10
Sinogo ni Jesus yo Sitinta y Dos
1 Pagkatapos nyo manga bagay na adto, yo Kagorangnan pominili' pa nin sitinta y dos. Sinogo niya sira nin mandowa-dowa na mao'na sa kanya sa kada banwaan ag logar na popontaan nira. 2 Ag sinabi sa sakanda, “Kadakul yo gogosiyun, alagad kaagbay ana manga trabador. Ipakiosip ninyo sa kagsadiri nyadtong gogosiyun na magpadara iya nin manga trabador adto sa sakanyang tokad. 3 Agi na kamo! Alagad rumrumun ninyo na pisogo ko kamo na baga manga mabubu'ut na karniro sa bit'nga nyadtong manga amid. 4 Di kamo magdara nin sintabo, bag, o risirbang sandal. Ag di na kamo magsayang nin oras sa pagparati'no sa manga tawong nasasabat ninyo sa dagan. 5 Pagluug ninyo sa arin man na baguy, sabyun nawna ninyo, ‘Bindisyonan logod nin Dios nin katoninungan ana baguy na adi.' 6 Kin ana tawong nakaistar adto mamumu'yun sa katoninungan, mapapasakanda ana katoninungan, alagad kin indi, bomabalikun aan sainyo. 7 Magtinir kamo sa baguy na pidagosan ninyo, ka'nun ninyo ag inomon ana ono man na itao nira sainyo ta ana trabador agko podir na omako nin tangran. Di kamo magparaborobalyo sa manlain-lain na baguy. 8 Kin sa pagluug ninyo sa banwaan na adto ag akoon kamo, ka'nun ninyo ana ono man na isirbi nira sa sainyo. 9 Parayun ninyo ana manga agko kailangan sa banwaan na adto, ag sabyun sa sakanda, ‘Ana pag-aadi' nin Dios arani nang omabot sainyo.' 10 Alagad kin sa pagluug ninyo di' kamo akoon nyo manga tawo sa banwaan na adto, lomowas kamo sa manga tinampo ag sabyun ninyo, 11 ‘Maski ading alpog nyading banwaan ninyo na rominukut sa sa'mun na manga pa'a ipipagpag namun tomang sainyo. Alagad di ninyo paglingawan na ana pa-aadi' nin Dios arani na.' 12 Pisabi ko sainyo, sa aldaw nin pag-ookom mas magaan ana padosang itatao nin Dios sa manga tawo adto sa Sodoma kisa sa banwaan na adi.”
Patanid sa manga Banwaan na Indi Nagsuwsuw
(Mt. 11:20-24)
13 “Malairak ninyo manga taga-Corazin! Malairak ninyo manga taga-Betsaida! Ta kin yo manga milagrong ginibo didi sainyo ginibo man adto sa manga taga-Tiro ag Sidon, di' kintana, yo manga tawong adto uguy nang nagsuwsuw na nakabado nin sako ag nagiuwa sa abo. 14 Sa aldaw nin pag-ookom, mas magaan ana padosaang itatao nin Dios sa manga tawo adto sa Tiro ag Sidon kisa sa banwaan na adi. 15 Ag ika, Capernaum,
Sa pagtaud mo matata'wan ika nin onra adto sa langit? Indi!
Ititikrag ika sa Hades!
16 Kaya sinabi ni Jesus sa sakanyang manga disipolo, “Ana siisay man na nirungug sa sainyo nirungug man sa sa'kun. Ana siisay man na nagisikwal sa sainyo, nagisikwal man sa sa'kun. Ana siisay man na nagisikwal sa sa'kun nagisikwal man sa nagsogo sa sa'kun.”
Pagbwilta nyo Sitinta y Dos
17 Kaso bominalik yo sitinta y dos na disipolo, maogmang-maogma sirang sominabi, “Kagorangnan, maski yo manga demonyo nagisonod sa sa'mun kin pisogo namun sa pangaran ninyo.” 18 Sominimbag si Jesus sa sakanda, “Nakita ko yo pagkatikrag ni Satanas alin sa langit na baga kilat. 19 Tina'wan ko kamo nin kapangyariyan na tongtongan ana manga kaagasan ag manga mantok, ag daugun ana kapangyariyan nya kalaban ninyong si Satanas. Kaya uda makakakulug sa inyo. 20 Alagad mag-ogma kamo buku sa takot sainyo ana manga maraut na espirito, kindi dail nakasorat sa langit ana pangaran ninyo.”
Naogma si Jesus
(Mt. 11:25-27; 13:16-17)
21 Nyo oras man sanang adto, si Jesus napono' nin kaogmaan na alin sa Espirito Santo, ag sinabi iya, “Pinagipasalamatan ko ika, Ama', ang Kagorangnan nin langit ag raga, ta ilinuum mo ana manga bagay na adi sa manga madodonong ag agko manga inadalan, ag ipinakita mo sa manga agko kabu'tan arug sa usad na agin. Amo, Ama, ta amo adi ana nipaogma sa saimo.”
