11
Ana Toro ni Jesus manunungud sa Pangadyi
(Mt. 6:9-13; 7:7-11)
1 Usad na aldaw, si Jesus nangangadyi sa usad na logar. Ag kaso iya tapos na, sinabi nyo usad sa sakanyang disipolo, “Kagorangnan, toroan mo man tabi kami kin paono mangadyi, arug nyo ginibo ni Juan adto sa sakanyang manga disipolo.” 2 Kaya sinabi ni Jesus sa sakanda, “Kin kamo mangangadyi bagadi ana sabyun ninyo:
‘Ama', namun na nasa langit
sambaun ana pangaran mo
magpoon na logod ana saimong pag-aadi'.
3 Ta'wan mo kami nin
kaka'nun sa oroaldaw.
4 Ag patawarun mo kami sa sa'mun
na manga kasa'lan
ta nipatawad kami
sa manga nagkasala sa sa'mun.
Ag di mo tabi kami iatobang sa
manga tintasyon kindi isalbar kami sa mararaut.’ ”
5 Kina sinabi pa niya sa sakanda, “Ipamutang ta na ana usad sainyo pominonta adto sa usad niyang amigo, usad na kalawud-lawudi nin ga'bi ag sominabi, ‘Amigo, paayatun mo nawna ako nin tolong tinapay. 6 Ominabot kaya yo usad kong amigo na nagbiyai, ag uda ako maisirbing pagkaun sakanya.' 7 Piro bagadi man yo simbag nyo sakanyang amigo na nasa luug nyo baguy, ‘Di mo ngani ako pagpirwisyowun ta nakasarado na yo pinto ag nakabatang na kami nyading sa'kun na manga agin. Di na ako makabobowat pa tanganing itao yo saimong pangangaipo.' 8 Pisabi ko sainyo, dawa di adto niya gibwun bilang amigo, kin padagos adtong magtoktok, bomobowatun iya ag itatao yo pangangaipo nyo amigo tanganing di na adto mangolit. 9 Kaya pisabi ko sainyo: Omayat kamo ag kamo tata'wan; omanap kamo ag kamo makatotorak; magtoktok kamo ag ana pinto boboksan para sa sainyo. 10 Ta ana lambang niayat pita'wan; ana siisay man na nianap nakakatorak, ag piboksan ana pinto sa lambang nitoktok. 11 Kamo na manga ama', tata'wan daw ninyo nin agas kin ana agin ninyo niayat nin isra? 12 O kaya tata'wan daw ninyo nin mantok kin ana agin ninyo niayat nin omon? 13 Kin kamo na mararaut tataong magtao nin mararaay na bagay sa sainyong manga agin, bagaono pa kaya ana sa sainyong Ama' na nasa langit. Itatao niya ana Espirito Santo sa manga niayat sa kanya.”
Si Jesus ag si Beelzebul
(Mt. 12:22-30; Mc. 3: 20-27)
14 Usad na aldaw, pinalayas ni Jesus yo usad na demonyo na kawsa nyo pagkangola nyo usad na lalaki, ag nakapagsabi na poon nyadto. Kaya yo manga tao nagkangangalas. 15 Alagad agko nagkapira sa sakanda na sominabi, “Si Beelzebul na prinsipe nin manga demonyo yo nagtao sa kanya nin kapangyariyan tanganing magpalayas nin manga demonyo.” 16 Yo iba man gosto iyang titistingun kaya sinabi nira, “Magpakita daw ika nin milagro na magpapabisto na ana Dios didiyan saimo”y 17 Alagad isi ni Jesus yo sakandang piisip kaya sominabi iya sa sakanda, “Mararagba ana lambang kaadi'an na nababanga sa dowang gropo ag mararaut ana pamilyang niribok-ribok. 18 Kin si Satanas magtomang sa sakanyang sadiri papaono pa mapapauguy ana sakanyang kaadi'an? Pisabi ninyo na nipalayas ako nin manga demonyo ta tina'wan ako nin kapangyariyan ni Beelzebul. 19 Ag ngowan kin ako nagipalayas nin manga demonyo sa paagi ni Beelzebul, siisay man yo nagtao nin kapangyariyan adto sa sainyong manga tagasonod na makagibo man nin bagadi? Sira na mismo ana nipamatood na sala' kamo. 20 Alagad kin ako nipalowas nin manga demonyo sa paagi nyo kapangyariyan nin Dios, muyang sabyun nyaan ominabot na sainyo ana kaadi'an nin Dios. 21 Kin agko usad na lalaki na mak'sug ag komplito ana sa sakanyang armas ag nagi bantay sa sakanyang baguy, ana sakanyang pagsorosadiri arayo sa piligro. 22 Alagad kin agko usad na tawo na mas mak'sug ag lomosob ag daugun iya, koko'non nyadi yo sakanyang manga armas na sakanyang pilaoman ag ipapanao yo manga pagsorosadiring inaguw sa kanya. 23 Ana siisay man na bukung pabor sa'kun tomang aan sa sa'kun ag ana siisay man na di nitabang na magtipon, nikayat.
