5
Sermon ni Jesus sa Bokid
1 Kaso makita ni Jesus yo kadakul na tao, nagtokad iya sa usad na bokid ag nag-uga adto. Nagrani sakanya yo manga disipolo niya, 2 ag pino'nan niyang mangadal ag tinoroan niya sira nin bagadi:
3 “Paladan ana manga taong piako na nagkolang sira sa Dios,
ta sira ana paghahadian nin Dios.
4 Paladan ana manga nimundu,
ta rarangaun sira nin Dios.
5 Paladan ana manga mapakombaba,
ta mapapasakanda ana panoga nin Kagorangnan.
6 Paladan ana manga taong grabi ana pagma'wut na gibowun ana matanos,
ta itatao nin Dios ana sakandang pima'wut.
7 Paladan ana manga maiirakun,
ta kaiirakan sira nin Kagorangnan.
8 Paladan ana manga malinig ana poso,
ta makikita nira ana Dios.
9 Paladan ana manga taong nigibong paagi para sa ikakatoninung,
ta baba'nowun sirang manga agin nin Dios.
10 Paladan ana manga pipasakitan dail nya sakandang pagsonod sa kabu'tan nin Dios,
ta paghahadian sira nin Dios.
11 Paladan kamo kin dail sa pagsonod ninyo sa'kun, pimoda kamo nya manga tao, pipasakitan, ag pisawutan nin maraut. 12 Bagaan man pinadipisilan yo manga propitang namo'na sainyo. Kaya, biyo kamong mag-ogma ta kadakuu nya sainyong premiyo na mariresibi alin sa Dios.”
Asin ag Ilaw
(Marcos 9:50; Lukas 14:34-35)
13 “Kamo baga asin na nitaong namit sa tao. Piro kin ana asin mau'dan na nin asgad, papaono pa adi mapapaasgad otro. Uda na adi pakinabang kaya ipiumut na sana sa lowas ag pitorotongtongan na sana nya manga tao.”
14 “Kamo baga ilaw na nitaong liwanag sa kina'ban. Kapariyo nin usad na siyodad na nasa sapuw nin bokid na indi maiilum, bagaan man dapat kamo. 15 Uda taong nisolo nin ilawan, ag pakatapos pitaguban man sana adi. Kindi, ipibutang adi sa patongan tanganing magtaongliwanag sa nga'min na nasa baguy. 16 Arug man nyaan ana kinakaipowan ninyong gibowun. Paliwanagun ninyo ana sainyong ilaw sa manga tao, tanganing makita nira ana mararaay ninyong gibo, ag oomawun nira ana sainyong Amang nasa langit.”
Ana Katoroan manunungud sa manga Togon nin Dios
17 “Indi ninyo pag-unaun na pominadidi ako tanganing ipaudang alaga ana Kasogoan ni Moises, ag yo manga isinorat nyo manga propeta. Nagponta ako didi indi tanganing ipaudang alaga ana manga adi kindi tanganing gibowun ana manga pisabi nyadi. 18 Sa kaostowan pisabi ko sainyo, abang monaan pa ana langit ag raga, uda dawa pinakasaday na letra o usad na korit ana mauuda sa Kasogoan, anggan indi nagigibo ana nga'min na adi. 19 Kaya ana siisay man na magbalga sa pinakasaday na parti nin Kasogoan ag magtoro nin iba na magbalga man, iya ana magigin pinakaababa sa nga'min na nasasakup nya kahadian nin Dios. Piro ana siisay man na nisonod sa Kasogoan ag nagitoro sa iba na bagaan man ana gibowun, iya ana magigin orog sa manga pihadian nin Dios. 20 Kaya tandaan ninyo, kin indi ninyo malampasan ana manga paratoro nin Kasogoan ag manga Pariseo sa pagsonod nya kamu'yan nin Dios, indi kamo masasakup sa paghahadi niya.”
Katoroan manunungud sa Kaga'san
21 “Narungug ninyo nyadto na sinabi nang o'na sa sa'tun na manga ginikanan, ‘Di ika mangguraan; ana siisay man na gumuraan padodosaan.’ 22 Piro ngowan pisabi ko sainyo: ana magasa sa ipatngod padodosaan na man. Ag ana siisay man na mang-api sa ipatngod ag magsabi sakanya, ‘Uda ika serbi!’ maninimbagun sa ataas na okoman. Ag ana siisay man na magsabi nin, ‘Kapay ika!’ sa sakanyang kapwa, mapoponta sa kalayo nin impiyerno. 23 Kaya kin ika nasa atobangan nin altar tanganing mag-alay nya saimong atang sa Dios, ag marumruman mong agko inanakit sa saimo ana saimong ipatngod, 24 ba'yan mo nawna sa altar ana saimong atang. Makipag-osay nawna ika sa saimong ipatngod, saka na sana ika magbalik ag mag-atang sa Dios.”
