12
Patanid sa manga Parasagin-sagin
(Mt. 10:26-27)
1 Mitras na nidakul yo manga tawo sagkud sa ominabot na sa ribo-ribo, ag nagkakatinorong-tongan na. Piro si Jesus sinbiyan na o'na yo sakanyang manga disipolo, “Maglikay kamo sa manga libadora nya manga Pariseo, na manga pagparasagin-sagin. 2 Ta niaboton ana panaon na uda nasasaray na di matotorakan, o kaya uda naiilum na di maiisyan. 3 Ono man ana saimong sinabi sa kadulman marurungug aan sa kaliwanagan, ag ono man ana saimong ining-ing sa talinga nin siisay man sa luug nyo kwarto iuuyaw sa atup.”
Yo Dapat Katakotan
(Mt. 10:28-31)
4 “Pisabi ko sainyo, manga amigo di kamo matakot sa kiisay man na pwiding gumuraan sainyo alagad uda na magigibong ono pa man. 5 Alagad pisabyan ko kamo kin siisay ana dapat ninyong katakotan. Katakotan ninyo ana Dios na pagkatapos na gura'nun kamo, agko pa kapangyariyan na itikrag kamo sa impyerno, kaya pisabyan ko kamo katakotan ninyo ana Dios. 6 Bukung ana limang rignus ipipabakal sa kantidad na dowang sintabo? Alagad maski usad sa sakanda di pipaba'yan nin Dios. \v 7 Maski ana sainyong manga buwuk nga'min bilang niya. Kaya di kamo matakot sa kin ono ana manga mangyayari sainyo, ta mas importanti kamo kisa kadakul na rignus.”
Pagbisto ki Jesus
(Mt. 10; 32-33; 12:32; 10:19-20)
8 “Ag pisigorado ko adi sainyo, kin ana siisay man na bomisto sa sa'kun sa atobangan nyo manga tawo, bibistowun man iya nya Agin nin Tawo sa atobangan nyo manga angel nin Dios. 9 Alagad kin ana siisay man magdiyar sa sa'kun sa atobangan nin manga tawo, didiyaran ko man sa atobangan nya manga angel nin Dios. 10 Ag ana siisay man na magsabi nin pagtomang sa Agin nin Tawo pwiding patawarun. Alagad ana siisay na magtoya-toya sa Espirito Santo indi patatawarun.
11 “Ag kin kamo daraun sa sinagoga, o kaya sa manga namamayo, di kamo mag-adit manunungud sa kin paono kamo magdipinsa sa sadiri ninyo o kaya kin ono ana sa inyong sasabyun. 12 Ta sa oras na aan, totoroan kamo nya Espirito Santo kin ono ana dapat ninyong sabyun.”
Ana Parabola manunungud sa Mayama na Patal
13 Alin adto sa kadaklan agko usad na sominabi sa sakanya, “Maestro, sabyun mo daw tabi sa sa'kun na ipat'ngod na itao na niya sa sa'kun yo sa'kun na kairasan adto sa sa'mun na minana.” 14 Sinimbag ni Jesus yo lalaki, “Siisay ana nagbutang sa sa'kun tanganing maging usad na owis o kaya maging parausay nya sainyong di pagkakainintindiyan?" 15 Pagkatapos sinabi niya sa intiro, “Maglikay kamo sa nga'min na klasi nin kaangapan. Ta ana boway nin tawo indi nasosokol sa kadak'lan nya sa kanyang pagsorosadiri.”
16 Kaya itinoro' niya yo parabolang adi, “Agko usad na lalaking mayaman na nakagosi nin kadakul na prodokto, adto sa sakanyang manga tanuman. 17 Ag sinabi niya sa sakanyang sadiri, ‘Ono daw ana maray kong gibwun? Uda na ako logar na masasarayan nyading sa'kun na manga ginosi.' 18 Nataun-taun naisip niya, ‘A! Isi ko na. Amo adi ana gigibwun ko. Raragbaun ko yo dati kong bodiga, ag magtotogrok ako nin mas dakuu tanganing adto ko sarayun yo nga'min kong ginosi ag ibang pagsorosadiri. 19 Ag sasabyun ko sa sa'kun na sadiri, Kadakul na ikang manga natipon sa luug nin dakul na taon. Magpadiskanso na ika; magparakaun, magparainom, ag mag-ogma nin labi-labi.' 20 Alagad sinabi nyo Dios sakanya, ‘Ikang patal! Ngowan man sanang ga'bing adi ana boway mo koko'non ko na, kiisay mapoponta ana saimong manga pinagparapagalan.’ 21 Bagaan man ana mangyayari sa kiisay man na nagparasasaray nin kayamanan para sa sadiri sana. Alagad pobri man sa atobangan nin Dios.”
