17
Manga Pipo'nan nin Pagkakasala
(Mt. 18:6-7, 21-22; Mk. 9:42)
1 Usad na aldaw sominabi si Jesus sa sakanyang manga disipolo, “Ana pipo'nan tanganing magkasala' ana manga tawo pirming didiyan, alagad malairak sa tawong pipo'nan nyaan. 2 Mas maray pa sakanya na nagugu'ran nin dakuung bato sa sakanyang liug ag iumut sa dagat kisa amo pang magin sarawtan na magkasala' yo usad sa manga saraday na adi. 3 Kaya maglikay kamo. Kin magkasala' ana saimong ipat'ngod, sawiun mo, ag kin magsuwsuw, patawarun mo. 4 Kin magkasala' iya saimo nin dakul na bisis sa luug nin usad na aldaw, ag dakul na bisis man na romani saimo ag magsabi, ‘Nagisuwsuw na ako,' patawarun mo.”
Pagtood sa Dios
5 Yo manga apostol sominabi sa Kagorangnan, “Rogangan mo man tabi ana sa'mun na pagtood.” 6 Sinimbag sira nin Kagorangnan, “Kin magin kasing dakuu basang nya to'wang nin mostasa ana sainyong pagtood, masasabi ninyo sa kaoy nin sikomorong adi, ‘Magabot ika ag matanum sa dagat,' ag sosondon ika nyaan.”
Ana Katungran nin Usad na Oripun
7 “Alimbawa usad sainyo agko usad na oripun na nagiarado o nagiataman nin manga karniro. Pag-abot daw niya alin sa tokad sasabyun daw ninyo sakanya, ‘Marna ta magkaun na ika.' 8 Indi! Imbis sasabyun ninyo, ‘Mag oto ika nin sa'kun na pagkaun, magsangli' ika ag pagsirbiyan mo ako ag mag-uwat ika na makatapos ako nin pagkaun; pagkakaun ko pwidi na ikang komaun.” 9 Papamabalosan daw niya yo sa kanyang sorogoon ta ginibo nyadi yo sakanyang isinogo'? 10 Arug man nyaan kin nagibo na ninyo yo nga'min na manga ipisogo sainyo, sabyun ninyo, ‘Buku kaming angay na umawun. Ta kami manga sorogoon man sana na gominibo nyo sa sa'mun na manga obligasyon.’ ”
Yo Pagparaay sa Sampolong Pudpurun
11 Kaso si Jesus paponta sa Jerusalem, ominagi iya sa pagdolonan nyo Samaria ag Galilea. 12 Kaso nipaluug na iya sa usad na baryo, sinabat iya nin sampolong lalaking pudpurun, ag tominurung sira sa oro-arayo. 13 Ag ominuyaw sira nin maksug, “Jesus! Kagorangnan, kairakan mo man tabi kami!" 14 Kaso makita sira ni Jesus sinabi sa sakanda, “Agina kamo ag ipakita ninyo ana sainyong manga sadiri adto sa manga saserdote.” Nipaadto pa sana sira, nagkararaay na sira. 15 Kaso marisa nyo usad na iya maraay na, nagbalik iyang nagiuyaw nin pag-omaw sa Dios. 16 Lominood iya sa atobangan ni Jesus ag nagpamabalos. Ading lalaking adi usad na Samaritano. 17 Ominonga si Jesus, “Bukung sampolo yo sa'kun na pinaraay? Sa'ri na yo siyam? 18 Da basang nagbalik tanganing mag-omaw sa Dios pwira sa usad na dayowan na adi? 19 Kina sinabyan iya ni Jesus, “Tomindug na ika ag somamput na. Ana saimong pagtood among nagparaay saimo.”
Pag-abot nyo Kaadi'an nin Dios
(Mt. 24:23-28, 37-41)
20 Usad na aldaw inonga si Jesus nyo manga Pariseo kin kinaono niaboton yo kaadi'an nin Dios. Sominimbag si Jesus, “Ana kaadi'an nin Dios niaboton na uda makikitang sinyalis. 21 Ag uda makakapagsabi na, ‘Moadi na, o kaya moadto na,' ta ana kaadi'an nin Dios didiyan na sa sainyong poso'.”
22 Pagtaun-taun sinabi niya adi sa sakanyang manga disipolo. “Niaboton ana panaon na mama'wutun ninyong makita ana usad sa manga aldaw nya Agin nin Tao, alagad indi adi ninyo makikita. 23 Ag kin sabyan sainyo nya manga tawo, ‘Adto na iya! O Moadi na iya!' Di kamo magtood ag di omiba sakanda. 24 Ta sa aldaw na aan ana Agin nin Tawo niaboton na baga kilat na nikurab ag nisilyab sa kalangitan poon sa pinag-alinan sagkud sa popontaan. 25 Alagad kaipwan nawna niyang magtius nin kadakul na kadipisilan, ag isisikwal iya nyo manga tawo sa kapanaonan na adi. 26 Kin ono yo nangyari nyadtong panaon ni Noe, amo man sa aldaw nya Agin ni Tawo. 27 Nyadto, yo manga tawo nikaraun, niirinoman, nisuruguran, sagkud sa omabot yo aldaw na si Noe lominuug na sa arka. Kina ominabot yo baa' ag nagkauumus sira intiro. 28 Arug man nyadtong panaon ni Lot. Yo manga tawo nagikaraun, nagiirinoman, nibakal ag nipabakal, nagitanum, ag nagitorogrokan nin baguy. 29 Alagad nyo aldaw na ba'yan ni Lot yo Sodoma, ominoran nin kalayo ag asopri na nagialin sa langit ag natumbud sira intiro. 30 Arug man nyaan sa aldaw na magpakita na ana Agin nin Tawo. 31 Sa aldaw na aan, uda na tawong nasa itaas nyo atup na nibabaun tanganing ko'non yo sakanyang manga pagsorosadiri sa luug nyo baguy. Bagaan man ana manga nasa tokad di na bomalik pa tanganing komoko nin ono man. 32 Rumrumun ninyo kin ono yo nangyari sa sugud ni Lot. 33 Ana siisay man na niingowang ilisabar ana sakanyang boway mauudaan nyaan, alagad ana siisay man na mau'dan nin boway among magkakaagko. 34 Pisabyan ko kamo, sa ga'bing aan agko dowang tawo sa usad na babatangan, koko'non yo usad ag ioobon yo usad. 35 Agko dowang babaying magkaibang nigiling; koko'non yo usad ag ioobon yo usad. 36 Agko dowang lalaking nitrabao sa tokad; koko'non yo usad ag ioobon yo usad. 37 “Sari tabi Kagorangnan?” Onga nyo sakanyang manga disipolos, sominimbag si Jesus, “Kin sa'ri agko guraan, aadto man yo manga buwitrea nagitipon.”