7
Pag-osgar sa Kapwa
1 “Di kamo mag-osgar sa iba, tanganing indi man kamo osgaran nin Dios. 2 Dail ta kin ono ana ginamit ninyo sa pag-osga sa sainyong kapwa, amo man aan ana gagamitun nin Dios sa pag-osgar sainyo. 3 Naririparo mo ana saday na mota sa mata nya saimong ipatngod, piro indi mo naririparo ana dakuung mota dyan sa mata mo? 4 Paono ika makakasabi sa ipatngod mo, ‘Mari ta tangkasun ko ana mota mo’ , na ika ngani mismo agko man dakuung mota sa sadiring mata? 5 Parasaginsagin! Alinun mo namo'na ana dakuung mota sa mata mo tanganing makakita ika nin malinaw, ngowan kin naalin mo na pwedi mo nang alinun ana mota sa mata nya ipatngod mo.”
6 “Indi ninyo ipagtao sa ayam ana onoman na bagay na banal, ta baka birikan pa ika ag ti'kibun nyadi. Di ninyo ipag-umut ana sainyong manga perlas sa orig, ta baka torong-tongan man sana nira aan.”
Mag-ayat, Mag-anap, Magtoktok
7 “Mag-ayat kamo sa Dios, ag tata'wan kamo. Anapun ninyo sakanya ana sainyong pianap, ag matotorakan ninyo. Magtoktok kamo sakanya, ag boboksan kamo. 8 Ta siisay man na niayat, pita'wan. Ana lambang nianap, nakakatorak. Ana nikatok, piboksan. 9 Ono tata'wan daw ninyo nin bato ana agin ninyo kin niayat nin tinapay? 10 O agas ana itatao mo kin isra ana piayat? 11 Kin kamo nganing manga maraut, tataong magtao nin maraay na bagay sa manga agin ninyo, amo pa kaya ana sainyong Ama sa langit ana indi magtao nin manga maraay na bagay sa manga niayat sakanya!”
12 “Kaya ngowan, gibowun ninyo sa kapwa ana muyang ninyong gibowun nira sainyo. Amo adi ana muyang sabiyun nyo itinoro sa Kasogoan ni Moises ag manga sinorat nin manga propeta.”
Ana Kapiut na Pintoan
13 “Adto kamo lomuug sa piut na pintoan; ta ana pintoan paponta sa kapaamakan malakbang maiwas ag alwag ana dagan, ag kadakul ana nagiluug diyan. 14 Piro kasaday ag kapiut ana pintoan paponta sa boway na uda kapondowan, ag kaagbay sana ana tao na nakakaanap nya dagan paponta diyan.”
Ana Kaoy Nabibisto sa Bonga
15 “Maglikay kamo sa manga taong bukung ostong propeta. Pagtaud mo, baga sira manga mabubuut na karniro kin nagirani sainyo, piro sa kaostowan manga maisug sirang baga layas na ayam. 16 Mabibisto ninyo sira sa paagi nya sakandang manga gibo, pariyo nya manga tanum. Nibonga daw ana kalamponay nin obas, o namomonga daw ana bokakaw nin linga? Indi! 17 Ana maraay na tanum, maraay man ana bonga, kaya ana maraut na tanum maraut man ana bonga. 18 Indi pweding magbonga nin maraay ana maraut na tanum, o kaya ana maraay na tanum indi nagibonga nin maraut. 19 Ana lambang kaoy na di nibonga nin maraay, pipugud ag ipiumut sa kalayo. 20 Kaya mabibisto ninyo ana manga taong bukung osto na propeta dail sa manga gibo nira.”
Dawa Kasoono Indi ko Kamo Bistado
21 “Buku nga'min na niba'no sa'kun, ‘Kagorangnan!, Kagorangnan,’ sakup na sira sa paghahadi nin Dios. Kindi ana manga tao sana na nagisonod sa kabu'tan nya sa'kun na Ama na nasa langit ana makakaiba sa sakanyang kahadian. 22 Pag-abot nin oltimong Aldaw, dakul ana nisabiyun sa'kun, ‘Kagorangnan! Kagorangnan! Nangadal kami manunungud nya sasabiyun nin Dios sa pangaran mo, nagpalayas kami nin manga mararaut na espirito sa pangaran mo, ag gominibo nin manga ngangalasan na gamit ana pangaran mo!’ 23 Piro sisimbagun ko sira, ‘Dawa kaso arin, di ko kamo nabisto. Romayo kamo sa'kun, kamong manga paragibo nin maraut!’ ”
Dowang Klase nin Taong Nagtogrok nin Baguy
24 “Kaya ana siisay man na nirungug ag nikoyog nyading manga pisabi ko, nakakaarug sa usad na madonong na tao na nagtogrok nyo sakanyang baguy sa sapuw nin bato. 25 Ominoran nin makusug, nagbaa, rinapas nin makusug na parus yo sakanyang baguy, piro di basang adi naragba dail ta adto nakatogrok sa sapuw nin bato. 26 Piro ana siisay man na nirungug nya sa'kun na manga pisabi piro indi man adi pisonod, nakakaarug sa usad na taong patal na nagtogrok nyo sakanyang baguy sa baybay. 27 Kaso nag-oran nin makusug, nagbaa, ag nagrapas yo makusug na parus sa baguy, naraut adi ag biyong naragba!”
Ana Kapangyariyan ni Jesu Cristo