14
Pinaraay ni Jesus yo Lalaking Nipang Gutuk
1 Usad na Aldaw nin Pagpapadiskanso, si Jesus nasa baguy nyo usad na namamayo sa manga Pariseo, ta naimbitaran iyang magkaun. Ag adto biyong pibantayan nyo manga tawo yo sakanyang manga iron, 2 ta sa atobangan niya agko usad na lalaking nangugutuk. 3 Kaya inonga ni Jesus yo manga Pariseo ag yo manga parapangadal nya kasogoan, “Oyon daw sa kasogoan na magparaay sa Aldaw nin Pagpadiskanso o indi?” 4 Alagad nagtoninung sana sira, kaya kinaptan ni Jesus yo lalaking agko ilang, pinaraay niya ag pinasamput na. 5 Kina sinabi ni Jesus sa sakanda, “Kin ana usad sainyo agko agin o baka na natikrag adto sa bobon sa Aldaw nin Pagpapadiskanso, indi daw ninyo a'a'wasun tolos?" 6 Ag uda sira maisimbag.
Ana Maraay na Pakikiiba ag Pagpapakombaba
7 Narisa ni Jesus na piingowang pipili' nyo manga bisita yo manga uu'gan na nakatagama sa manga piling bisita, kaya sinabi niya yo usad na parabola. 8 “Kin ika inimbitaran sa usad na kasalan, di mo piliun yo piling uu'wan, ta paono kin agko mas kagalang-galang kisa sa saimo na inimbitaran? 9 Kin bagaan ana mangyari romaraniyun saimo yo kagsadiri nyo baguy na nag-imbitar sa inyong dowa ag somasabyun saimo, ‘Itao mo ana saimong piu'wan sa lalaking adi.’ Mapapasupug ika ag pauu'wun sa pinakaori na logar. 10 Imbis bagadi ana gibwun mo kin ika naimbitaran, piliun mo yo pinakaori na logar, tanganing kin romani saimo yo kagsadiri, sabyun saimo, ‘Amigo, tindug diyan didi ika sa maray na logar.’ Kin bagaan matata'wan ika nin kadakuung onra sa atobangan nyo manga kapariyo mong manga bisita. 11 Ta ana lambang niabaw ipibaba, ag ana lambang nipakaori ipitaas.”
12 Kina sinabi man ni Jesus adto sa ominimbitar sakanya, “Kin ika nagianda nin pangodtowan o panga'biyan, di mo pag-imbitaran yo saimong manga amigo, yo saimong ipat'ngod o irinsya, o kaya yo mayayaman mong kaabay; ta kin gibwun mo aan iimbitaran man ika nira, ag makakabayad na sira nin otang na buut saimo. 13 Imbis kin ika mag-anda nin usad na andaan imbitaran mo yo manga pobri, manga agko kabaranaan, manga pilay ag yo manga bota. 14 Kin amo aan ana gigibwun mo bibindisyonan ika, dawa di sira makabayad saimo, babagusan ika nin Dios sa pagkaboway otro nyo manga matatanos.”
Yo Parabola nyo Kadakuung Andaan
(Mt. 22:1-10)
15 Kaso marungug adi nyo usad sa manga kaiba niya sa lamisa, sinabi niya ki Jesus, “Pinaorog ana tawong makakaun sa andaan adto sa kaadi'an nin Dios.” 16 Sominimbag si Jesus, “Agko usad na lalaking nag-anda nin usad na kadakuung andaan ag nangimbitar nin dakul. 17 Kaso omabot na yo oras nin kara'nan, minandaan niya yo sakanyang manga oripun tanganing sabyun sa manga inimbitaran, ‘Marna kamo ta priparar na yo nga'min.’ 18 Alagad nga'min sira agko kanya-kanyang manga sarawtan. Yo o'na sominabi, ‘Nakabakal ako nin oma, ag kaipwan kong pomonta adto tanganing ki'tun. Kamo na sanang magdispinsar sa'kun.' 19 Yo usad sominabi man, ‘Nakabakal ako nin limang padis na baka ag nipontaun na ngani ako adto tanganing pangagtistingun. Kamo na sanang magdispinsar sa sa'kun.' 20 Ag sinabi man nyo usad, ‘Ba'gong kasal pa sana ako, kaya indi ako makakaponta.’ 21 Bominalik yo oripun ag ibinarita niya adi sa sakanyang among. Nagasa' yo kagsadiri nyo baguy kaya minandaan niya yo sakanyang oripun, ‘Lomowas ika dalian mo ag pomonta ika sa manga dagan ag tinampo nyo banwaan. Ag pangagdaraun mo didi yo manga pobri, lopog, bota, ag yo manga pilay.' 22 Pagbalik nyo oripun sinabi niya, ‘Among, yo manga iminanda mo tabi nagibo ko na nga'min, alagad alwag pa man dayaday yo logar.' 23 Kaya sinabi otro nyo among sa kanyang oripun, ‘Pomaadto ika sa manga tinampo ag manga dagan ag piritun mong pomonta didi yo manga tawo, tanganing mapono' ana sa sa'kun na baguy. 24 Pisabyan ko kamo, usad man adto sa manga na o'nang inimbitaran indi makananamit nyo sa'kun na anda.’ ”
Kadipisilan na Aagyan nin Pagiging Disipolos
(Mt. 10:37-38)
25 Kadakul yo manga tawong ominiba ki Jesus sa pag-agi, ominatobang iya sa sakanda ag sinabi. 26 “Kin siisay man sainyo ana muyang maging usad sa manga disipolos ko mamu'yan niya ako na mas orog pa sa kanyang ama' ag ina', sugud ag agin, ipat'ngod na lalaki ag ipat'ngod na babayi, o maski sa sadiri niyang boway ta kin indi, di kamo pwiding magin disipolo ko. 27 Ana siisay man na indi magpa'san nya sakanyang sadiring kros ag somonod sa'kun indi pwiding magin disipolo ko. 28 Kin ana usad sainyo muyang magtogrok nin tore, buku daw na niugaun nawna iya ag kikwintaun yo magagasto tanganing maisyan kin tama yo sakanyang sintabong pangpauman nyadto? 29 Kung indi niya adto gibwun baka kin maipatogrok na niya yo manga pondasyon, alagad indi man niya maipauman, totoyaun sana iya nya manga makakita nyadto, 30 ag sasabyun, ‘Ading tawong adi nagpoon magtogrok alagad di man kayang ipauman.' 31 O kaya ana usad na adi' muyang makipag gira sa usad man na adi'. Bukung niugaun nawna iya ag pag-aadalan maray kin ana dyismil niyang soldados kayang ilaban ag manggana sa binti mil na soldados nya kalaban niyang adi'. 32 Ag kin sa pagtaud niya indi kaya, magmamanda na iya nin manga minsairo mantang arayo pa yo kalaban tanganing maki pag-osay. 33 Kaya sa bagaan man na paagi, indi pwiding maging disipolo ko ana siisay man kin indi niya tatalikoran ana nga'min sa kanyang boway.”
Asin na uda Sirbi
(Mt. 5:13; Mk. 9:50)