Ana Maraay na Bareta Manunungud ki Jesu Cristo basi ki
Mateo
Introdoksiyon
Ana Maraay na Barita basi ki Mateo nipaayag nya Maraay na Barita na si Jesus amo ana ipinanogang Paraligtas. Sa paagi niya ginibo nin Dios yo manga panoga na ginibo niya sa sakanyang banwaan sa O'nang Tipan. Ana Maraay na Baritang adi buku sana para sa Judio kindi para man sa bilog na kina'ban, maski ngani si Jesus naipamundag ag namoway na kaiba nin manga Judio.
Sa Maraay na Barita basi ki Mateo, maingat ana pagkaladawan nya manga pangyayari. Nipoon adi sa pagkamundag ni Jesus, ana pagbunyag ag pagtintar sakanya, kina isinorat ana ginibo niyang pagtoro ag pagpaomay sa Galilea. Sonod didi amo ana pagbaklay ni Jesus alin sa Galilea papontang Jerusalem, ag ana manga pangyayari sa mawring semana sa boway niya na nagtapos sa pagpako sakanya sa kros, ag ana pagkaboway niya otro.
Ipipabisto si Jesus sa Maraay na Baritang adi bilang pamosong Maestro na agko kapangyariyan sa pagpaliwanag nya Kasogoan nin Dios. Nagtoro iya manunungud nya Paghahadi nin Dios. Kadaklan sa sakanyang katoroan mababanga sa limang gropo: 1. Ana Sermon sa Bokid na nipakita kin ono ana dapat na pagkatao, nya manga katungran, manga deretso ag popontaan nya manga siyodadano sa Kahadian nin langit (kapitolo 5-7); 2. ana manga katoroan sa dosing desipolo para sa sakandang misyon (kapitolo 10); 3. ana manga parabola manunungud sa Kahadian nin langit (kapitolo 13); 4. ana katoroan manunungud sa pagigin desipolo (kapitolo 18); ag 5. ana katoroan manunungud sa kapondowan nya panaon na adi ag ana manunungud nya pag-abot nya Kahadian nin Dios (kapitolo 24,25).
Ana Luug
A. Ana Ginikanan ag ana Pagkamundag ni Jesu Cristo 1:1-2:23
B. Ana Ministeryo ni Juan Parabunyag 3:1-12
C. Ana Pagbunyag ag Pagtintar ki Jesus 3:13--4:11
D. Ana Ministeryo ni Jesus sa Galilea 4:12-18:35
E. Alin sa Galilea paponta sa Jerusalem 19:1-20:34
F. Ana Oltimong semana sa Jerusalem 21:1-27:66
G. Ana pagkaboway otro ag ana mga pagpakita nya Kagorangnan 28:1-20