15
Yo Nauudang Karniro
(Mt. 18:12-14)
1 Yo manga parasingil nin bowis ag yo manga parakasala rominani sira ki Jesus tanganing magrungug sakanya. 2 Alagad nag-iring-ingan yo manga Pariseo ag yo manga parapangadal nya kasogoan na yo sabi, “Ana lalaking adi niako nin manga parakasala ag nagikaun na kaiba nira.”
3 Kaya sinabi sa sakanda ni Jesus yo parabolang adi: 4 “Kin ana siisay man sa inyo agko sanggatos na karniro ag nauuda yo usad, ono kaya ana gigibwun niya? Indi kaya niya baba'yan yo nobinta'y nwibing aadto sa pasabsaban tanganing anapun yo nauuda sagkud sa matorakan niya adto? 5 Ag kin matorakan na niya adi, maogma niya ading papa'sanun sa sakanyang bagangbang 6 ag pag-abot sa baguy, baba'nowun niya yo sakanyang manga amigo ag manga kaabay ag sasabyun niya, ‘Makiogma kamo sa sa'kun; ta naanap ko na yo nauuda kong karniro.' 7 Pisabi ko sainyo na magkakaagko man nin dakuung kaogmaan sa kalangitan para sa usad na makasa'lan na nagsuwsuw kisa sa nobinta'y nwibi na indi nimati' na magsuwsuw ta sapagtaud nira sira maray.”
Yo Nauudang Sintabong Plata
8 “O kaya kin yo usad na babayi agko sampolong sintabong plata ag nauda yo usad, ono kaya ana gigibwun niya? Di' kaya niya sosoloan yo soloan, ag sisigiran yo kabagu'yan ag aanapun na maray sagkud sa matorakan adto? 9 Ag kin matorakan na niya adto, baba'nowun niya yo sa sakanyang manga amigo ag kaabay na baguy ag sasabyun niya, ‘Makiogma kamo sa sa'kun; ta natorakan ko na yo nauuda kong sintabong plata.' 10 Pisabi ko sainyo sa bagaan man na paagi, magkakaagko kaogmaan ana manga angeles nin Dios dail sa usad na makasa'lan na nagsuwsuw.”
Ana Parabola manunungud sa Kusung na Agin
11 Sinabi pa ni Jesus, “Agko usad na tawo na agko dowang agin na lalaki. 12 Sinabi nyo pawri sa sakanyang ama', ‘Itay, itao na tabi ninyo sa sa'kun yo kairasan ko sa sa'kun na mamanaun.’ Kaya pinagbanga nyo ama' sa dowang agin niya yo sakanyang pagsorosadiri.
13 Pagkaagi nin pirang aldaw, ipinabakal nyo pawring agin yo sakanyang kairasan, ag pominonta sa arayong logar, ag adto ginasta niya yo nga'min niyang sintabo sa maraut na pamomoway. 14 Kaso magasta na niya yo nga'min niyang pagsorosadiri, nagkaagko grabing kaponawan sa logar na adto, ag nagpoon naiyang magtius. 15 Kaya nagpatangran iya sa usad na tagaadto, ag pinaponta man iya nyadi sa tokad tanganing magbaog nin orig. 16 Dail sa uda sakanya nitao nin pagkaun nakamati' iya nin garabing kaponawan, kaya muya na kinta'na niyang magkaun nyo manga bongang kaoy na ipibawug sa orig. 17 Kaso makapag urup-urup iya, sinabi niya, ‘Yo manga oripun nyo sa'kun na ama' agko manga pikaun ag nisobra pa ngani, alagad ako magagraan na didi sa sobrang kaponawan! 18 Magsamput ako adto sa sa'kun na ama' ag sasabyun ko sa sakanya. Itay, nagkasala' ako sa Dios ag sa saimo. 19 Di na ako angay na ba'nowun mo pang-agin. Gibwun mo na sana tabi akong usad sa manga oripun mo.’ 20 Kaya sominamput iya sa sakanyang ama'.
Alagad arayo' pa nata'naw na iya nyo sakanyang ama' ag grabi yo kairakan na namati' sakanya. Kaya padalagan iyang sinabat nyadi, kinugus iya, ag inarang.
21 Alagad sinabi nyo agin sa ama', ‘Itay, nagkasala' tabi ako sa Dios ag saimo. Indi na tabi ako angay na ba'nowun mo pang agin. Gibwun mo na sana tabi akong usad sa saimong manga oripun.' 22 Alagad sinabi nyo sakanyang ama' sa manga oripun, ‘Dali kamo! Daraun ninyo didi yo pinakamaoyay na bado ag isu'wut sakanya. Su'wutan ninyo iya nin singsing ag sandalyas. 23 Ag ko'non ninyo yo pipatabang ogbon na baka ag bonoon. Mag-ogma kita ngowan ag magkaagko andaan. 24 Ta ading sa'kun na agin baga nagraan na, alagad naboway otro; nauda alagad natorakan.’ Kaya nagpoon sirang mag-ogma.
25 Nyo manga oras na adto nasa tokad yo subang na agin. Kaso pasamput na iya, ag madali' na sa baguy, narungug niya yo torogtogan ag barayliyan. 26 Kaya bina'no niya yo usad sa sakandang manga oripun ag inonga kin onong nangyayari. 27 Sominimbag yo oripun, ‘Ominabot tabi yo ipat'ngod mo, kaya ipinabono' nyo saimong ama' yo pipatabang ogbon na baka, ta nakabalik iyang salbar ag uda kailangan.' 28 Nagasa' yo subang na ipat'ngod ag indi muyang lomuug sa baguy. Kaya lominowas yo sakanyang ama' ag pinagparapakiosipan iya na lomuug. 29 Alagad sinabi niya sa sakanyang ama', ‘Ki'ta man daw tabi. Pinagsirbiyan ko kamo sa luug nin kadakul na taon ag di ko basang sinoway yo saimong manga kabu'tan. Alagad di mo basang ako tina'wan maski ogbon na kanding tanganing mag-ogma man basang kami nyo sa'kun na manga amigo. 30 Alagad kaso sominamput yo agin mong nagasta nyo sa saimong pagsorosadiri sa mararaut na babayi, ipinabono' pa ninyo yo pipatabang ogbon na baka para sakanya.' 31 Sominimbag yo sakanyang ama', Agin ko, pirmi ko ikang kaiba, ag nga'min na sa sa'kun sa saimo. 32 Alagad dapat kitang mag-ogma sa aldaw na adi, ta ading ipat'ngod mo nagraan na alagad naboway otro. Nauda alagad natorakan.’ ”