Ana Maraay na Bareta Manunungud ki Jesu Cristo basi ki
Mateo
1
Ana manga Laing Ginikanan nin Jesu Cristo
1 Amo adi ana listaan nyo manga laing inalinan ni Jesu Cristo, na alin sa lai ni David, si David alin man sa lai ni Abraham. 2 Si Abraham among ama ni Isaac, si Isaac among ama ni Jacob, si Jacob among ama ni Juda ag nya sakanyang manga ipa'tngod. 3 Nagin manga agin man ni Juda ag Tamar sira si Fares ag Zera, si Fares among ama ni Esrom, si Esrom amo man ama ni Aram. 4 Si Aram amo man ama ni Aminadab, si Aminadab ama ni Naason, si Naason ama ni Salmon. 5 Si Salmon amo man ama ni Boaz (si Rahab ana sakanyang ina usad na Hentil), si Boaz among ama ni Obed (si Ruth a sakanyang ina), si Obed ama man ni Jesse. 6 Si Jessie among ama ni Hading David. Nagin agin ni David sa dating sugud ni Urias, si Solomon.
7 Si Solomon ama ni Roboam, si Roboam ama ni Abias na ama man ni Asa. 8 Si Asa ama ni Josafat, na ama ni Joram na ama man ni Uzias. 9 Si Uzias among ama ni Jotam, si Jotam ama ni Acaz na ama man ni Ezeqias. 10 Si Ezeqias ama ni Manases na ama ni Amon na ama man ni Josias. 11 Si Josias among ama ni Jeconias ag nyo sakanyang manga ipa'tngod, ipinangagin sira nyo manga panaon na mag-istar yo manga Israelita sa Babilonia. 12 Kaso matapos na yo pagkabiag nyo manga Israelita sa Babilonia, nagin agin ni Jeconias si Salatiel, si Salatiel ama ni Zorobabel. 13 Si Zorobabel ama ni Abiud, si Abiud ama ni Eliakim na ama man ni Azor, 14 si Azor among ama ni Zadok, si Zadok among ama ni Aquim na ama man Eliud; 15 Si Eliud ama ni Eleazar, si Eleazar ama ni Matan na ama man ni Jacob. 16 Si Jacob among ama ni Jose, na sugud ni Maria na ina ni Jesus, na piba'nong Cristo. 17 Kaya poon ki Abraham anggan ki David agko katorsing enerasiyon, katorsing enerasiyon man poon ki David anggan nagponta yo manga Israelita sa Babilonia, nagkaagko pa nin katorsing enerasiyon poon nyo nagponta sira sa Babilonia abot sa panaon nin pagkamundag ni Cristo.
Ana Pagpangagin ki Jesu Cristo
(Lukas. 2:1-7)
18 Bagadi yo manga pangyayari kaso ipangagin si Jesu Cristo. Si Maria na sakanyang ina ag si Jose nakatalaan nang ikasal nyo manga panaon na adto, piro bago pa man sira ikasal, napag-isyan na ni Maria na mabrus iya sa paagi nya kapangyariyan nin Espirito Santo. 19 Si Jose usad na matanos na tao ag di niya muyang mapasupug si Maria, kaya inisip niyang sowayan na sana adi nin pailum.
20 Abang piparaisip adi ni Jose, agko usad na angel nin Kagorangnan ana nagpakita sa sakanyang pangatorogan, sinabi sakanya, “Jose, na alin sa lai ni David, di ika matakot, ipadagos mo ana pagpakasal ki Maria, ta nagmabrus iya sa paagi nya kapangyariyan nin Espirito Santo. 21 Mangangagin iya nin usad na lalaki ag pangangaranan mo iyang Jesus,a dail ililigtas niya ana manga tao sa sakandang manga kasa'lan.”
22 Nangyari ana manga bagay na adi tanganing magibo yo sinabi nin Kagorangnan sa paagi nin Propeta:
23 “Mangingidam ana usad na birhenb ag mangangagin ng usad na lalaki. Baba'nowun iyang Emmanuel”c (na ana muyang sabiyun “Kaiba ta ana Dios”).