7
Pinaraay ni Jesus yo Sorogoon nya Kapitan na Romano
(Mt. 8:5-13)
1 Kaso tapos na si Jesus na mangadal sa manga tawo, pominonta iya sa Capernaum. 2 Agko adto usad na kapitan na Romano na agko sorogoon na namumu'yan niya sa maray, alagad nagkailang nin grabi na baga na magraan. 3 Kaso mabari'tan nyo kapitan yo manunungud ki Jesus, nagsogo iya nin nagkapirang ipigalang na manga namamayo na Judio tanganing pakiosipan si Jesus na pomaadto ag paraayun yo sakanyang sorogoon. 4 Kaso matorakan nira si Jesus nakimairak sira sa sakanya yo sabi: “Ana lalaking adi maninigong tabangan mo, 5 ta payaba niya ading sa'tun na nasyon ag ipinagpatogrok pa kita niya nin sinagoga.” 6 Kaya ominiba si Jesus sa sakanda. Alagad nyo arani na iya sa baguy ipinasabat na iya nyo kapitan sa sakanyang manga amigo ag ipinasabi yo bagadi. “Kagorangnan, di na tabi ika magpagal na pontaan pa ako sa baguy ta di ako maninigo' na pontaan mo 7 ag buku ako maninigo' na omatobang sa saimo. Sabyun mo na sana tabi ag ana sa'kun na sorogoon mararaay, 8 Ta ako usad man na tawo na nasa irarum nin kapangyariyan nin iba, ag agko man ako nin manga soldados na nasasakpan. Kin sabyan ko yo usad, ‘Pomaadto ika,’ nipaadto man, kin pisabyan ko na, ‘Pomadidi ika,’ nipadidi man, kin pisabyan ko yo sa'kun na sorogoon, ‘Gibwun mo adi!’ Pigibo man niya. 9 Kaso marungug ni Jesus ading sasabyun na adi, napangalas iyang maray ag ominatobang sa manga tawo na nagisonod sa sakanya ag sinabi, “Pisabi ko sa inyo. Maski sa bilog na Israel indi pa ako nakakita nin bagadi kadakuung pagtood.” 10 Kaso bomalik sa baguy yo manga sinogo naabotan nira na maraay na yo sarogoon.
Binoway ni Jesus yo Agin na Lalaki nyo Babaying Balo
11 Di nag-uguy, si Jesus pominonta adto sa usad na logar na piba'nong Nain ag ominiba sa sakanya yo sakanyang manga disipolo ag yo kadakul na tawo ominiba man. 12 Kaso nidangadang na iya sa trangkaan nyadtong banwaan, nasabat niya yo manga tawo na agko daradarang guraan. Ana guraan na adto solo-solong agin nyo babaying balo ag kadakul yo nakikipaglubung. 13 Kaso makita adto nyo Kagorangnan, nairak iyang maray adto sa ina' kaya sinabyan niya yo babayi, “Di ika magparaibi.” 14 Rinani niya yo kawun ag rinu'tan niya, kaya yo manga nagidara nyadto tominurung ag sinabi niya, “Soltiro, pisabyan ko ika na bomowat!” 15 Yo guraan na soltiro bominowat man ag nagpoon na iyang magparasabi, kina itinao na iya ni Jesus sa sakanyang ina. 16 Yo nga'min biyong nagkangaralas na agko pagkatakot ag nag-omaw sa Dios, “Dakuung propeta yo pominonta sa sa'tun ngowan! Yo Dios pominonta didi tanganing tabangan yo manga taong sadiri niya.” 17 Nag-ukup sa bilog na Judea yo barita manunungud sa ginibo ni Jesus ag sa manga kaabay na banwaan.
Yo manga Minandaan ni Juan na Parabunyag
(Mt. 11:2-19)
18 Binari'tan man si Juan na Parabunyag nyo sakanyang manga disipolos manunungud adto sa manga ginibo ni Jesus, kaya bina'no niya yo dowa niyang disipolos. 19 Ag pinaponta niya sira sa Kagorangnan tanganing ongaun, “Ono ika na tabi yo pisabi na niaboton, o mag-ugat pa kami nin iba?"
20 Pag-abot nira ki Jesus sinabi nira, “Sinogo tabi kami ni Juan na Parabunyag sa saimo tanganing ongaun ika kin ika na yo pisabing niaboton, o mag-ugat pa kami nin iba?"
21 Nyo manga oras na adto kadakul nang pinaraay si Jesus, manga agko kamatian ag kailangan, ag manga pisaniban nin mararaut na espirito, ag pati yo manga bota nakakita na. 22 Ag sinimbag niya yo manga sinogo, “Bomalik kamo adto ki Juan ag sabyun ninyo yo sainyong manga nakita ag narungug: Yo manga bota nakakakita na, yo manga pilay nakakaagi na, yo manga pudpurun nagkakaraay na, yo manga bungug nakakarungug na, yo manga guraan nagkaboroway otro, ag yo maray na barita naipangangadal na sa manga pobri. 23 Bibindisyonan ana tawong nipadagos nya sakandang pagtood sa sa'kun.”
