9
Sinogo ni Jesus yo Dosing Apostol
(Mat. 10:5-15; Mc. 6:7-13)
1 Bina'no ni Jesus yo Dosing apostol ag tina'wan sira nin kapangyariyan ag podir na magpalayas nin manga demonyo ag magparaay nin manga kailangan, 2 ag sinogo niya sira tanganing ipangadal yo pag-aadi' nin Dios saka magparaay nin manga kailangan. 3 Kaya tinogonan niya sira, “Di' kamo magbalon nin onoman para sa sainyong pag-agi, di' kamo magdara nin sogkod, tinapay, bag, sintabo, o manga badong sasanglian. 4 Ag makidagos kamo sa arin man na baguy na omako' sainyo, ag magtinir adto sagkud sa pag-alin ninyo sa banwaan na adto. 5 Ag kin sa banwaan na adto di' nira kamo akoon, omalin kamo adto, ag ipalpag ninyo yo alpog sa sainyong manga pa'a bilang patanid sa sakanda.” 6 Kaya ominagi na yo manga apostol ag nagponta sa manga baryo, tanganing ipangadal yo Maray na Barita ag magparaay nin manga kailangan dawa sa'ri.
Naribaraw yo Isip ni Herodes
(Mat. 14:1-12; Mc. 6:14-29)
7 Ngowan si Herodes na namamayo sa Galilea nabari'tan yo manunungud sa nga'min na nangyayari. Ag naribaraw yo sakanyang isip, ta agko nagisabing si Juan na Parabunyag naboway otro, 8 agko man nagisabi na nagpakita otro si Elias, ag agko pa nagisabi na naboway otro yo usad sa manga propeta kaso nyadto. 9 Alagad sinabi ni Herodes, “Pinapogotan ko nin payo si Juan, alagad siisay adi na kadakul akong nababari'tan manunungud sa kanya?” Kaya iningowa niyang makita si Jesus.
Ana Pagpakaun sa Limang Ribo
(Mat. 14-13-21; Mc. 6:30-44; Jn. 6:1-14)
10 Kaso magbwilta yo manga apostol sinabi nira ki Jesus yo nga'min nirang ginibo. Ag sira sana yo iniba ni Jesus sa usad na banwaan na piba'nong Betsaida, 11 alagad naisyan nyo manga tawo kin sa'ri iya pominonta kaya sominonod sira. Ag maogma man sirang inako ni Jesus ag pinangadalan manunungud sa pag-aadi' nin Dios, ag pinaraay yo manga nangangaipo nin karaayan.
12 Kaso madali nang maglonod yo aldaw, rominani sa kanya yo Dosi ag sinabi sa kanya, “Paalinun na tabi ninyo ana manga tawo tanganing makapaadto na sira sa manga baryo ag sa palibot nyading syodad, tanganing makaanap nin pagkaun ag madadagosan, ta nasa kabubulbugan kita.” 13 Alagad sinabi ni Jesus sa kanda, “Kamo ana nita'wun sa kanda nin makakaun.” Alagad sominimbag sira, “Uda tabi kita ibang dara kindi limang pidasong tinapay ag dowang isra, pwira na sana kin sabyun mo sa sa'mun na omalin tanganing bomakal nin pagkaun para sa manga tawo.” 14 (Aaboton nin limang ribong lalaki yo manga aadto) Alagad sinabi niya sa kanyang manga disipolo, “Paugaun ninyo sira nin gropo-gropo na tigsisingkwinta katawo kada gropo.” 15 Ag ginibo man nira yo kamandaan niya, ag pinauga yo nga'min na tawo. 16 Kinoko ni Jesus yo limang tinapay ag dowang isra ag tominangad sa langit, ag nagpasalamat saka pinagbanga-banga yo tinapay, ag itinao niya adto sa manga disipolo tanganing ipanao sa manga tawo. 17 Nakakaun yo nga'min ag nabosog, ag kaso tiponon nyo manga disipolo yo nga'min na sominobra nakapono' sira nin dosing bakol.
Ana Patotoo ni Pedro manunungud ki Jesus
(Mat. 16:13-19; Mc. 8:27-29)
18 Usad na aldaw, mintras na kaiba niya yo sakanyang manga disipolo, pakatapos niyang mangadying solo rinani niya yo sakanyang manga disipolo ag inonga, “Siisay kono ako sabi nyo manga tawo?" 19 Sominimbag sira, “Agko nagisabi na ika si Juan na parabunyag; ag yo iba nagisabi na ika si Elias, saka agko pa ibang nagisabi na naboway otro yo usad sa manga propeta kaso nyadto.” 20 “Alagad kamo, ono man ana masasabi ninyo?” onga niya sa sakanda. “Ana Mesias na sinogo nin Dios.” Simbag ni Pedro.
