13
Magsuwsuw o Mapakaraut
1 Nyo oras man sanang adto agko nagkapirang tawo na nagbarita ki Jesus manunungud sa manga taga-Galilea na ipinaguraan ni Pilato mintras na nagiatang sa Dios, ag inalo yo sakandang manga rogo sa sakandang manga atang. 2 Sominimbag si Jesus sakanda, “Sa pagtaud ninyo mas makasa'lan yo manga Galileong adto kisa ibang manga taga-Galilea ta bagadto yo nangyari sakanda? 3 Indi! Piro pisabyan ko kamo kin indi kamo magsuwsuw, kamo man mapapakaraut. 4 Ag adtong disiotsong nagkakaguraan kaso mara'togan nyo tori sa Siloe, sa pagtaud ninyo mas mararaut sira kisa ibang manga nangigistaran sa Jerusalem. 5 Indi! Alagad pisabyan ko kamo, pag indi kamo magsuwsuw, mapapakaraut man kamo intiro.”
Ana Parabola manunungud sa Igos na Uda Bonga
6 Kina sinabi ni Jesus yo parabolang adi: “Agko usad na lalaki na agko poon nin igos na nakatanum sa sakanyang obasan, sinitar niya adto kin agko na bonga alagad uda iya nakita maski usad. 7 Kaya sinabyan niya yo parariparo nyo sakanyang obasan, ‘Tolong taon na akong niparabalik-balik ag niparaanap nin bonga nyading kaoy na adi, alagad uda basang ako nakikita. Puwurun mo na daw! Nakapipiut basang!' 8 Sominimbag yo parariparo, ‘Among, di ta nawna puwurun sa taon na adi, kakalyun ko ana palibot ag bubutangan kong abono. 9 Kin bomonga na sa sosonod na taon, maray; alagad kin indi puwurun ta na.’ ”
Pinaraay ni Jesus yo Babaying Boktot
10 Usad na Aldaw nin Pagpapadiskanso, si Jesus nagitoro sa usad na sinagoga. 11 Ag aadto man yo usad na babayi, na disiotsong taon nang agko kamatian gibo nyo maraut na espirito. Kaboktot niya ag indi makatindug nin togyo. 12 Kaso makita ni Jesus yo babayi, bina'no niya adi na romani ag sinabi, “Babayi, maray na ika sa saimong kamatian.” 13 Kina irinuta ni Jesus yo sakanyang kamut sa babayi, insigida nakatindug na adi nin togyo' ag nag-omaw sa Dios.
14 Alagad nagasa' yo namamayo nyo sinagoga ta nagparaay si Jesus sa Aldaw nin Pagpapadiskanso. Kaya sinabi niya adto sa manga tawo, “Agko unum na aldaw sa usad na simana tanganing magtrabao. Kaya sa manga aldaw na aan kamo pomadidi tanganing magpabolong, ag bukung sa Aldaw nin Pagpapadiskanso.” 15 Sinimbag iya nyo Kagorangnan, “Kamong manga parasagin-sagin! Bukung piobad ninyo ana guud nya sainyong baka o asno tanganing daraun sa para'ra'an maski sa Aldaw nin Pagpapadiskanso? 16 Ading babaying adi na alin sa gikan ni Abraham, ginapos ni Satanas sa luug nin disiotsong taon. Maraut daw na iya paraayun maski sa Aldaw nin Pagpapadiskanso?" 17 Kaso sabyun adto ni Jesus, napasupug yo nga'min niyang manga kalaban, alagad yo kadaklan sa manga tawo nagiogma sa makangangalas na bagay na sa kanyang ginibo.”
Ana Parabola manunungud sa To'wang nin Mostasa
(Mt. 13:31-32; Mk. 4:30-32)
18 Ominonga otro si Jesus, “Sa ono nakakaarug ana kaadi'an nin Dios? Sa ono ko aan ikokompara? 19 Arug adi nyo usad na to'wang nin mostasa, na itinanum nin usad na lalaki sa sakanyang natad. Dominakuu adi ag naging dakuung kaoy, ag yo manga bayong nangagsawag sa manga sanga nyo kaoy.”
Ana Parabola manunungud sa Libadora
(Mt. 13:33)
20 Ominonga otro si Jesus, “Sa ono ko ngani ikokompara ana kaadi'an nin Dios? 21 Arug adi sa usad na libadora na pinagsalak nin usad na babayi sa tolong takad na arina. Kina naglubag nin maray yo arina.”
Yo Kapiut na Pintoan
(Mt. 7:13-14, 21-23)
22 Mintras na si Jesus paponta sa Jerusalem, nagitoro na iyang dagos sa manga tawo sa kada banwaan ag manga baryo na sakanyang naliliisan. 23 Agko usad na nag-onga sa sakanya, “Kagorangnan, kaagbay daw sanang tawo ana masasalbar?” Sominimbag si Jesus, 24 “Pag-ingowaun ninyo na makaluug sa piut na pintoan, ta pisabi ko sainyo, kadakul ana nagiingowaun na makaluug alagad di sira makakaluug. 25 Kin ana kagsadiri nyo baguy isarado na yo pinto, kamong manga nakatindug sa lowas magpoon nang magparatoktok ag pakikimairak, sasabyun ninyo, ‘Kagorangnan, boksi man tabi kami!' Alagad sisimbagun niya kamo, ‘Di ko kamo manga bistado kin manga taga sa'ri kamo.' 26 Ag sasabyun ninyo, ‘Kaiba mo tabi kaming nagkaun ag nag-inom, ag nagtoro tabi ika sa manga banwaan namun.' 27 Alagad somisimbagun iya, “Di ko kamo manga bistado ag kin manga taga sa'ri kamo! Romayo kamo sa'kun manga paragibo nin kara'tan.' 28 Magiibiun kamo adto ag magiragutun ana sainyong manga ngipun kin makita ninyong aadto sa kaadi'an nin Dios sira Abraham, Isaac, Jacob ag yo nga'min na propeta, alagad kamo iuumut sa lowas. 29 Omaaboton yo manga tawo na nagialin sa subangan ag kalonoran saka sa timog ag hiraga, ag nagi-uga'un sa pistaan adto sa kaadi'an nin Dios. 30 Osto talagang agko naoo'na na namamawri agko man namamawri na naoo'na.”
Yo Pagkamuya ni Jesus sa Jerusalem
(Mt. 23:37-39)
31 Nyo oras man sanang adto agko nagkapirang Pariseo na pominonta ki Jesus ag sominabi, “Omalin ika didi ag pomonta ika sa ibang logar. Ta gosto ikang ipaguraan ni Herodes.” 32 Sominimbag si Jesus sa sakanda, “Sabyun ninyo sa amid na adto na nipalayas ako nin manga demonyo ag niparayun nin manga tawo ngowan ag kinaodma, saka sa ikatolong aldaw tataposon ko yo nga'min kong gigibwun. 33 Alagad padagos ako sa pag-agi ngowan ag kinaodma ag sa kina'sa. Ta ana usad na propeta nin Dios di dapat magraan sa lowas nin Jerusalem.”
34 “Jerusalem, Jerusalem, piparaguraan mo ag pipara bato ana lambang propeta na pisogo nin Dios saimo. Pirang bisis ko nang iningowa na atamanun yo saimong manga agin, arug nyo paglukub nyo isiwan sa sakanyang manga isiw, alagad di mo muya! 35 Ki'tun mo, pinabayan nang maray ana saimong baguy. Pisabyan ta ika, di mo na ako otro makikita sagkud na sabyun mo, ‘Pagpalaun ana siisay man na niabot sa pangaran nya Kagorangnan.’ ”