8
Manga Babaying Nagsirbi ki Jesus
1 Poon nyadto si Jesus naglibot sa manga banwaan ag manga baryo, na ipibandilyo yo maray na barita manunungud sa kaadi'an nin Dios. Kaiba niya yo dosing apostol. 2 Saka yo nagkapirang babayi na pinaraay niya sa mararaut na espirito, ag manga kailangan. Usad adto si Maria (na Magdalena ana pandowang pangaran) na alin sa kanya yo pitong demonyo yo pinalayas. 3 Si Juana na sugud ni Cuza, usad sa pitiwalaan ni Herodes adto sa sakanyang manga pagsorosadiri, si Susana, ag kadakul pang iba. Ading manga babaying adi nitabang sa manga pangangaipo ni Jesus ag nyo manga disipolo niya alin sa pagsorosadiri nira.
Ana Parabola manunungud sa Paratanum
(Mt. 13; 1-9; Mk. 4:1-9)
4 Usad na aldaw kaso dakul na yo manga niabot alin sa iba ibang banwaan ta nagitpon dail ki Jesus, nagsabi iya nin bagading parabola, 5 “Agko usad na para tanum na pominonta tanganing magwaras nin bini'. Kaso iya nagiwaras nyadtong bini', agko natikrag sa dagan; ag natongtongan adto, ag ominabot yo manga bayong ag tinoka yo bini'. 6 Yo iba natikrag man adto sa kababatowan. Kaso tominobo, naloyos man sana ag natigbak ta sa kau'dan nin tobig. 7 Agko man natikrag sa katutuukan, na kasabay na nagtobo nyo manga bini' kaya' sana nasapawan man sana nin manga tuwuk. 8 Yo iba natikrag man sa maray na raga. Tominobo ag nagbonga nin marayray.”
Kaso masabi na niya adto, sominabi iya nin maksug, “Ana agko pagrungug, magrungug tanganing makaintindi.”
Ana katoyowan nyo manga parabola
(Mt. 13:10-17; Mk. 4:10-12)
9 Inonga si Jesus nyo sa sakanyang manga disipolos kin onong kaologan nyadtong parabola. 10 Sominimbag si Jesus sa sakanda: “Ana pagkaisi nyo sikrito manunungud sa kaadi'an nin Dios itinao sa sainyo, alagad sa iba ipipaagi sa manga parabola, tanganing,
‘Kin komita man sira di sira
makakakita;
Ag maski sira magrungug, indi makaintindi.'
Ipinaliwanag ni Jesus yo Parabola
(Mt. 13; 18-23; Mc. 4:13-20)
11 “Amo adi yo gostong sabyun nyo parabola. Yo bini' amo yo sasab'yun nin Dios. 12 Yo manga natikrag sa dagan amo adto yo manga tawo na nagrungug, piro pag-abot nyo diyablo inaguw sa sakandang poso' yo sasab'yun, tanganing indi sira makatood ag masalbar. 13 Yo manga natikrag man sa kababatowan amo man yo manga nagrungug nyo sasab'yun nin Dios na agko kaogmaan, alagad di gominamot sa sakandang manga poso', tominood man kinta'na sira sa ali'pot na panaon, alagad kaso ominabot yo manga kadipisilan ominindi sira. 14 Yo bini' man na natikrag sa manga katutuwukan amo adto yo manga tawong nagrungug, piro di nag-uguy nadaug sira nin manga rurumrumun sa boway ag pagkamuya sa kayamanan ag kaogmaan sa boway na adi, kaya indi nainog yo sa sakandang manga bonga. 15 Alagad yo manga bini' na nakawaras sa maray na raga amo adto yo manga tawong agko kasinsirowan ag maray na poso' na nagrungug nyo sasab'yun nin Dios ag naging matinius na nag-uwat sagkud sa magbonga nin maray na bonga.”
Ana Parabola manunungud sa Ilawan
(Mk. 4:21-25)
16 “Uda nisolo nin sosoloan ag pagkatapos pita'guban nin bangga o kaya pibutang sa irarum nin babatangan. Imbis, ipibutang talaga adi sa tamang bubutangan tanganing yo liwanag makita nyo nga'min na tawong nilu'gun. 17 Ta uda nasasaray na indi natotorakaan, ag uda man naiilum na indi naiisyan. 18 Kaya pakarayun ninyong maray ana sainyong pagrungug. Ta ana kada agko tata'wan pa; piro ana siisay man na uda koko'nan pa maski ana pitaud niyang sa sakanya.”