Sinabi ni Jesus yo manunungud sa Sakanyang Kagra'nan
(Mat. 16:20-28; Mc. 8:30-9:1)
21 Tinogon ni Jesus yo sakanyang manga disipolo na indi nira adto ipanabisabi maski kiisay man. 22 Ag sinabi pa niya sa sakanda, “Ana Agin nin Tawo kinakaip'wan na magtius nin dakul na kadipisilan ag iindian iya nyo manga namamayong manga Judio, nyo manga namamayong saserdote, ag nyo manga parapangadal nya kasogoan. Kina iya ipaguguraan alagad sa ikatolong aldaw iya maboboway otro.”
23 Ag sinabi niya sa nga'min na aadto, “Kin siisay man ana muyang somonod sa sa'kun, buku niyang amo sonodon ana sakanyang sadiri, pa'sanun niya ana sakanyang kros oroaldaw, ag somonod sa sa'kun. 24 Ta ana siisay man na nimawut na magsalbar nin sakanyang boway sa sadiring paagi mauu'daan nyaan, alagad ana siisay man na mau'dan nyaan dail sa sa'kun magkakaagko nyaan. 25 Ta ono ngani ana mapapakinabangan nya usad na tawo kin masadiri niya ana bilog na kina'ban kin ana kabalyo nyadi yo sakanyang boway? Ono ngani ana mapapakinabangan niya kin iya mapakaraut? 26 Kin ako ag ana sa sa'kun na manga sasabyun ikinasupug niisay man, ikasusupug man iya nya Agin nin Tawo pagpadidi niya sa kamorawayan niya ag nya sakanyang Ama', nyo manga banal na angel. 27 Pisabyan ko kamo nin kaostowan, agko nagkapira sa sainyo na nakatindug didi na di magimatiun nin kagranan sagkud na indi niya nakikita yo pag-aadi' nin Dios.”
Nagba'go yo Itsora si Jesus
(Mat. 17:1-8; Mc. 9:2-8)
28 Pagkaagi nin walong aldaw pagkatapos adtong sabyun ni Jesus, iniba niya si Pedro, Juan, ag Santiago ag pominonta sa bokid tanganing magpangadyi. 29 Mintras na iya nipangadyi, nagba'go yo itsora nyo sakanyang lalawgun, ag yo sa sakanyang su'wut kominintab sa kapotian arug nyo pasi' nin kilat. 30 Ag biglang pominakita yo dowang lalaki na si Moises ag si Elias, 31 na tominonga na agko kamorawayan, ag nakipag-osip sakanya. Piosipan nira yo ni dangadang na kagranan ni Jesus na mangyayari adto sa Jerusalem. 32 Kaso grabi na yo iroroka ni Pedro ag nyo dowa niyang kaiba piro pinirit nirang indi makatorog, kaya nakita nira yo kamorawayan ni Jesus ag yo dowang lalaking kaiba niya. 33 Ag kaso paalin na yo manga lalaki, bigla na sanang nasabi ni Pedro, “Kagorangnan, maray tabi ta didi kita ngowan. Gomibo na sana tabi kami nin tolong payag, usad sa saimo, usad ki Moises, ag usad man ki Elias.” 34 Nagisabi pa iya nyo lindongan sira nyo panganoron, ag natakot sira kaso tagu'ban sira nyo panganoron. 35 Ag agko usad na bosis na alin sa panganoron na sominabi, “Amo adi ana sa'kun na Agin, na sa'kun na pinili'. Magrungug kamo sa sakanya.” 36 Kaso pomondo na yo bosis, nakita nira si Jesus na solo-solo na sana. Ag inilum nawna adto nyo manga disipolo, ag indi ipinanabisabi maski kiisay man yo sakandang nakita.
Pinaraay ni Jesus yo Usad na Lalaking Pisaniban nin Maraut na Espirito
(Mat. 17:14-18; Mc. 9:14-27)
37 Kinaodmaan, kaso pabongsod na sira alin sa bokid, sinabat si Jesus nin kadakul na tawo. 38 Agko usad na lalaki adto sa kadaklan na nag-uyaw nin bagadi, “Maestro, nipakimairak tabi ako saimo. Pakiki'ta man tabi ninyo yo sa'kun na agin, ta iya sana ana solo-solo kong agin. 39 Pirmi na sana iyang piparasaniban nin maraut na espirito, ag bigla na sana iyang niparauyaw. Pipakimig-kimig iya sagkud sa magsobo yo sakanyang ngoso', pikulgan iya ag di muyang ba'yan. 40 Ipinakimairak ko na tabi sa saimong manga disipolo na palayasun yo maraut na espirito, alagad di nira magibo.” 41 Sominimbag si Jesus, “Manga tawong mararaut ag uda pagtood, sagkud kinaono ko pa kamo dapat ibanan ag pagtiusan? Daraun mo didi ana saymong agin.” 42 Mintras na nirani yo agin, itinomba iya nyo demonyo adto sa raga, ag pinakimig-kimig. Alagad sinawi' ni Jesus yo maraut na espirito, ag pinaraay yo agin ag itinao sa sakanyang ama'. 43 Ag yo nga'min na tawo nagngalas sa kapangyariyan nin Dios.