24 Kaso makaalin na yo manga sinogo ni Juan Parabunyag, sominabi si Jesus adto sa kadakul na tawo manunungud ki Juan, “Kaso kamo pominonta sa kalangtaran onong klasing tawo yo muya ninyong makita? Usad na tambo na pipalid-palid nin parus? 25 Kin buku, ono talaga ana gosto ninyong makita adto? Usad na tawong nakabado nin maoyay na bado? Alagad ana nisu'wut nin maoyay ag naboboway nin maayaay sa palasyo nin adi' adto niistar. 26 Ono talaga ana muya ninyong makita? Usad na propeta? Amo, alagad daug pa niya ana usad na propeta. 27 Ta amo adi yo pisabi manunungud sa kanya nyo kasoratan,
‘Ipapadara ko yo sa'kun na sorogoon na
maoo'na sa saimo,
Na amo ana magipripararun nya saimong aagyan.'
28 Sasabiyun ko sainyo, sa nga'min na ipinangagin nin usad na babayi uda na mas makadadaug ki Juan. Alagad ana usad na pinakaminos sa kaadi'an nin Dios mas maray pa ki Juan.”
29 Yo nga'min na tao maski yo manga parasingil nin bowis na nagrungug ki Juan sominonod sira sa kamu'yan nin Dios kaso magpabunyag ki Juan. 30 Alagad yo manga Pariseo ag yo manga parapangadal nya kasogoan inindian yo plano nin Dios para sa sakanda ta indi sira nagpabunyag ki Juan.
31 Ag sinabi pa ni Jesus, “Paono ko ipapariyo ana manga tawo ngowan? Ag siisay ana kaarug nira? 32 Ana kaarug nira amo ana manga agin sa plasa na niyamun ag ana iba piparauyawan ana sakandang manga kayamun,
‘Tominogtog kami nin plawta para sainyo,
alagad di man kamo bominayli;
Nagrawit-dawit kami,
piro di man basang kamo ominibi.’ (Muyang sabiyun, tinoroan sira piro indi sira nagtood)
33 Kaya inisip ninyo na si Juan pisaniban nin demonyo dail pominonta iya didi na indi nikaun nin tinapay ag indi man niinom nin alak. 34 Ag piisip man ninyo na ana Agin nin Tao kaangap ag boratsiro ag amigo nin madadayang parasingil nin bowis ag manga parakasala ta iya nikaun ag niinom arug nya iba. 35 Alagad ana kadonongan nin Dios napapamato'ran na tama, sa paagi nyo pamomoway nyadtong manga agin niya.”
Si Jesus sa Baguy ni Simon na Pariseo
36 Agko usad na Pariseo na ominimbitar ki Jesus tanganing adto makipang ga'bi sakanya, pominonta si Jesus ag rominani sa pika'nan. 37 Sa banwaan na adto agko usad na babayi na bistong maray na namomoway sa kasa'lan, nabari'tan niya na si Jesus nakikikaun sa baguy nyadtong Pariseo, pominonta iya adto na agko darang paomot, 38 ag rominani iya sa talikokoran ni Jesus, ag ominibi sa tungtung nyo paa nyadi. Nasumug nin lowa yo paa ni Jesus kaya pinonasan niya adto nya sakanyang bowuk, pinagparaarang ag bino'boan nin paomot. 39 Kaso makita adi nyo Pariseo na nag-imbitar ki Jesus naisabuut nyadi, “Kin talagang propeta ana tawong adi, isi niya kin siisay ag kin onong klasing babayi yo nag-apwas sakanya usad na klasi nin babaying parakasala.”
40 Bilang simbag sa piisip nyo Pariseo sinabi ni Jesus, “Simon, agko ako sasabyun saimo.” “Ono tabi aan, Maestro?” yo simbag ni Simon. 41 Sominimbag si Jesus sa sakanya, “Agko dowang lalaki na nangotang nin sintabo sa para paotang. Yo usad kinyentos na dinaryo yo sakanyang inotang, yo usad singkwitang dinaryo. 42 Kaso di makabayad pariyo sirang pinatawad. Ngowan siisay yo mas namumuya sa parapaotang?" 43 Sominimbag si Simon, “Para sa sa'kun tabi yo usad na pinatawad nin dakuung kantidad.” “Tama ana simbag mo,” sabi ni Jesus. 44 Pagkakowa, kinilingan niya yo babayi ag sinabyan si Simon, “Nakikita mo ading babaying adi? Nagpadidi ako sa baguy mo, alagad di mo ako tina'wan nin tobig tanganing ogasan ana sa'kun na paa, alagad iya sinumug niya nin lowa yo sa'kun na manga paa ag pinonasan niya nin sakanyang bowuk. 45 Di mo ako inarang, alagad ading babaying adi, poon nyo pagkaluug niya, di na nagpondong paarang-arang sa sa'kun na manga paa. 46 Di mo binutangan nin lana nin oliva yo sa'kun na payo, alagad ino'wan niya nin paomot yo sa'kun na manga paa. 47 Kaya pisabyan ta ika, dail sa kadakuu nyo pagkamuya na ipinakita niya sa sa'kun yo nga'min niyang kasa'lan ipinatawad na. Alagad ana tawong pinatawad nin agbay, agbay man ana pagkamuya.” 48 Kaya sinabi ni Jesus sa babayi, “Yo manga kasa'lan mo, pinatawad na.” 49 Yo ibang manga bisita na aadto, nagpoon nang mag-iring-ingan sa lambang usad, “Siisay daw ading tawong adi na maski ana pagpatawad nin kasa'lan pipakilabtan?" 50 Alagad sinabiyan ni Jesus yo babayi, “Ana saimong pagtood among nagsalbar sa saimo; sigi omagi na ika nasa saimo na ana katoninungan.”