Yo Ina ag yo manga Ipat'ngod ni Jesus
(Mt. 12:46-50; Mk. 3:31-35)
19 Yo ina' ag yo manga ipat'ngod ni Jesus pominonta sa sakanya tanganing makita iya, alagad indi sira makarani ta kadakul yo manga tawong nakapalibot sakanya. 20 Agko sominabi ki Jesus, “Yo saimong ina' ag yo saimong manga ipat'ngod adto sa lowas muya ikang makita.” 21 Alagad sominimbag si Jesus, “Ana sa'kun na ina' ag manga ipat'ngod amo adtong manga nirungug nyo manga sasab'yun nin Dios ag nisonod nyaan.”
Pinaupuy ni Jesus o Bagyo
(Mt. 8:23-27; Mk. 4:35-41)
22 Usad na aldaw sinabi ni Jesus sa sakanyang manga disipolos, “Pomonta kita sa balyo nyading lawud.” Kaya lominonad sira sa bangka ag nagpoon na sirang magsakuy. 23 Kaso sira nagisakuy, nakatorog si Jesus. Agko usad na mak'sug na parus na ominabot sa lawud, kaya yo bangka linuug nin tobig. Kaya sira namiligrong maray. 24 Yo manga disipolo rominani ag ginisung si Jesus na yo sabi, “Maestro, Maestro matutundag na kita!”
Bominowat si Jesus saka sinawi' yo parus ag yo mak'sug na longso, ag pominondo man tolos, kaya naging matoninung yo tobig. 25 “Sa'ri na yo sainyong pagtood?” Onga niya sa manga disipolos. Sa katakotan ag sa sobrang kangalasan nag-orongaan sira. “Siisay kayang tawo adi? Na pati ana parus ag ana longso nasosogo, ag nisonod man sa sakanya.”
Pinaraay ni Jesus yo Usad na Lalaking Pisaniban nin manga Demonyo
(Mt. 8:28-34; Mk. 5:1-20)
26 Rominoong sira sa logar nin Gadara, na kaatobang nin Galilea. 27 Kaso makababa na si Jesus, sinabat iya nin usad na lalaking taga adto, na pisaniban nin demonyo. Uguy nang panaon na di adi nibado ag di niistar sa baguy, kindi adto na sa kamposanto niistar. 28 Kaso makita niya si Jesus, ominuyaw iya ag lominood sa atobangan ni Jesus, ag sominabi nin malak'sug, “Jesus, agin nin kaoroita'sang Dios, onong pakilabut mo sa sa'kun? Nakikimairak ako saimo na di mo ako pagpadosaan.” 29 Sinabi niya adto ta nagsogo na si Jesus sa maraut na espirito na lomowas na adto sa lalaki. Pirmi iyang pisaniban nin demonyo. Kaya ngani dawa iya pikadinaan sa kamut ag sa pa'a, pipatud sana niya adto. Ag pidara iya nyo dimonyo adto sa pwirang logar. 30 Inonga iya ni Jesus, “Onong pangaran mo?” “Lehiyon,” yo sakanyang simbag, ta kadakul na demonyong lominuug sa sakanya. 31 Ag nakimairak na maray yo manga demonyo ki Jesus na di sira mandaan na tomawun adto sa kararum-raruman na uda kasagkuran.
32 Agko adto gropo nin kaoorigan na nanginginaun sa gilid nyo bantuy. Yo manga demonyo nakimairak ki Jesus na togotan na sana sirang lomuug adto sa manga orig, ag tinogotan man sira. 33 Kaya nagrolowas yo manga demonyo adto sa lalaki, ag nagruluug sa manga orig. Yo kaoorigan biglang nagdaralaganan ag dorodiritsong natikrag sa lawud kaya nagkakaurumus.