25 “Kin agko mag-akosar saimo, makipag-osay tolos ika sakanya miyentras na paponta pa sana kamo sa osgado. Dail kin indi ika makipag-osay tolos iatobang ika niya sa okom, ag kina, itao ika nya okom sa polis ag ikarsil. 26 Pisigoro ko saimo, indi ika makakalowas sa karsilan anggan na indi mo nababayaran ana nga'min mong molta.”
Katoroan manunungud sa Pananambay
27 “Narungug ninyo na sinabi na nyadto pa, ‘Di ika magpakio'wud sa buku mong sugud.’ 28 Piro ngowan pisabi ko sainyo, ‘Ana siisay man na lalaking ki'tun ana usad na babayi na agko osmak na pagmati, nagkasala na nin pagsambay sa sakanyang poso.’ 29 Kaya, kin ana toong mata mo ana dailan nya saimong pagkakasala, olwatun mo ag iumut! Ta maraay pang maudan nin usad na parte nya saimong lawas kisa magtius ana intiro mong lawas sa impiyerno. 30 Kin ana toong kamut mo ana dailan nya saimong pagkakasala, utuwun mo ag iumut! Ta maraay pang maudan ika nin usad na parti nya lawas kisa magtius ana intero mong lawas sa impiyerno.”
Katoroan manunungud sa Pagsoway nin Magsugud
(Mateo 19:9; Marcos 10:11-12; Lukas 16:18)
31 “Itinoro nyadto, ‘Ana lalaking muyang sowayan ana sakanyang sugud, kinakaipowan na ta'wan niya adi nin kasoratan manunungud nya pagsoway.’ 32 Piro ngowan pisabi ko sainyo ana siisay man na sowayan ana sakanyang sugud na indi man adi nipasambay, kina nagpasugud otro yo babayi, ana lalaki ana among agko sala, ta iyang dailan kin taynga ta nagpasambay yo sakanyang sugud. Siisay man ana magsugud sa babaying sinowayan, nagkakasala man nin pananambay.”
Katoroan manunungud sa manga Panonompa
33 Ag sinabi pa ni Jesus, “Narungug man ninyo na ipinagsogo sa manga tao nyo on'nang panaon, ‘Di ika magpasodya sa saimong panoga, gibowun mo kin ono yo ipinanoga mo sa Kagorangnan.’ 34 Piro ngowan pisabi ko sainyo, di kamo magsompa kin nanonoga kamo. Di kamo magsabing, ‘Testigo ko ana langit,’ ta amo adi ana trono nin Dios; 35 o kaya ‘Testigo ko ana raga,’ ta amo aan ana tongtongan nya sakanyang manga paa. Di kamo magsabing, ‘Testigo ko ana Jerusalem,’ ta amo an ana siyodad nya makapangyariyang Hadi. 36 Ni indi ika manompa na gamit ana sainyong payo, dail maski usad na bowuk mo, indi mo kayang papotiun o paitumun. 37 Sabiyun mo na sana, ‘Amo’ kin amo, ag ‘Indi’ kin indi: dail kin manompa pa kamo, alin na aan sa Diyablo.”
Indi Magbagus
38 “Narungug ninyo na sinabi na nyadto pa, ‘Mata sa mata, ag ngipun sa ngipun.’ 39 Piro pisabi ko sainyo ngowan, indi kamo magbagus sa manga nigibo nin maraut sainyo. Kin sampalingun ika sa toong pisngi, iatobang mo pa ana sa wala. 40 Kin agko mag-akosar saimo tanganing ko'non ana saimong bado, itao mo na pati ana saimong alikbuy. 41 Kin agko soldados na pwersaun ikang ipapa'san saimo ana sakanyang dara sa rayong usad na kilometro, gibowun mo nang dowang kilometro. 42 Ta'wan mo ana niayat saimo, ag indi mo pagsayo'man ana nipanobli saimo.”
Mamu'yan ninyo ana Sainyong Kalaban
43 “Narungug ninyo na sinabi nyadto, ‘Mamu'yan mo ana saimong amigo, ag magasa ika sa saimong kalaban.’ 44 Piro pisabi ko sainyo ngowan na mamu'yan ninyo ana sainyong kalaban ag ipagpangadyi ana manga nipersigir sainyo. 45 Kin gibowun ninyo adi, magigin ostong agin kamo nya sainyong Ama na nasa langit. Dail buku sanang ana maraay na tao ana pipasubangan niya nya aldaw kindi maski ana maraut amo man. 46 Kin mamumu'yan sana ninyo ana manga namumuya sainyo, onong premiyo ana mariresibi ninyo alin sa Dios? Bukung pigibo man aan nin manga parasingil nin bowis na manga ipibilang na maraut? 47 Kin ana manga piti'no sana ninyo ana manga amigo ninyo, ono ana ginibo ninyong orog sa ginibo nin iba? Bukung pigibo man aan nya manga taong indi nibisto sa Dios? 48 Kaya kamo kinakaipowang uda katatsaran sa nga'min na bagay, arug nya sainyong Ama na nasa langit.”