Ana Pagsarig Sa Dios
(Mt. 6:25-34)
22 Kina sinabi ni Jesus sa sakanyang manga disipolo, “Kaya pisabyan ko kamo, di kamo magparaadit manunungud sa inyong ikaboboway, kin ono ana sainyong kakanun, o manunungud para sa sainyong lawas, kin ono ana sainyong isoso'wut. 23 Ta sa boway agko pa mas importante kisa pagkaun ag pagbado. 24 Ki'tun ngani ninyo ana manga owak; indi sira nitanum o nipolot man, uda sira bodiga o onoman na masasarayan nin ono man na bagay, alagad pipakaun sira nin Dios. Kamo pa kaya na mas importanti kisa manga bayong! 25 Siisay sa sainyo ana niparaadit na pwiding makakapagparogang nya sakanyang boway maski usad na oras basang? 26 Kin ana sainyong pagparaadit di makakatabang maski saday na bagay, ono ta magparaadit kamo sa ibang manga bagay? 27 Ki'tun ngani ninyo ana manga layas na borak kin paono sira naboboway. Di sira nagipagal sa sakandang isoso'wut, alagad pisabyan ko kamo maski si adi'ng Solomon na pinakamayaman indi nakapagso'wut nin kasingoyay nydtong manga borak maski maooyay yo sakanyang manga bado. 28 Ag kin ana Dios pita'wan nin laoyay na kolor ana layas na borak na nasa tokad, na ngowan boway ag kinaodmaan ipigatong, kamo pa kaya ana di badoan nin Dios o kamong kasaday na pagtood! 29 Kaya di kamo maga'dit sa pag-anap manunungud sa sainyong kaka'nun ag iinomon. 30 Ta ana manga uda pagtood amo adi ana sakandang piparaa'ditan, alagad isi nya sainyong Ama' na nasa langit na kinakaipwan ninyo ana manga bagay na adi. 31 Alagad anapun nawna ninyo ngowan yo sa kanyang kaadi'an tanganing itao niya sainyo yo nga'min ninyong kaipwan.”
Kayamanan sa Langit
(Mt. 6:19-21)
32 “Kaya di kamo matakot, saday kong katiriponan. Ta ana sainyong Ama' naoogmang maray na itao sainyo ana sakanyang kaadi'an. 33 Ipabakal ninyo ana sainyong pagsorosadiri ag ipanao ninyo sa manga pobri. Ta sa bagaan na paagi nigibo kamo nin lulugan na indi nararaut. Ag pitipon ninyo ana sainyong kayamanan adto sa langit ta adto uda maonas na pwiding komoko nyaan o kaya anuy na pwiding romaut. 34 Ta kin sa'ri yo saimong kayamanan, aadto man yo saimong poso'.”
Manga Sorogoon na Pirming Priparado
35 “Magin priparado kamo pirmi sa pagsirbi ag soloan ninyo ana sainyong sosoloan. 36 Omarug kamo sa manga sorogoon na niuwat sa sakandang among alin sa pag-atindir nyo kasalan, tanganing kin iya omabot ag tomoktok maboksan tolos yo pintoan para sakanya. 37 Pinaorog sa usad na sorogoon na maabotan nyo sakanyang among na niuwat sa kanyang pag-abot. Sa kaostowan pisabi ko sainyo, magipripararun iya ag papau'gun yo sorogoon sa pika'nan, ag pagsisirbiyan sira dail sa sakandang katapatan. 38 Pinaorog ana manga bagadtong sorogoon na maabotan nyo sa kanyang among na priparado maski omabot nin alas dosi sa ga'bi, alas tris sa ipipita, o kaya alas kwatro sa ipipita. 39 Alagad intindiyun ninyo adi: kin isi sana nya kagsadiri nyo baguy kin onong oras niaboton yo maonas di aan niya totogotan na lu'gun yo sakanyang baguy. 40 Kamo man dapat na maging priparado sa nag'min na oras, ta ana Agin nin Tawo niaboton sa oras na indi ninyo pilaoman.”