34 Kaso makita nyo manga paraasikaso yo manga pangyayari, nagdulag sira ag ipinamarita yo manga pangyayari adto sa banwaan ag sa manga baryo. 35 Yo manga tawo man nagrolowasan tanganing ki'tun yo manga pangyayari. Pag-abot nira ki Jesus, nakita nira yo lalaking sinaniban nin manga dimonyo na nakauwa sa paanan ni Jesus, nakabado na ag toltol na yo pag-iisip. Natakot sira intiro. 36 Yo manga nakakita sa manga pangyayari nangistorya sa manga tawo kin paono pinaraay yo pisaniban nin demonyo. 37 Kaya yo manga tawo adto sa Gadara nakiosip ki Jesus na omalin sa sakandang logar, ta grabi yo takot na sakandang namamati'an. Kaya si Jesus lominonad sa bangka saka ominalin. 38 Yo lalaking pinagsaniban nin maraut na espirito nakiosip ki Jesus na kin pwiding iiba iya. Alagad pinasamput iya ni Jesus ag sinabiyan. 39 “Somamput na ika sa sainyo, ag ipamarita mo yo dakuung bagay na ginibo nin Dios sa saimo.” Kaya yo lalaki sominamput ag ipinamarita sa bilog na banwaan yo ginibo ni Jesus sa sakanya.
Binoway yo Agin ni Jairo ag Pinaraay yo Usad na Babayi
(Mt. 9:18-26; Mk. 5:21-43)
40 Kaso makabalik na si Jesus alin adto sa balyong lawud, maogma iyang inako nyo manga tawo ta sira niuwat na sa sakanya. 41 Kina ominabot man yo usad na lalaki na yo pangaran Jairo, usad na namamayo sa sinagoga. Rominani iya ag lominood sa paanan ni Jesus, ag nakimairak na pomonta adto sa baguy niya. 42 Ta yo sakanyang solo-solong agin na babayi na magdodosi anyos niingagda na.
Kaso nagibaklay na si Jesus paponta adto, rinusu iya nyo kadakul na tawo. 43 Kaiba adto sa manga nirinusuan yo usad na babaying di nipondo yo sakanyang pagrigla sa luug nin dosing taon, ta uda nakakabolong sa sakanya maski na ngani obos na yo sakanyang pagsorosadiri. 44 Rominani iya sa talikokoran ni Jesus ag rinu'tan yo gayad nyo bado ni Jesus, ag insigida napondo yo pagbolos nyo sakanyang rigla. 45 “Siisay yo rominuta sa sa'kun?” onga ni Jesus. Kaso magpainda yo nga'min, sinabi ni Pedro, “Maestro, napapalibotan tabi ika ag narurusu' nin manga tawo.” 46 Alagad sominimbag si Jesus, “Agko talaga rominuta sa sa'kun; ta namati' kong agko kapangyariyan na lominowas sa sa'kun.” 47 Kaso maisyan nyo babayi na di nailum yo sakanyang ginibo, rominani iyang nangungubug-kubug ag lominood sa atobangan ni Jesus. Na nakikita nyo intirong tawo, sinabi niya kin taynga ta rinu'tan niya si Jesus ag kin paono iya naraay tolos. 48 Kina sominabi si Jesus sa babayi, “Agin, pinaraay ika nya saimong pagtood. Somamput na ika. Ana katononungan didiyan na sasaimo.”
49 Mintras na nisabi pa si Jesus, agko usad na ominabot alin adto sa baguy ni Jairo na namamayo sa sinagoga. “Yo agin mong babayi guraan na, “sabi niya ki Jairo. “Di mo na pag-istorbowun pa ana Maestro.” 50 Narungug adto ni Jesus kaya sominabi iya ki Jairo, “Di ika matakot, tomood sana ika, ag ana agin mo mararaay.”
51 Pag-abot niya adto sa baguy ni Jairo, uda iya ibang pinaluug kindi si Pedro, Juan ag Santiago, ag yo manga gorang nyadtong daragita. 52 Sa lowas kadakul yo manga tawong niibi adto sa daragita. Alagad sinabi ni Jesus, “Pomondo kamo sa pagparaibi, ta bukung guraan ana agin, kindi nagitorog sana.” 53 Pinagngiritan sana iya nyo manga tawo, ta isi nira na guraan na yo daragita. 54 Alagad kinaptan ni Jesus yo kamut nyo daragita ag sominabi, “Agin, bomowat ika!" 55 Kaya yo pag'angus nyadtong daragita bominalik, kaya bominowat tolos iya. Kina sinabi ni Jesus na ta'wan yo daragita nin makakaun. 56 Yo manga gorang nyadtong daragita nagkangaralas, alagad sinabyan sira ni Jesus na di pagsabyun maski kiisay man yo nangyari.