliis sa logar na adi.” 38 Kaya ominuyaw yo lalaking bota, “Jesus, Agin ni David, mairak tabi ika sa sa'kun!" 39 Sinawi' iya nyo manga tawong nasa o'naan ni Jesus ag sinabyan na pomondo, alagad mas lalo pa niyang kinusgan yo sakanyang pag-uyaw, “Agin ni David, mairak tabi ika sa sa'kun!" 40 Kaya pominondo si Jesus ag sominogo na daraun sakanya yo bota. Kaso makarani na iya, inonga iya ni Jesus. 41 “Onong muya mong gibwun ko saimo?” “Kagorangnan, muya ko kinta'na tabing bomalik ana sa'kun na pagsuung,” simbag niya. 42 Sominabi si Jesus sa kanya, “Makakakita na ika! Pinaraay ika dail sa saimong pagtood.” 43 Adto man sana nakakita na yo lalaki ag sominonod ki Jesus, ag nagipasalamat sa Dios. Kaso makita adi nyo manga tao, intiro sira nag-omaw man sa Dios.