Pagbwilta nyo Maraut na Espirito
(Mt. 12:43-45)
24 Pag ana maraut na espirito lomowas sa usad na tawo, nibarag-barag adi sa manga marang logar ag nagianap nin mapagpadiskansowan. Alagad kin uda iya maanap sasabyun niya sa sadiri, ‘Magbwilta ako adto sa baguy na pinag-alinan ko.' 25 Kin sa pagbalik niya maabotan niyang malalinig ag pakaraay na yo baguy alagad uda nakaistar, 26 omaanapun pa iya nin pitong espirito na mas maraut pa sakanya ag iniba niya adto tanganing omistar sa taong adto. Kaya mas naging maraut yo kamutangan nyo taong adto kisa sa dati.”
Ana Tonay na Pinaorog
27 Mintras na si Jesus nisabi nya manga bagay na adi, agko usad na babaying ominuyaw alin adto sa kadaklan na yo sabi “Pinaorog yo babaying nagdara sa saimo sa sakanyang tuyan ag nagpasoso sa saimo.” 28 Sominimbag si Jesus, “Mas pinaorog ana manga tawong nirungug ag nitood nya sasabyun nin Dios.”
Inanapan si Jesus nin Sinyalis Alin sa Langit
(Mt. 12:38-42)
29 Mintras na nagidakul yo manga tawo sinabi ni Jesus, “Lararaut nya manga tao sa ngowan. Nagianap sira nin sinyalis na alin sa langit, alagad uda ipapakita sa sakanda pwira sa sinyalis na nangyari ki Jonas. 30 Kin paonong naging sinyalis si Jonas adto sa manga taga-Nineve, bagadto man ana magiging sinyalis sa manga tawong adi, ana Agin nin Tawo. 31 Kaya sa aldaw nin pag-osgar ana Reyna nin timog nitindugun tomang sa manga tawo sa ngowan, ag sira oosgaran nin kapadosaan. Ta maski alin iya sa poro nin kina'ban pominonta iya ki Solomon tanganing runggun yo kadonongan nyadi; alagad mas orog kisa ki Solomon yo dididi. 32 Arug man nyo manga tag-Ninive nitindugun tomang sa manga tawong adi. Ag oosgaran nira nin kapadosaan, ta nagsuwsuw sira kaso mangadal si Jonas. Alagad agko mas orog pa ki Jonas, yo dididi.”
Yo Ilaw nin Lawas
(Mt. 5:15; 6:22-23)
33 “Uda nagisolo nin ilaw tanganing isaray sana o kaya ibutang sa irarum nya otsaba. Kindi, ipibutang adi sa mismong bubutangan tanganing pagluug nyo manga tawo makita yo liwanag. 34 Ana saimong mata ana pinakasolo nya saimong lawas. Kin malinaw ana saimong mata maliliwanagan ana saimong sadiri. Alagad kin mao'bog ana saimong mata, maduduluman ana intiro mong sadiri. 35 Kaya sigoradoon mo na ana liwanag na didiyan saimo bukung kadulman. 36 Ta kin ana bilog mong lawas pono' nin kaliwanagan, ag uda parting nasa kadulman, nga'min adi magiging maliwanag, na bagana baga pitingrawan ika nin usad na makurab na solo.”
