2
Pagbisita nin manga Taong Alin sa Subangan
1 Amo adi ana nangyari; ipinangagin si Jesus sa banwaan nin Betlehem, sakup nin Judea kaso si Herodes ana Hadi. Usad na aldaw agko nag-abot sa Jerusalem na manga lalaking madonong manunugud sa kaologan nya manga bitoon, alin sira sa Subangan. 2 Nag-onga sira, “Sa'ri tabi ipinangagin ana magigin hadi nin manga Judio? Ta nakita namun sa Subangan ana bitoon na tanda na iya ipinangagin na, kaya nagpadidi kami tanganing sambaun iya.” 3 Si Hading Herodes naporisaw kaso marungug ana bagay na adi, bagadto man yo namatian nyo manga tagaJerusalem. 4 Kaya tinipon niya yo intirong namamayo nin kapadian ag manga paratoro nin Kasogoan ag nag-onga kin sa'ri ipinangagin ana Mesias. 5 “Sa Betlehem tabi nin Judea,” simbag nira, ta bagadi yo sinorat nin propeta:
6 “Ika, banwaan nin Betlehem, na nasa karagaan nin Juda,
ika ana magigin maalaga sa nga'min na banwaan na sakup nin Juda,
ta saimo nitongaun ana usad na lidir
na among mamamayo, sa banwaan na Israel.”
7 Kaya pailum na ipinaba'no ni Herodes yo manga lalaking madonong manunugud sa kaologan nya manga bitoon, tanganing ongaun kin kasoarin talaga naglutaw yo bitoon. 8 Kina, pinaponta niya sira sa Betlehem ag tinogon niya nin bagadi: “Maglarga na kamo ag pakarayun ninyong maraay ana pag-anap sa agin. Kin matorakan na ninyo ipaisi tolos sa'kun tanganing ako man makaponta ag magsamba sakanya.” 9-10 Kaya kaso matapos na sirang togonon nyo hadi, nag-agi na sira. Abang niagi sira, nakita nira otro yo bitoon na nakita nyadto sa subangan, ag naogma sirang maraay. Nango'na sakanda otro yo bitoon anggan makaabot sira sa kinamumutangan nyo agin. 11 Lominuug sira adto sa baguy ag nakita nira yo agin ag si Maria na sakanyang ina. Nagrani, lominood, ag sinamba nira yo agin ag binoksan nira yo darang manga regalong bolawan, kamangyan, ag paomot na piba'nong mira.
12 Kaso pabalik na sira sa sadiri nirang banwaan, ominagi sira sa ibang agyan pasamput, ta sa pangatorogan sinabiyan sira nin Kagorangnan na di sira magbalik ki Herodes.
Pagdulag Papontang Egipto
13 Pakaalin nyo manga lalaking madonong manunugud sa kaologan nya manga bitoon, yo angel nin Kagorangnan nagpakita ki Jose sa pangatorogan ag nagsabing, “Magmata ika! Daraun mo tolos sa Egipto ana mag ina, di ika mag-alin adto anggan indi ko pisabi, ta ipapaanap ni Herodes ana agin tanganing gura'nun.” 14 Kaya nyo ga'bi man sanang adto, nag-alin si Jose papontang Egipto kaiba yo agin ag yo ina nyading si Maria. 15 Nag-istar sira adto anggan sa nagraan si Herodes.
Nangyari adi tanganing magibo yo sinabi nin Kagorangnan sa paagi nin propita, “Bina'no ko ana sa'kun na agin alin sa Egipto.”
Ipinaguraan yo manga Agin na Lalaki Dowang Taon Pababa
16 Ngowan, kaso maisyan ni Herodes na linoko iya nyo manga madonong manunungud sa kaologan nyo mga bitoon nagasa iyang maraay. Kaya nga'min na agin na lalaki sa Betlehem ag kaabay na logar nyadi, na ni edad dowang taon pababa nga'min niya ipinaguraan. Adi basi sa naisyan niya adto sa manga madonong kin kasoono nagtonga yo bitoon.
17 Sa paagi nyadi nagibo yo sinabi ni Propeta Jeremias:
18 “Narungug sa Rama yo malakusug na pagrawit-dawit dail sa grabing kamunduan.
Pitangisan ni Raquel yo sakanyang manga agin.
Di niya muyang sawiun sa namamati niyang kamunduan,
dail uda na sira.”
Pagsamput alin sa Egipto
19 Kaso guraan na si Herodes, usad na angel nin Kagorangnan ana nagpakita ki Jose sa pangatorogan adto sa Egipto. 20 Ag sominabi, “Bomowat ika, ag ibalik mo ana mag-ina sa banwaan nin Israel, ta yo nagporbar na gomuraan sa agin guraan na. ” 21 Kaya nagbowat si Jose, dinara niya yo mag-ina pabalik sa Israel.
22 Piro kaso mabari'tan niya na si Arquelao amo nang nihadi sa Judea, salida nyo sakanyang amang si Herodes, natakot iyang magpaadto. Pinatanidan iya otro nin Dios sa paagi nin pangatorogan kaya nagponta sira sa Galilea. 23 Ag nag-istar sira sa banwaan na piba'nong Nazaret, ag nagibo yo sinabi nin manga Propeta, “Baba'nowun iyang Nazareno.”