16
Ana Parabola manunungud sa Tosong Katiwala
1 Sominabi si Jesus sa sakanyang manga disipolo, “Agko usad na lalaking mayaman na agko katiwala. Isinombong sakanya na piparagasta sana nyo katiwala yo sakanyang pagsorosadiri. 2 Kaya ipinaba'no niya adto ag inonga; ‘Ono ading narurungug ko manunungud saimo? Ta'wi daw ako nin lista nya nga'min na piriparo mo sa pagsorosadiri ko, ta poon ngowan buku na ika ana sa'kun na katiwala.’ 3 Nasabi nyo katiwala sa sakanyang sadiri, ‘Ono daw gigibwun ko ngowan? Yo sa'kun na among tinangkas na ako sa trabao. Di ko man kayang magtrabao sa tokad ag nasusupug man akong makilimos. 4 Ay isi ko na kin ono ana gigibwun ko, mau'dan man akong trabao didi, agko man dayaday manga tawong omaakoon sa'kun adto sa sakandang baguy amo adi ana gigibwun ko. 5 Kaya usad-usad niyang ipinaba'no yo manga agko otang sa sakanyang among. Inonga niya yo usad, ‘Pirang kantidad yo na otang mo sa sa'kun na among?' 6 Sominimbag adi, ‘Otso syintos na kantinir na lanang oliba.'a Sinabi nyo katiwala sakanya, ‘Moadi yo paniba'gong listaan nya saimong inotang. Dali, umuga ika ag gibwun mong kinientos na sanang kantinir na lanang olibo.' 7 Kina inonga niya yo pangdowa, ‘Ika man pira yo saimong otang?' ‘Sanggatos na trigo tabi,' simbag nyadi. Sinabyan iya nyo katiwala, ‘Mwadi yo listaan nyo saimong inotang; isorat mo otsinta na sanang kaban nin trigo. 8 Inomaw nyo among yo tosong katiwala sa kadonongan na ipinakita nyadi. Ta ana manga tawo didi sa kina'ban mas madodonong pang gomibo nin paagi para sa sakandang sadiri kisa manga tawo sa kaliwanagan. 9 Pisabi ko sainyo, gamitun ninyo ana sainyong manga kayamanan didi sa kina'ban tanganing makakoko kamo nin manga amigo. Dawa maobos aan, agko man dayaday nipadagoson sa inyo adto sa istaran na uda kasagkuran. 10 Ana mapagkakatiwalaan sa saday na bagay mapagkakatiwalaan man sa dakuung bagay. Ana madaya sa saday na bagay, madaya man sa dakuung bagay. 11 Kin di ika mapagkakatiwalaan nya kayamanan didi sa kina'ban, siisay saimong magtiwala nin ostong kayamanan? 12 Ag kin di ika mapagkakatiwalaan sa pagsorosadiri nin iba, siisay saimong magtao nyo talagang para sa saimo? 13 Uda oripun na makapagsisirbi sa dowang among. Ta ikauungut niya yo usad ag mamumuyan yo usad, o kaya magiging sinsiro iya sa usad ag miminoson yo usad. Di kamo makakapagsirbi nin sabay sa Dios ag sa Kayamanan.”
Nagkapirang Oosipun na Nagialin ki Jesus
(Mt. 11:12-13; 5:31-32; Mk. 10:11-12)
14 Yo manga Pariseo na manga angap sa sintabo, narungug nira nga'min adto kaya pinagparangiritan nira si Jesus. 15 Alagad sinabi ni Jesus sa sakanda, “Kamong manga parasagin-sagin na maraay sa atobangan nin manga tawo, alagad isi nin Dios kin ono yo nasa poso' ninyo. Kin ono ana pitawan importansya nyo manga tawo, kaoyam-oyam sa atobangan nin Dios.
16 “Yo kasogoan ni Moises ag0 yo manga isinorat nyo manga propeta sagkud sa panaon ni Juan na parabunyag. Poon nyadto ipinamarita na yo maray na barita manunungud sa kaadi'an nin Dios, ag yo lambang usad nagipirit na makaluug adto. 17 Madali pang mauda ana langit ag kina'ban kisa mau'dan bisa' ana pinakasaday-saday na parti nyo kasogoan.
18 Ana siisay man na lalaki na makipagsoway sa sakanyang sugud ag sumugud nin iba nisambay, ag ana sisay man magsugud sa babaying sinowayan nisambay man.”
Yo Lalaking Mayaman ag si Lazaro
19 Agko usad na lalaking mayaman na nakakasu'wut nin manga mamaalun na bado ag nikaun nin masisiram na pagkaun oroaldaw. 20 Sa sakanyang pintoan agko nakauwang pobri na ana panagaran Lazaro. Pono' nin kap'rusan ana intiro niyang lawas. 21 Iya nagimawut na makakaun man basang nin maski onong pagkaun na ragrag alin adto sa lamisa nyo mayaman. Adto pirani iya nyo ayam ag piparadilaan yo sakanyang manga kaprusan. 22 Ominabot yo panaon na yo pobri nagraan ag dinara iya nyo manga angel adto sa kaabay ni Abraham. Nagraan man yo mayaman ag ilinubung. 23 Naponta yo mayaman adto sa Hadis ag nadidipisilang maray, tominangad iya ag nata'naw niya sa arayo si Abraham, kaabay si Lazaro. 24 Kaya ominuyaw yo mayaman ki Abraham, ‘Amang Abraham, kairaki man tabi ako. Mandaan mo man tabi si Lazaro na idot-dot sa tobig yo poro nyo sakanyang guramuy ag paliptun ading sa'kun na dila, ta nadidipisilan na akong maray sa kalayong adi.' 25 Alagad sominimbag si Abraham, ‘Agin, narurumruman mo kaso ika naboboway pa sa raga namatian mo yo intirong kaginawaan, mantang si Lazaro nagtius nin kadipisilan, piro ngowan piataman iya didi mantang ika nasa kapagtiusan. 26 Lain pa diyan agko ararum na ampas na ibinutang sa pagbit'ngaan ta, tanganing ana siisay man na dididi indi makapadiyan ag yo manga didiyan indi makapadidi.' 27 Sominimbag yo mayaman, ‘Nya kin amo logod nipakimairak tabi ako saimo Amang Abraham, papontaun mo si Lazaro adto sa baguy nyo sa'kun na Ama', 28 ta agko pa ako limang ipat'ngod na lalaki. Papaadtowun mo tabi iya tanganing patanidan sira tanganing di nira matiun ading kadipisil na logar na adi.' 29 Alagad sominimbag si Abraham, ‘Nasa sakanda yo manga isinorat ni Moises ag nyo manga propeta; kaya dapat na rungun nira adto.' 30 ‘Indi, Amang Abraham,' simbag nyo mayaman. ‘Kin agko usad na alin sa guraan na pomonta sakanda, magsusuwsuw sira sa sakandang manga kasa'lan.' 31 Sinabyan iya ni Abraham, ‘Kin indi sira magrungug ki Moises ag sa manga propeta, di man nira rurunggun maski maboway otro yo usad na guraan.’ ”