Yo Sinsiro ag yo Bukung Sinsirong Sorogoon
(Mt. 24:45-51)
41 Ominonga si Pedro, “Kagorangnan, pisabi mo tabi ana parabolang adi para sa sa'mun sana o para sa nga'min?" 42 Sominimbag yo Kagorangnan, “Pisabi ko adi sa manga sinsiro ag madonong na sorogoon. Bukung iya ana papamaalaun nyo sakanyang among sa ibang manga sorogoon, tanganing amo yo magriparo sa pagtao nin manga kinakaipwan nya kapwa niya sorogoon sa tamang panaon. 43 Pinaorog ana bagadtong sorogoon na maabotan nyo sakanyang among na nigibo na agko kasinsirowan. 44 Sa kaostowan pisabi ko sainyo, gigibwun iya nyo sakanyang among na maging tagariparo nyo nga'min nyading pagsorosadiri. 45 Alagad kin isabuut nyo sorogoon na adto, ‘Yo sa'kun na among mauuguyan pang magbalik,’ ag popo'nan na niyang pagparabanugun yo kapariyo niyang sorogoon na lalaki ag babayi, ag magparakaun, magparainom, sagkud sa iya maborat. 46 Ag kin mangyari aan, ana among nya sorogoon na adto omaaboton sa aldaw na indi niya pilaoman ag sa oras na indi niya iisyan. Adtong sorogoon na adto papadosaan nin kagra'nan ag iuumut sa lowas kaiba nyo manga sorogoon na bukung sinsiro.
47 Ana sorogoon na nakakaisi nyo kamu'yan nyo sa kanyang among, alagad indi nagpriparar o gominibo nyo kamu'yan nyo sakanyang among magrisibiyun nin mabu'gat na kapadosaan. 48 Alagad yo sorogoon na indi nakakaisi kin ono yo kamu'yan nyo sa kanyang among ag gominibo nin manga bagay na dapat niyang pagdosaan magirisibiyun man nin magaan na padosa. Ana tina'wan nin dakul bagay aanapan nin dakul bagay, ag ana pinagkatiwalaan nin mas dakul bagay aanapan nin mas lalong dakuung bagay.”
Pagkabanga-banga nyo Pamilya
Mt. 10:34-36)
49 “Nagpadidi ako tanganing magdara nin kalayo sa kina'ban, ag pima'wut ko na aan nikarabkatab na! 50 Alagad agko pa bunyag na dapat kong akoon, ag nariribaraw ako sagkud na indi adi naootob. 51 Sa pagtaud ninyo pominadidi ako tanganing magdara nin katoninungan sa raga? Indi, pisabi ko sainyo, pominadidi ako tanganing daraan ko kamo nin pagkabaranga-banga. 52 Poon ngowan ana lima sa usad na pamilya magkakabaranga-banga, tolo tomang sa dowa ag dowa tomang sa tolo. 53 Magkakabaranga-banga sira, ana ama' tomang sa agin ag ana agin tomang sa ama', yo ina tomang sa babaying agin ag yo agin na babayi tomang sa ina, yo panogangan tomang sa manogang ag yo manogang tomang sa panogangan.”
Pagkaisi nyo Panaon
(Mt. 16:2-3)
54 Ag sominabi pa si Jesus sa manga tawo, “Pag nakikita ninyong maibug yo panganoron sa kalonoran, insigida nisabi kamo nioranun ag bagadto man talaga yo nangyayari. 55 Ag kin ana parus paponta sa timog, pisabi ninyong niinitun ag niinit man talaga. 56 Manga parasagin-sagin! Isi ninyo kin papaono magtao nin kaologan sa manga nakikita ninyo didi sa raga ag sa langit. Alagad taynga ta di ninyo natatawan nin tamang kaologan ana panaon ngowan?"
Makipag-osay sa manga Kalaban
(Mt. 5:25-26)
57 “Taynga ta indi ninyo maosgaan nin tama ana sainyong sadiri? 58 Kin agko saimo magsomon ag daraun yo kaso sa osgado, ingowaun mong maariglo tolos mintras na agko pa panaon bago kamo omatobang sa osgado, ag baka masintensyaan ika ag ikarsil man ika nyo bantay sa karsilan. 59 Ipisabi ko saimo, indi ika makakalowas sa karsilan sagkud na indi mo nababayaran yo kaorooltimowing sintabo na molta.”