Tinuyaw ni Jesus yo manga Kara'tan nyo manga Pariseo ag nyo manga Parapangadal nya Kasogoan
(Mt. 23:1-36; Mc. 12:38-40)
37 Pagkatapos magsabi ni Jesus, agko usad na Pariseo na ominimbitar sakanya sa baguy nyadi tanganing magkaun. Kaya pominonta man iya ag ominuga sa pika'nan tanganing komaun, 38 alagad nagngalas yo Pariseo kaso makita si Jesus na nikaun na indi nawna nangunuw nin kamut na kostomri na nya manga Judio bago komaun. 39 Kaya sinabi nyo Kagorangnan sa sakanya, “Kamong manga Pariseo piogasan ninyong maray ana lowas nya tasa ag nya pingan, alagad ana luug nya sainyong poso' ponong-pono' nin kaangapan ag kara'tan. 40 Manga patal! Indi ninyo isi na ana Dios na gominibo nyo nasa lowas, amo man yo gominibo nyo nasa luug? 41 Ipangiras nawna ninyo sa manga pobri ana manga luug nya manga lulugan ag magiging malinig ana nga'min na bagay para sa sainyo.
42 “Malairak ninyo na manga Pariseo, ta ipitao ninyo sa Dios yo ikasampolong parti nyo sainyong manga itinanum na pangrikado, arug nyo paminta, anis ag iba pa, alagad nalilingawan ninyo ana ostisiya ag pagkamuya sa Dios. Tama na gibwun ninyo aan alagad di man ninyo paglingawan na gibwun yo iba.
43 “Malairak ninyo manga Pariseo! Ta ana muya sana ninyong pagparau'gan yo manga piling uu'gan sa manga sinagoga, ag pagpara omawun kamo adto sa manga sa'ran. 44 “Lairak man ninyo, ta baga kamo manga lulub'ngan na uda tanda, ag piparaagi-agian sana nyo manga tawo na di nira naisyan.”
45 Sinabi sakanya nyo usad na parapangadal nya kasogoan, “Maestro, sa pisabi mong aan pati kami pisupug mo.” 46 Sinimbag iya ni Jesus, “Lairak man ninyo na manga parapangadal nya kasogoan, ta ipipapa'san ninyo sa manga tawo yo sainyong manga mabubu'gat na dadaraun, alagad ni guramuy ninyo di man basang ninyo ipiiron sa pagtowang. 47 Lairak ninyo, ta ipinagitogrok ninyo nin manga malaooyay na pan'tson yo manga propetang ipinaguraan nyo sainyong manga gorang. 48 Kaya sa bagadtong paagi, kamo na mismo yo nagpamatood na oyon kamo sa ginibo nyo sainyong manga ginikanan, ta sira yo gominuraan nyo manga propeta ag kamo man yo nagtogrok nyo manga pan'tson nyadto. 49 Alagad sinabi nya kadonongan nin Dios, ‘Magipadaraun ako sa sakanda nin manga propeta ag manga apostol, yo iba gugura'nun nira ag yo iba padidipisilan.' 50 Kaya ana manga tawo sa ngowan among padodosaan, ta sira yo nagpaguraan sa nga'min na propeta poon nyo lalangun ading kina'ban, 51 magpoon ki Abel sagkud ki Zacarias na ginuraan sa pagbit'ngaan nyadtong altar na pisobsoban nin manga atang ag sa lunub nyo templo. Pisabi ko sa sainyo, tomitikragun sa manga tawo ngowan yo kapadosaan sa sakandang manga ginibo.
52 “Malairak ninyo manga parapangadal nya kasogoan, ta inalin ninyo yo ilyabi nin kadonongan. Di na ninyo muyang magluug, piabatan pa niyo yo manga muyang lumuug.”