Nagsabi Otro si Jesus manunungud sa Kanyang Kagranan
(Mt. 17:22-23; Mc. 9:30-32)
Mintras na nagingalas yo nga'min na tawo adto sa nga'min na ginibo ni Jesus, sinabi niya adto sa sakanyang manga disipolo. 44 “Runggun ninyong maray ading sasabyun ko sa inyo: ana Agin nin Tawo pagtatraydoran.” 45 Alagad yo manga disipolo indi naisyan yo muya niyang sabyun. Ta yo kaologan nyadto nailum sakanda. Kaya indi nira adto naintindiyan, ag natatakot man sirang mag-onga sa sakanya kin ono yo gostong sabyun nyadto.
Siisay ana Pinakadakuu
(Mt. 18:1-5; Mc. 9:33-37)
46 Yo manga disipolo ni Jesus nagdiriskotiran kin siisay yo pinakadakuu sa sakanda. 47 Isi ni Jesus kin ono yo sakandang manga piisip, kaya bina'no niya yo usad na saday na agin ag pinatindug sa kaabay niya. 48 Ag sominabi iya sa sakanyang manga disipolo, “Ana siisay man na nagiako sa agin na adi alang-alang sa sa'kun niako sa sa'kun, ag siisay man na nagiako sa sa'kun niako sa nagsogo sa sa'kun. Ag yo pinaka ori' sainyo nga'min among ipitaas.”
Kasorog Ta ana Buku tang Kalaban
(Mc. 9; 38-40)
49 Sinabi ni Juan, “Maestro, agko tabi kami nakitang usad na tao na nipalayas nin manga dimonyo sa paagi nya saimong pangaran, ag sinabyan iya namun na pomondo ta buku man iyang kaibanan ta.” 50 Alagad sinabi ni Jesus sakanda, “Di' ninyo iya pagsawi'un; ta ana siisay man na di nikalaban sa sa'tun sorog sa'tun.”
Di Inako' si Jesus sa Usad na Baryo sa Samaria
51 Kaso niparani na yo panaon na si Jesus nita'sun adto sa langit, nagdisisyon iyang magpontang Jerusalem. 52 Ag nagmanda iya nin nagkapirang minsairo na mao'na adto sa Samaria tanganing ipriparar yo nga'min para sa pag-abot niya. 53 Alagad indi iya muyang akoon nyo manga Samaritano ta iya paponta sa Jerusalem. 54 Kaso makita adto nyo disipolong si Santiago ag si Juan sominabi sira ki Jesus, “Kagorangnan, togot tabi ika na magpatikrag kami nin kalayo alin sa langit tanganing soloon sira?" 55 Alagad inatobang sira ni Jesus ag tinuyaw, sabi niya, “Indi ninyo isi kin onong klasing espirito ana didiyan sa sainyo; ta pominadidi yo Agin nin Tawo indi para ipakaraut yo manga tawo kindi tanganing isalbar sira.” 56 Ag pominonta sira sa ibang baryo.
Pagsonod ki Jesus
(Mat. 8:19-22)
57 Mintras na nagiagi sira, agko usad na tawo na sominabi ki Jesus, “Magsonod tabi ako saimo maski sa'ri kamo pomonta.” 58 Sominimbag si Jesus, “Agko istaran ana manga layas na ayam ag agko man sagag ana manga bayong, alagad ana Agin nin Tawo uda man basang matorogan o logar na mapagpadiskansowan. 59 Sinabi ni Jesus sa usad, “Somonod ika sa sa'kun.” Alagad sominimbag yo lalaki, “Kagorangnan, togotan mo nawna tabi ako na somamput tanganing maipalubung ko yo sa'kun na ama'.” 60 Sinimbag iya ni Jesus, “Paba'yan mo na sa manga guraan yo paglubung nyo sadiri nirang manga guraan. Alagad ika, mag-agi ika ag ipangadal mo yo manunungud sa pag-aadi' nin Dios.” 61 Sinabi man nyo usad ki Jesus, “Magsonod tabi ako saimo, Kagorangnan; alagad magpatuud nawna tabi ako sa sa'kun na manga kaiba sa baguy.” 62 Sinabi sa sakanya ni Jesus, “Ana siisay man na niarado ag pirming niparakiling bukung angay sa pag-aadi' nin Dios.”