6
Katoroan manunungud sa Paglimos
1 “Likayan ninyong buku sanang pakitang tao ana pigibo ninyong karaayan tanganing omawun kamo. Ta kin bagaan ana pigibo ninyo, uda kamo makokokong premiyo alin sa Ama ninyo sa langit.”
2 Kaya kin nilimos ika di mo na adi ipagbandilyo pa, arug nya pigibo nin manga parasaginsagin adto sa simbaan ag manga aagyan. Pigibo nira adi tanganing omawun sira nya manga tao. Pisabi ko sainyo: naresibi na nira ana intiro nirang premiyo. 3 Imbis, kin ika nilimos, di mo ipagpaisi maski sa kaugus mong amigo. 4 Tanganing magin ilum ana saimong paglimos. Sa bagaan, ana saimong Ama na among nakakakita nya pigibong ilum among nita'wun premiyo saimo.
Ana Toro manunungud sa Pangadyi
5 “Kin kamo nipangadyi, di kamo mag-arug sa manga parasaginsagin. Mailig sirang magtindug sa manga simbaan ag sa manga kanto nin aagiyan tanganing makita nin manga tao, pisabi ko sainyo: inako na nira yo sakandang premiyo. 6 Imbis kin ika mangangadyiun, lomuug ika sa kwarto, ag saradowan mo ana pinto, pakatapos mangadyi ika sa sainyong Amang indi nakikita, dail ana sainyong Amang nakakakita nya pigibo ninyo nin ilum, among nita'wun premiyo sainyo.”
7 “Kin nangangadyi kamo di na ninyo pakadakulun ana sasabiyun na uda man kamutangan, ta arug man nyaan ana pigibo nin manga taong indi nibisto sa Dios. Sa pagsabuut nira rurunggun sira nin Kagorangnan dail sa kadakulan nya sakandang piparasabi. 8 Di ninyo sira pag-arugun, ta isi nya sainyong Ama ana kaipowan ninyo bago pa man kamo mag-ayat sakanya. 9 Kaya magpangadyi kamo nin bagadi:
‘Ama namun na nasa langit,
sambaun ana pangaran mo.
10 Ika logod ana maghadi sa sa'mun,
Kin paono pisonod ana saimong kabu'tan sa langit masonod man logod didi sa raga.
11 Ta'wan mo kami nya sa'mun na manga kaka'nun na kaipowan namun sa oroaldaw.
12 Patawarun mo kami sa sa'mun na manga kasa'lan,
arug nya pagpatawad namun sa manga nagkasala sa sa'mun.
13 Ag indi mo kami itogot na madaug nin tintasiyon,
kindi iligtas mo kami ki Satanas.a
[Dail ika ana Hadi, ana Makapangyariyan ag Pinakaorog sa nga'min magpakinaono pa man!]’ ”
14 “Ta kin pipatawad ninyo ana manga nagkasala sainyo, patatawarun man kamo nya sainyong Ama sa langit. 15 Piro kin indi ninyo sira pipatawad, indi man kamo patatawarun nya sainyong Ama.”
Katoroan manunungud sa Pag-ayono
16 “Kin niayono kamo, di ninyo ipakitang mababluy kamo arug nya manga taong parasaginsagin. Dail pitoyo nirang baga lamundu tanganing makita nya manga tao na niayono sira. Sa kaostowan pisabi ko sainyo: naresibi na nira yo sakandang premiyo. 17 Imbis, kin niayono kamo, manokray nya sainyong bowuk ag maglabar, 18 tanganing di maisiyan nya manga tao na niayono kamo, pwera sa sainyong Amang indi nakikita. Ag ana sainyong Ama na nakakakita nya pigibo ninyo nin ilum among nita'wun premiyo sainyo.”
Kayamanan sa Langit
19 “Di kamo magtipon nin manga kayamanan para sa sainyong sadiri didi sa kina'ban, ta didi agko manga insekto ag taku na niraut nya sainyong kayamanan, o kaya maonas na niko'non nyadi. 20 Imbis, magtipon kamo nin kayamanan sa langit, ta adto uda pararaut na insekto ag taku, ag uda nakakaluug na maonas. 21 Ta kin sa'ri ana sainyong kayamanan, adto man ana sainyong poso.”
Ilaw nin Lawas
22 “Ana mata ana niserbing ilaw nin lawas. Kaya kin malinaw ana saimong mata matitingrawan ana intiro mong lawas. 23 Piro kin mao'bog ana saimong mata, maduduluman man ana intiro mong lawas. Kaya kin ana niserbing ilaw mo uda ipitaong liwanag, talagang ladulum nya kamutangan mo.”
Dios o Kayamanan
24 “Uda taong makakaserbi nin rungan sa dowang among. Ta sasayo'man niya ana usad ag sosonoron ana usad, o kaya magigin osto iya sa usad ag tatalikoran niya ana usad. Sa bagaan man, di kamo makakapagserbi nin rungan sa Dios ag sa kayamanan.”
25 Kaya pisabi ko sainyo, “Di kamo maporisaw manunungud nya sainyong boway kin ono ana sainyong kaka'nun, iinomon, o soso'wuton. Mas agko alaga ana boway kisa kaka'nun, ag ana lawas kisa bado? 26 Ki'tun ninyo ana manga bayong, indi sira nitanum ag nagigosi o kaya nitipon nin pagkaun sa bodega, piro pipakaun sira nin Kagorangnan. Bukung mas maalaga kamo kisa manga bayong? 27 Siisay sainyo ana nakakapaaba nya sakanyang boway nin maski agbay sa paagi nin pagparaaadit?
28 Ag taynga kamo ta pirming niaa'dit manunungud sa babadoon? Ki'tun ninyo ana manga borak na nitobo sa kalangtaran; indi sira nitrabao o nigibo nya sakandang maisoso'wut. 29 Piro pisabi ko sainyo, Maski ngani si Solomon na uda na makadaug sa sakanyang pagigin mayaman, di nakaso'wut nin arug kaoyay maski nya usad na manga borak na adi. 30 Ngowan, kin pibadoan ngani nin Kagorangnan ana manga tuuk na boway ngowan piro pisolo kinaodmaan, kamo pa daw ana indi niya badoan? Maloloya ana sainyong pagtood! 31 Kaya indi kamo mag-a'dit kin sa'ri ninyo koko'non ana sainyong kaka'nun, iinomon ag babadoon. 32 Ana manga bagay na adi amo ana piparaingowa nya manga taong uda pa o kolang ana pagtood sa Dios. Piro isi nya sainyong Ama sa langit na ana nga'min na adi kaipowan ninyo. 33 Kaya orog sa nga'min, pag-ingowaun ninyo na mamoway na ana Dios among nihadi sainyo ag mamoway basi sa sakanyang kabu'tan, ag itatao niya ana nga'min na kaipowan ninyo. 34 Kaya, di kamo magparaaa'dit sa aldaw na niaboton, saka na sana ninyo adi atobangun kin mag-abot na. Kin ono ana problima sa aldaw na an, amo na sanang atobangun ninyo.”