22 “Itinao sa sa'kun nya sa'kun na Ama' yo nga'min na bagay. Ag uda nakakabisto sa Agin kindi yo Ama', ag uda nakakabisto sa Ama' kindi yo Agin. Alagad muya nya Agin na sabyun sa iba yo manunungud sa Ama', tanganing sira man makabisto.”
23 Kina ominatobang si Jesus sa sakanyang manga disipolo ag sinabi na indi narurungug nyo iba, “Pinaorog kamo ta nakita ninyo yo manga nakikita ninyo ngowan. 24 Pisabi ko sainyo, kadakul na manga propeta ag manga adi' na nima'wut na makakita nya sainyong nakikita alagad di nira nakita. Minawut man nirang marungug yo sainyong narurungug alagad indi nira adto narungug.”
Yo Maray na Samaritano
25 Agko usad na eskriba na tominindug tanganing tistingun si Jesus ag sinabi iya, “Maestro, ono tabi ana maray kong gibwun tanganing magkaagko ako nin boway na uda kasagkuran?" 26 Sominimbag si Jesus, “Ono yo nakasorat sa Kasogoan? Ono yo pagkaintindi mo nyadto?" 27 Sominimbag yo eskriba, “Sabi sa Kasogoan, ‘Kamu'yan mo ana Kagorangnan mong Dios na tuduk nya saimong poso', kalag, kusug, ag isip,' ag sinabi pa, ‘Kamuyan mo ana saimong kapwa arug nyo pagkamuya mo sa saimong sadiri.’ “ 28 “Tama ana simbag mo,” simbag ni Jesus, “Gibwun mo aan ag maboboway ika.”
29 Alagad sa pagma'wut nyo eskriba na indi iya maglowas na kasupug-supug, inonga niya otro si Jesus, “Siisay man ana sa'kun na kapwa?" 30 Sominimbag si Jesus, “Agko usad na lalaki na nibiyai alin sa Jerusalem papontang Jerico. Inabatan iya sa aagyan nin manga maonas, kinoko pati yo sakanyang bado, binanug iya ag binayan na alos guraan na. 31 Di nag-uguy ominagi adto yo usad na saserdote ag pagkakita niya sa lalaking nakababatang, nagliis sana iya ag nagpadagos sa pag-agi. 32 Ominagi man adto yo usad na Levita ag pagkakita niya sa lalaking nakabatang lominiis man iya ag nagpadagos sa kanyang pag-agi. 33 Pagkakowa agko man usad na Samaritanong ominagi adto. Nakita niya yo lalaking nakabatang, nairak iya nin maray. 34 Rinani niya yo lalaki ag inogasan yo kaprusan, bino'boan nin lana ag alak, ag binudburan pa niya yo kaprusan, kina ilinonad niya adto sa sakanyang asno ag dinara niya adto sa baguy paarkilaan ag ipinariparo niya adi. 35 Kinaodmaan tina'wan niya nin kabayaran yo kagsadiri nyo baguy paarkilaan ag sinabi, ‘Atamanun mo tabi ading lalaking adi ag kin pira pa ana kakolangan nyaan babayaran ko sa sa'kun na pagbabalik.' 36 Ngowan siisay sa pagtaud mo adto sa tolong tawong adto yo nagpakita nin pakikipagkapwa adto sa lalaking inabatan nyo manga maonas?” Onga ni Jesus. 37 Sominimbag eskriba, “Yo usad na nagpakita nin pagkairak sa sakanya.” Sinabi sa kanya ni Jesus, “Omagi ika ag bagaan man ana gibwun mo.”
Binisita ni Jesus si Maria ag si Marta
38 Nagpadagos si Jesus ag yo sakanyang manga disipolo sa pag-agi, sagkud sa lominuug sira sa usad na baryo adto usad na babayi na ana ngaran Marta, maogma niyang pinadagos si Jesus sa sakandang baguy. 39 Agko iya ipat'ngod na babayi na ana pangaran Maria, nag-uga si Maria sa paanan nyo Kagorangnan ag nagrungug ng mga ipitoro ng nyadi. 40 Alagad si Marta grabi yo kasibotan sa pagpriparar, kaya rominani iya ki Jesus ag sinabi, “Kagorangnan, di tabi ika naiirak pipabayan baga sana akong magtrabaong solo nyading sa'kun na ipat'ngod? Pakisabyi man daw tabi na rugpan man ako.” 41 Alagad sominimbag si Jesus sa sakanya, “Marta, Marta. Nasisibot ika ag naaadit sa kadakul na bagay. 42 Alagad usad sanang bagay yo talagang kinakaipwan. Pinili ni Maria yo pinakamaray ag di adi aalinun sa sakanya.”