3
Pangangadal ni Juan na Parabunyag
(Marcos 1:1-8; Lukas 3:1-18; Juan 1:19-28)
1 Ominabot yo panaon na si Juan na Parabunyag nangadal sa kalangtaran nin Judea. 2 Sabi niya, “Magsuwsuw na kamo, ag talikoran ana sainyong manga kasa'lan, ta arani na ana paghahadi nin Dios!” 3 Si Juan yo pisabi ni Propeta Isaias kaso sabiyun niyang,
“Agko usad na niuyaw sa kalangtaran:
‘Ianda ninyo ana aagyan nin Kagorangnan,
togyoon ninyo ana dagan para sakanya.’ ”
4 Ana bado ni Juan gibo sa bawkag nin ayup na kamelyo, ag ana agkus niya anit nin ayup. Ana sakanyang pagkaun lokton ag sabuw ligwan. 5 Yo manga tao alin sa Jerusalem, Judea, ag nga'min na niistar arani sa sowung nin Jordan nagponta sakanya. 6 Nagsuwsuw sira nyo sakandang manga kasa'lan ag binunyagan sira ni Juan adto sa Sowung nin Jordan. 7 Kaso makita ni Juan na kadakul na manga Pariseo ag manga Saduceo na niponta tanganing magpabunyag sakanya, sinabiyan niya sira, “Baga kamo manga agas! Siisay ana nagsabi sainyo na makakadulag kamo sa niaboton na kastigo nin Kagorangnan? 8 Ipakita ninyo ana sainyong pagsuwsuw sa paagi nya pagbaba'gong boway. 9 Di ninyo pag-isipun na kamo libre sa kastigo sa pag-unang alin kamo sa lai ni Abraham. Sa kaostowan pisabi ko sainyo, sa manga batong adi ana Kagorangnan makakagibo nin magigin manga agin ni Abraham. 10 Ngowan pa sana nakaanda na ana parakol sa pagpugud sa manga poonkaoy. Ana poonkaoy na uda maraay na bonga, tatarasun ag iuumut sa kalayo.” 11 Ag sinabi pa sakanda ni Juan, “Pibunyagan ko kamo sa tobig, sinyal na kamo nagbakli na sa manga kasa'lan; piro agko usad na niaboton sonod sa'kun na among nibunyagun sainyo sa Espirito Santo ag kalayo. Mas makapangyariyan iya kisa sa'kun, dawa ngani tagadara nya sakanyang tsinilas di ako angay. 12 Isosoway niya ana maraay na tao sa maraut, arug nin usad na paraoma na sa panaon nin pagpolot pigiuk niya ana pinolot tanganing isoway ana paruy sa owut. Ana paruy sasarayun niya sa kamalig, abang ana manga owut iuumut niya sa kalayong indi napaparung anggan pa man.”
Ana Pagbunyag ki Jesus
(Marcos 1:9-11; Lukas 3:21-22)
13 Kaso panaon na adto, nag-abot si Jesus alin sa Galilea, ag nagponta iya ki Juan adto sa Sowung nin Jordan tanganing magpabunyag sakanya. 14 Piro di kinta'na muya ni Juan na bunyagan si Jesus, kaya sominabi iya, “Ika kinta'na ana kinakaipowan magbunyag sa'kun, taynga ta ika tabi ana magipabunyagun sa'kun?” 15 Piro sominimbag si Jesus, “Togotan mong mangyari adi ngowan, dail ta sa paagi nyadi nagigibo ana kagostowan nin Dios.” Kaya nagtogot si Juan. 16 Kaso mabunyagan na si Jesus, nag-a'was iya sa tobig, nabokasan yo kalangitan, ag nakita niya ana Espirito nin Dios na nagbaba ag nag-ogpa sakanya arug sa usad na salampati. 17 Ag agko sira narungug na boses alin sa langit na nagsabing, “Amo adi ana namumu'yan kong Agin ag ikinaoogma kong maraay.”