4
Tinintaran si Jesus nin Dimonyo
(Marcos 1:12-13; Lukas 4:1-13)
1 Pakatapos nyadi, dinara si Jesus nyo Espirito Santo sa kalangtaran tanganing tintaran iya nin Dimonyo. 2 Adto nag-ayono iya sa luug nin kwarintang aldaw ag kwarintang ga'bi, kaya naponaw iya. 3 Ag ominabot yo Dimonyo ag tinintaran iya na yo sabi, “Kin ika ana Agin nin Dios, sabiyan mo ana manga batong adi na magin tinapay.”
4 Piro sominimbag si Jesus, “Nasosorat sa Kasoratan nin Dios,
‘Ana tao buku sanang sa tinapay naboboway,
kindi sa kada sasabiyun na pisabi nin Dios.’ ”
5 Sonod nyadi, dinara si Jesus nyo Dimonyo sa Jerusalem, ana banal na Siyodad, ag pinatindug sa pinakaataas na parte nyo templo. 6 Sinabiyan iya, “Kin Agin ika nin Dios, magtawun ika, ta ana Kasoratan nin Dios nisabi,
‘Sosogoon nin Dios ana sakanyang manga angel na tabangan ika;
ag aalalayan ika nira,
tanganing indi tomama ana saimong paa sa bato.’ ”
7 Piro sinimbag iya ni Jesus, “Nasosorat man, ‘Indi mo pagporbaran ana Kagorangnan na saimong Dios.’ ”
8 Otro dinara pa nyo Dimonyo si Jesus sa usad na kaataas na bokid, ag ipinakita sakanya yo nga'min na kahadian sa kina'ban ag yo kayamanan nya manga adi. 9 Sabi nyo Dimonyo, “Nga'min na adi itatao ko saimo, kin ika lomood ag somamba sa'kun!” 10 Sominimbag si Jesus, “Lomayas ika, Satanas! Dail ta nasasabi sa Kasoratan nin Dios, ‘Sambaun mo ana Kagorangnan mong Dios ag iya sana ana saimong pagserbiyan.’ ”
11 Pakatapos nyadi, bina'yan na iya nyo Diyablo. Nag-abot man yo manga angel nin Dios ag nagserbi sakanya.
Pino'nan ni Jesus yo Sakanyang Trabao sa Galilea
(Marcos 1:14-15; Lukas 4:14-15)
12 Ngowan, kaso mabaritaan ni Jesus na nakarsil si Juan, nagbalik iya sa Galilea. 13 Piro indi na iya nag-istar sa Nazaret, kindi adto na sa Capernaum, usad na banwaan sa gilid nyo lawud nin Galilea ag sakup nin Zabolon ag Neptali. 14 Sa bagadto, nagibo yo sinabi ni Propita Isaias:
15 “Ana karagaan nin Zabolon ag Neptali, arani sa gilid nya lawud ag nasa balyo nya Sowung Jordan.
Ana manga logar na adi sakup nin Galilea ag piistaran nin manga bukung Judio.
16 Ana manga tao adto na naboboway sa kaduluman nin kasa'lan makakakita nin grabing liwanag.
Maski nasa kaduluman sira ag natatakot na magraan, maliliwanagan sira.”
17 Poon nyadto, nagpoon nang mangadal si Jesus. Ag amo adi yo sakanyang mensayi: “Talikoran ninyo ana sainyong manga kasa'lan, dail arani naa ana paghahadi nin Dios.”
Bina'no ni Jesus yo Upat na Paraisra
(Marcos 1:16-20; Lukas 5:1-11)
18 Miyentras na nagiagi si Jesus sa gilid nyo lawud ni Galilea, nakita niya ana mag-ipatngod na si Simon na piba'nong Pedro ag si Andres na nagitikrag nin pokot dail ta manga paraisra sira. 19 Sinabi ni Jesus sakanda, “Somonod kamo sa'kun ag gigibowun ko kamong manga paraisra nin tao.”b 20 Nyadto man sana bina'yan nira yo sakandang pokot ag nagsonod sakanya.
21 Ag miyentras na padagos si Jesus sa pag-agi, nakita pa niya ana mag-ipatngod na sira Santiago ag Juan na manga agin ni Zebedeo. Nakauga sira sa bangka kaiba nyo sakandang ama ag nipakaray nyo pokot. Bina'no man ni Jesus yo mag-ipatngod. 22 Tolos man nirang bina'yan yo sakandang bangka ag ama, ag nagsonod ki Jesus.
Nangadal ag Nagparaay sa Agko manga Kamatian si Jesus
23 Nagponta si Jesus sa nga'min na logar sa Galilea, ag adto nagpangadal iya sa manga sinagoga, nagtoro nya Maraay na Barita manunungud sa paghahadi nin Dios, ag nagparaay nin nga'min na klase nin kamatian nin manga tao. 24 Ag yo barita manunungud sakanya nakaukup sa intirong Siria, kaya yo nga'min na agko ilang, ag manga nasasakitan nin iba-ibang klasi nin kamatian, manga pisaniban nin maraut na espirito, manga nadidismayo ag paralisado. Nga'min sira pinaraay ni Jesus. 25 Ag kadakul na tao ana sominonod sakanya alin sa Galilea, Decapolis, Jerusalem, Judea ag magin yo manga alin sa loyo nin Sowung Jordan.