8
Pinaraay ni Jesus yo Usad na Lalaking agko Pudpud
(Marcos 1:40-45; Lukas 5:12-16)
1 Kaso magbaba na si Jesus alin sa bokid, dakul na tao ana nagsonod sakanya. 2 Kina, agko usad na lalaki na nagrani sakanya na agko ilang na pudpud, ag lominood sa atobangan niya, “Kagorangnan,” yo sabi nyadi, “Kin mu'yun mo tabi, mapaparaay mo ako.” 3 Kaya inunat ni Jesus yo sakanyang kamut ag kinaputan iya ag yo sabi, “Muya ko. Magin malinig na ika!” Nyadto man sana nauda yo pudpud sakanya. 4 Pakatapos tinogonan iya ni Jesus, “Di mo adi ipagpamarita dawa kiisay, kindi magparisa ika sa padi ag magdara nin atang basi sa Kasogoan ni Moises, bilang patonay sa manga tao na maraay na ika.”
Pinaraay ni Jesus yo Sorogoon nin Kapitan
(Marcos 1:40-45; Lukas 5:12-16)
5 Kaso makaabot si Jesus sa banwaan nin Capernaum, nagponta sakanya yo usad na kapitan nin soldados na Romano, nakiosip adi sakanya: 6 “Kagorangnan,” sabi nyadi, “Ana sa'kun na sorogoon paralisado, adto iya sa baguy di nakakairon ag nadidipisilan na maraay.” 7 Nagsimbag si Jesus, “Nipontaun ako sa baguy mo tanganing paraayun iya.” 8 Piro sominimbag yo kapitan, “Kagorangnan! Buku akong angay na pontaan mo sa sa'kun na baguy. Sabiyun mo na sana tabi ag mararaay na yo sa'kun na sorogoon. 9 Ta nasasakupan ako nin mas ataas na manga opisiyal, ag agko man ako nasasakupan na manga soldados. Kin sabiyun ko sa usad, ‘Mag-alin ika!’ nagialin iya; kin sabiyun ko man sa iba, ‘Mari didi.’ nagirani iya; ag kin sabiyun ko sa sa'kun na sorogoon, ‘Gibowun mo adi.’ pigibo man adi niya.” 10 Kaso marungug adi ni Jesus nagngalas iya. Kaya sinabi niya sa manga taong nagisonod sakanya, “Pisabi ko sainyo, maski sa bilog na Israel indi pa ako nakatopar nin taong bagadi kadakuu nya sakanyang pagtood. 11 Sabiyun ko sainyo ana kaostowan, dakul na bukung Judio ana niaboton alin sa iba-ibang logar, ana nika'nun na kaiba nira ni Abraham, Isaac ag ni Jacob sa kahadian nin langit. 12 Piro ana manga taong kaiba kinta'na sa pagihadian nin Dios, ana iuumut sa kaduluman sa lowas. Ag adto mananangis sira ag niragutun ana sakandang manga ngipun.” 13 Kina sinabi ni Jesus sa kapitan, “Magsamput na ika, mangyayari ana piayat mo basi sa pagtood mo.” Nyadto man sana naraay yo sorogoon nyo kapitan.
Nagparaay si Jesus nin Dakul na Tao
(Marcos 1:29-34; Lukas 4:38-41)
14 Nagponta si Jesus sa baguy ni Pedro, naabotan niya adto yo panogangan na babayi ni Pedro na nakabatang ta pikalintora. 15 Kaso kaptan ni Jesus yo kamut nyadtong babayi, naraay yo kalintora nyadi. Bominowat iya ag nagserbi ki Jesus. 16 Nyo ga'bing adto, dinara nyo manga tao ki Jesus yo dakul na sinaniban nin manga mararaut na espirito. Sa usad sanang sabi pinalayas ni Jesus yo manga maraut na espirito, ag pinaraay yo nga'min na agko kamatian. 17 Ginibo niya adi tanganing magibo yo sinabi ni propeta Isaias, “Kinoko niya ana sa'tun na manga ilang
ag pinaraay ana sa'tun na manga kamatian.”
Pagsonod ki Jesus
18 Kaso makita ni Jesus yo kadakul na tao sa palibot niya, sinogo niya yo sakanyang manga disipolo na mag-anda sa pagbalyo sa lawud. 19 Nagrani ki Jesus yo usad na paratoro nin Kasogoan ag nagsabi, “Maestro! nakaanda akong magsonod saimo maski sa'ri ika magponta.” 20 Piro sominimbag si Jesus, “Ana manga layas na ayam agko longa, ag ana manga bayong agko manga sagag, piro ana Agin nin Tao uda sadiring istaran na mapapadiskansowan.” 21 Usad sa manga disipolo ana nagsabi ki Jesus, “Kagorangnan, togotan mo na nawna tabi akong makasamput tanganing maipalubung ko yo sa'kun na ama.” 22 Piro sominimbag si Jesus sakanya, “Somonod ika sa'kun, paba'yan mo ana manga guraan na maglubung nya manga guraan nira.”
Pinapondo ni Jesus yo Bagyo
(Marcos 4:35-41; Lukas 8:22-25)
23 Naglonad si Jesus sa bangka, kaiba yo sakanyang manga disipolo. 24 Miyentras sirang nagisakuy biglang ominabot yo malakusug na bagyo sa lawud, ag alos malantup nin manga longso yo bangka, abang natotorog nyadto si Jesus. 25 Kaya nagrani yo manga disipolo tanganing gisungun si Jesus, sabi nira, “Kagorangnan iligtas mo kami! Malalaob na kita!” 26 Sominimbag si Jesus, “Taynga kamo ta natatakot? Lalaloya nya sainyong pagtood.” Bominowat si Jesus, sinogo niya yo parus ag yo manga longso na pomondo, kaya pominondo adi ag nagkaagko katoninungan. 27 Nagngalas yo sakanyang manga disipolo ag sinabi nira, “Onong klasing tao adi na maski ana parus ag ana dagat nagikoyog sakanya!”
Pinaraay ni Jesus yo Dowang Sinaniban nin Dimonyo
(Marcos 5:1-20; Lukas 8:26-39)
28 Kaso nag-abot si Jesus sa Gadara sa loyo nyo lawud, sinabat iya nin dowang lalaking alin sa sementeryo. Ana manga lalaking adi sinaniban nin demonyo, ag maisug kaya uda basang nagkusug buut na omagi sa aagyan na adto. 29 Bigla na sana sirang ominuyaw, “Ika na Agin nin Dios, onong labut mo sa'mun? Ono, nagpadidi ika tanganing padosaan kami bago mag-abot ana tamang panaon?” 30 Sa oroo'naan arani adto, agko gropo nin manga orig na nanginginaun. 31 Nakiosip yo manga demonyo ki Jesus, “Kin palayasun mo kami, togotan mo na sana kami na lomuug adto sa manga orig.” 32 Sinabi ni Jesus, “Sige na lomayas na kamo!” Kaya lominowas sira sa dowang lalaki ag lominuug sa kaoorigan. Nagdaralaganan yo intirong kaoorigan pababa sa ampas, dagosdagos sa tobig ag nagkaurumus.
33 Yo ginibo nyo manga para asikaso nyo manga orig, nagdalagan sira papontang banwaan ag ibinarita sa manga tao yo nga'min na nangyari. Pati na yo nangyari sa dowang lalaking sinaniban nin demonyo. 34 Kaya naglowas yo nga'min na tao adto sa banwaan ag pinontaan si Jesus, ag ipinakiosip na omalin iya sa logar nira.